Tokanga Taha ki he Ngaahi Akonaki Fakaepalōfitá

Taukei: Fakaafeʻi ʻa e kau ako semineli lolotongá ke fakalaulauloto ki he founga kuo nau ʻosi maʻu ai ʻa e ngaahi tāpuaki kuo talaʻofa mai ʻe Palesiteni Nalesoní.

Ko e hā ʻeku ʻuluaki mahinó pe meʻa te u malavá? (Sivi):

Ko e hā hono tuʻo lahi hoʻo tokoniʻi ʻa e kau akó ke nau fakalaulauloto ki he ngaahi tāpuaki ʻoku nau maʻu mei he ʻalu ki he seminelí?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

Naʻe toki lekōtí ni ʻe Palesiteni Lāsolo M. Nalesoni ha pōpoaki makehe maʻa hotau toʻu tupú ʻo talaʻofa ange ha ngaahi tāpuaki maʻongoʻonga kapau te nau kau atu maʻu pē ki he seminelí (Russell M. Nelson, “Fakaafe Fakataautaha ke ʻAlu ki he Seminelí,” ChurchofJesusChrist.org). Ko e founga ʻe taha ʻe lava ke fakaʻaongaʻi ai ʻe he kau faiakó ʻa e pōpoaki ko ʻení ke fakahoko ʻaki ʻa e taumuʻa ʻo e S&I mo fakatupulaki ʻa e lesisitá ko hono fakaafeʻi ʻa e kau akó ke nau fakakaukau ki he founga kuo ʻosi fakahoko ai ʻa e ngaahi talaʻofa ʻa Palesiteni Nalesoní ʻi heʻenau moʻuí hili ʻenau mamata ʻi he vitioó. Ke fai ʻení, ʻe lava ke vahevahe ʻe he kau faiakó ha niʻihi pe kotoa ʻo e ngaahi talaʻofa naʻe lave ki ai ʻa Palesiteni Nalesoní (vakai ki he lisi ʻi laló), pe fakaafeʻi ʻa e kau akó ke kumi kinautolu ʻi heʻenau sio ʻi he vitioó pea fehuʻi ange, “Ko e fē ʻi he ngaahi tāpuaki ko ʻení kuó ke maʻu ʻi hoʻo kau ki he seminelí?” Hili hono ʻoange ha taimi ki he kau akó ke fakalaulauloto aí, ʻe lava ke fakaafeʻi kinautolu ke nau fakakaukau ki he meʻa te nau fai ke hokohoko atu ai ʻenau maʻu ʻa e ngaahi tāpuaki ko ʻení pe ko hai te nau fakaafeʻi ke kau atu ki he seminelí ke nau maʻu foki mo kinautolu ʻa e ngaahi tāpuaki ko ʻení. ʻE lava foki ke fakaafeʻi ʻa e kau akó ke vahevahe mo honau kaungāakó ʻa e ngaahi tāpuaki kuo nau maʻú pea mo e founga kuo fakafehokotaki ai kinautolu ʻe he ngaahi tāpuaki ko iá ki he Tamai Hēvaní mo Sīsū Kalaisí.

ʻOku kau ʻi he niʻihi ʻo e ngaahi talaʻofa naʻe fai ʻe Palesiteni Nalesoni ki he toʻu tupu ʻoku ʻalu ki he seminelí ʻa e ngaahi meʻá ni:

• ʻE lava ʻe he seminelí ʻo liliu hoʻo moʻuí.

• ʻE lava ʻe he seminelí ʻo tokoniʻi koe ke ke ako ke ʻofa mo maʻu ha mahino ki he folofolá.

• Te ke lava ʻo ako e founga ke fakaʻaongaʻi ai e folofolá ke fakaleleiʻi e ngaahi palopalema ʻi hoʻo moʻuí mo kumi e tali ki hoʻo ngaahi fehuʻí.

• Te ke maʻu ha ongo ʻo e kau maí.

• Te ke ako fakataha mo e ngaahi kaungāmeʻa faivelengá mo e kau faiako tākiekina fakalaumālié.

• ʻE tokoniʻi koe ʻe he seminelí ke ke ʻiloʻi ho Fakamoʻui ko Sīsū Kalaisí, pea fakaloloto hoʻo ului kiate Iá mo ʻEne ongoongolelei kuo fakafoki maí.

• Te ke lava ʻo kamata ako ki he founga hono maʻu ʻo e fakahā fakatāutahá.

• Te ke lava ʻo ako ʻa e founga ʻoku folofola atu ai ʻa e Laumālié.

• ʻE tupulaki hoʻo loto-falala ke vahevahe ʻa e ongoongolelei ʻo Sīsū Kalaisi kuo fakafoki maí.

• ʻE tupulaki hoʻo holi ke kau longomoʻui ʻi he kongakau kei talavou ʻa e ʻEikí ke tānaki fakataha ʻa ʻIsilelí.

• Te ke fatongia ʻaki hono fakamālohia hoʻo fakamoʻoní.

• ʻE lava ke mālohi ʻaupito hoʻo tuí.

• Te ke maʻu ha ngaahi kaungāmeʻa te ke lava ʻo falala ki ai.

• Te ke hoko ko ha ākonga moʻoni ʻa e ʻEiki ko Sīsū Kalaisí.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

• ʻOku fakaʻaliʻali ʻe Sisitā Tilimani ʻa e vitiō ʻa Palesiteni Nalesoní ki heʻene kalasi seminelí, pea ʻoku nau aleaʻi ha niʻihi ʻo e ngaahi talaʻofa naʻá ne lave ki aí. ʻOkú ne fehuʻi ange leva ki heʻene kalasí, “Kātaki muʻa ʻo fakalaulauloto pe ko e fē ʻi he ngaahi tāpuaki ko ʻení kuó ke ʻosi maʻu ʻi he ʻalu ki he seminelí mo e founga kuo nau fakafehokotaki ai koe ki he Fakamoʻuí?” ʻOkú ne ʻoange ha taimi ki heʻene kau akó ke fakalaulauloto ai peá ne fakaafeʻi leva ha toko tolu ʻo kinautolu ke vahevahe ʻenau ngaahi fakakaukaú mo e ongó mo e kalasí.

• ʻOku fakahaaʻi ʻe Brother Takanō ʻa e vitiō ʻa Palesiteni Nalesoní ki heʻene kau ako seminelí pea ʻoange kiate kinautolu ha tatau kuo paaki ʻo e ngaahi talaʻofa naʻe lave ki ai ʻa Palesiteni Nalesoní. ʻOkú ne fehuʻi leva ki heʻene kau akó, “Ko e fē ʻi he ngaahi tāpuaki ko ʻení kuó ke maʻu ʻi hoʻo ʻalu ki he seminelí?” Hili hono ʻoange ha taimi ke nau fakakaukau aí, naʻe kole ange ʻe Brother Takanō ki heʻene kau akó ke fakakaukau ki ha taha ʻoku nau ʻilo ʻe lava ke fakaafeʻi ki he seminelí ke ne maʻu ha ngaahi tāpuaki tatau.

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

• Hiki ʻa e founga te ke fakaafeʻi ai hoʻo kau ako seminelí ke fakalaulauloto ki he founga kuo nau ʻosi maʻu ai ʻa e ngaahi tāpuaki kuo lau ki ai ʻa Palesiteni Nalesoní.

• Hiki ʻa e founga te ke fakaafeʻi ai hoʻo kau ako seminelí ke nau fakakaukau ki ha taha ʻoku nau ʻiloʻi ʻe lava ke fakaafeʻi ki he seminelí ke ne maʻu ha ngaahi tāpuaki tatau.

Fakalaulauloto pe aleaʻi:

ʻE ueʻi fēfē hoʻo kau akó ʻe he fakalaulauloto ki he ngaahi tāpuaki kuo nau ʻosi maʻu ʻi he ʻalu ki he seminelí?

Ko e hā ʻa e founga mo e taimi te u fakakau ai ʻení?

Palani ha taimi vave mai ke vahevahe ai ʻa e vitiō ʻa Palesiteni Nalesoní pea fakaafeʻi ʻa e kau akó ke fakalaulauloto ki he founga kuo nau ʻosi maʻu ai ʻa e ngaahi tāpuaki kuo talaʻofa mai ʻe Palesiteni Nalesoní pe ko hai ʻoku nau ʻilo ʻe ʻaonga ki ai ʻa e ngaahi tāpuaki ko ʻení.