Tokanga Taha ki he Ngaahi Akonaki Fakaepalōfitá

Taukei: Ko Hono Fakaʻaongaʻi ʻo e Ngaahi Fehuʻí ke taki ʻa e tokangá ki he ngaahi akonaki fakaepalōfitá ʻi he taimi ʻo e fehuʻí.

Talateu

Naʻe akonaki ʻa Palesiteni ʻAealingi, “Hangē ʻoku ʻikai hano ngataʻanga ʻo e holi ʻa e Fakamoʻuí ke tataki kitautolu ki he feituʻu ke tau malu aí. Pea ʻoku taʻe-feliliuaki ʻa e founga ʻokú Ne fakahaaʻi mai ai kiate kitautolu ʻa e halá. ʻOkú Ne ui ʻi ha ngaahi founga lahi koeʻuhí ke aʻu atu kiate kinautolu ʻoku nau loto-fiemālie ke nau tali iá. Pea ʻoku kau ʻi he ngaahi founga ko iá hono ʻomi ʻa e pōpoakí ʻi he ngutu ʻo ʻEne kau palōfitá, ʻi ha taimi pē ʻoku feʻunga ai ʻa e kakaí ke nau maʻu ha kau palōfita ʻa e ʻOtuá ʻi honau lotolotongá. Ko e kau tamaioʻeiki ko ia kuo fakamafaiʻí ʻoku tuku kiate kinautolu ha fekau ke fakatokanga ki he kakaí, ʻo fakahaaʻi kiate kinautolu ʻa e hala ki he maluʻangá” (Henry B. Eyring, “Finding Safety in Counsel,” Ensign, May 1997, 24).

Naʻe tānaki mai ʻa ʻEletā Kulisitofasoni, “ʻʻOku tau tui ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ki he ngaahi meʻa kotoa pē kuo fakahā mai ʻe he ʻOtuá, mo e ngaahi meʻa kotoa pē ʻokú Ne fakahā mai ʻi he taimi ní, pea ʻoku mau tui te Ne kei fakahā mai ʻamui ha ngaahi meʻa lalahi mo mahuʻinga ʻo kau ki he Puleʻanga ʻo e ʻOtuáʼ (Ngaahi Tefito ʻo e Tui 1:9). ʻOku ʻuhinga ʻeni neongo ʻoku lahi ha ngaahi meʻa ʻoku teʻeki ai ke tau ʻilo, ka ko e ngaahi moʻoni mo e tokāteline ko ia kuo tau ʻosi maʻú, ʻe kei hokohoko atu pē ʻetau maʻu iá ʻo fakafou ʻi he fakahā fakalangi. ʻOku tau fakamahuʻingaʻi ʻa e poto ʻokú ne tokoniʻi ʻa e mahinó, ka ʻi he Siasí he ʻahó ni, ʻo tatau pē mo e kuonga muʻá, ko hono fokotuʻu ko ia e tokāteline ʻo Kalaisí pe fakatonutonu ha ngaahi hehema fakatokāteliné, ko ha meʻa ia ʻoku fai mai ʻe he ʻEikí ʻi he fakahā fakalangi kiate kinautolu ʻokú Ne fakakoloaʻi ʻaki ʻa e mafai fakaeʻaposetoló” (D. Todd Christofferson, “Ko e Tokāteline ʻo Kalaisí,” Mē 2012).

ʻOku totonu ke tuku ʻe he kau faiakó ha taimi ke nau maheni ai mo e ngaahi lea ʻa e kau palōfita moʻuí, koeʻuhí ke nau lava ʻo fakahoko ʻa e taumuʻa ʻa e seminelí mo e ʻinisititiutí, koeʻuhí ke fakanatula pē ʻa e ongo ʻo ʻenau leá meiate kinautolu ki he fānau akó.

Ko e ngaahi lea ʻa e kau palōfitá ko e ngaahi folofola ia ʻa Sīsū Kalaisi, pea ko e ngaahi folofola ʻa Sīsū Kalaisí ko e ngaahi lea ia ʻa e kau palōfitá, kau tangata kikité, mo e kau tangata maʻu fakahaá (Tokāteline mo e Ngaahi Fuakava 1:38).

Ko ha ngaahi fehuʻi ʻeni ʻe niʻihi ʻe lava ke fai ʻe ha faiako lolotonga ʻo e taʻu fakaakó:

1. Ko e hā ʻeku ngaahi tōʻonga akó ʻi heʻene fekauʻaki mo e ngaahi lea ʻa e kau palōfita moʻuí?

2. Ko e hā ʻa e lahi ʻo e taimi ʻoku ou fakaʻaongaʻi ʻi hono ako ʻenau ngaahi leá?

3. ʻE tuʻo fiha nai haʻaku lea ʻaki ʻenau ngaahi leá pe fakaʻaongaʻi ʻenau ngaahi leá ʻi hoku ʻapí, ʻi he ngāué, ʻi he akó, pe ʻi he vaʻingá?

4. ʻOku ou maheni fēfē mo e meʻa ʻoku lea ʻaki ʻe Palesiteni Nalesoni ʻi he uike ní?

5. Ko e hā te u lava ʻo fai ke u ʻiloʻi ai ʻa e ngaahi lea ʻa e kau palōfitá mo e ngaahi meʻa ʻoku nau fakamuʻomuʻá?

Ko e taha ʻeni ʻo e ngaahi kalasi ako nounou ʻe fā naʻe fakataumuʻa ke tokoni ki he kau faiakó mo e kau akó ke nau ako mo fakaʻaongaʻi ʻa e ngaahi lea ʻa e kau palōfitá. Ko ha founga ʻeni ʻe fiemaʻu ki ai ha taimi ke fakatupulaki. ʻI he kamata ʻa e kau faiakó mo e kau akó, ʻe fakaʻau ke nau maheni ange mo e ngaahi lea ʻa e kau palōfitá, pea ʻi he ʻotu lea ki he ʻotu lea, te nau ako vave leva ʻa e kakano mo e puipuituʻa ʻo e ngaahi akonaki ʻa e kau palōfitá. Te nau lava foki ʻo maʻu ʻa e ngaahi akonaki ko ʻení ʻi he Gospel Library mo e ngaahi feituʻu kehe ʻe lava ke maʻu ai kinautolú. ʻE aʻu ki ha taimi te nau lava ai ʻo maʻu ʻa e talaʻofa ʻi he Teutalōnome 6:6: “Pea ko e ngaahi leá ni, ʻa ia ʻoku ou fekau kiate koe he ʻaho ní, ʻe ʻi ho lotó ia.”

Ko e hā ʻeku ʻuluaki mahinó pe meʻa te u malavá? (Sivi)

• ʻOku tuʻo fiha nai ʻeku fakaʻaongaʻi ʻa e ngaahi lea ʻa e kau palōfita moʻuí ʻi he taimi ʻo e fehuʻí ʻi he loki akó?

• ʻOku tuʻo fiha nai ʻeku feinga ke fakaʻaongaʻi ʻa e ngaahi akonaki fakaepalōfitá ke tokoni ke fakaleleiʻi ʻa e ngaahi hohaʻá pe tali ʻa e ngaahi fehuʻi ʻeku kau akó?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

ʻE lava ke hoko ʻa hono fakaʻaongaʻi ʻo e ngaahi fehuʻí ke tākiekina ʻa e tokangá ki he ngaahi akonaki fakaepalōfitá ʻi he lolotonga ʻo e taimi ʻo e kalasí. ʻI he taimi ʻoku fai ai ʻe ha tokotaha ako ha fehuʻi, ʻe tali ʻe ha faiako ʻaki haʻane fai ha ngaahi fehuʻi ʻe tokoni ki he tokotaha akó ke ne fakakaukau pe fekumi ki ha akonaki fakaepalōfita ʻoku tokoni ke tali ʻa e fehuʻí. Ko ha ngaahi sīpinga ʻeni ʻo e faʻahinga fehuʻi ko ʻení:

1. Te ke lava nai ʻo fakakaukau ki he founga kuo tali ʻaki ʻe Palesiteni Nalesoni ʻa e fehuʻi ko ʻení?

2. Ko e hā kuo akoʻi ʻe he kau palōfitá ʻe lava ʻo tokoni kiate kitautolu ʻi he meʻá ni?

3. ʻAlu ki he Gospel Library pea taipeʻi ʻa e ngaahi foʻi lea mahuʻinga mei hoʻo fehuʻí—tau vakai pe naʻe akoʻi ʻe ha taha ʻo ʻetau kau palōfitá ha meʻa fekauʻaki mo ʻeni. Ko e hā naʻá ke maʻú?

4. Mahalo ʻe fiemaʻu ke tataki ʻe ha faiako ʻa e kau akó ki ha lea pau pea fakaafeʻi ʻa e kau akó ke nau sio ki he founga kuo tali ʻaki ʻe he kau palōfitá ʻa e fehuʻi ko ʻení.

ʻE tokoni hono fai ʻení ke mahino lelei ange ki heʻetau kau akó ʻa e mahuʻinga mo e fatongia ʻo e kau palōfita moʻuí. ʻE tupulaki ʻenau mahino ki heʻenau ngaahi leá ʻi heʻenau fakaʻaongaʻi kinautolu ʻi he puipuituʻa ʻo ʻenau moʻuí. Te nau hoko ko ha maʻuʻanga tokoni mateuteu ki he ngaahi tali ki heʻenau ngaahi fehuʻi ʻoku makatuʻunga ʻi he folofolá mo e moʻuí.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

Lolotonga hono ako ʻe he kau akó ʻa e ngaahi veesi ʻi he 1 Kolinitō 14 lolotonga ʻo e kalasí, naʻe fai ʻe Kefi ʻa e fehuʻi ko ʻení: “Ko e hā ʻoku ongoʻi ai ʻi he taimi ʻe niʻihi ʻoku hangē ʻoku ʻikai ha leʻo ʻo e kakai fefiné ʻi he puleʻanga ʻo e ʻEikí?” Naʻe fai ange leva ʻe he faiakó kia Kefi mo e fānau ako kehé ʻa e fehuʻi ko ʻení: “Kalasi, tau vakai ki ha lea naʻe fai ʻe Palesiteni Nalesoni naʻe ui ko e ʻNgaahi Koloa Fakalaumāliéʼ ʻi he ngaahi miniti siʻi ka hokó. ʻI hoʻo laú, ko e taimi fē pea ʻoku founga fēfē ʻoku tokoni ai ʻa Palesiteni Nalesoni ke ne tali ʻa e fehuʻi ʻa Kefí?”

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

Tataki ʻa e kau ako ko ʻení ki he ngaahi lea ʻa e kau palōfitá ʻaki hono fai ha fehuʻi ʻo fakatefito ʻi he sīpinga ʻi ʻolungá pe hiki haʻo fehuʻi pē ʻaʻau.

1. ʻOku fehuʻi ʻe ha tokotaha ako, “Ko e hā ʻoku hoko ʻi he maama tataliʻanga ʻo e ngaahi laumālié? ʻOku nau sio mai kiate kitautolu? ʻOku nau ʻiloʻi ʻa e meʻa ʻoku tau faí?”

2. ʻOku fehuʻi ʻe ha tokotaha ako, “Ko e hā ka foaki ai ʻe he ʻEikí ha manavaʻofa ki ha kakai ʻe niʻihi ʻoku nau fakafepaki ki Heʻene palaní?”

Fakalaulauloto pe aleaʻi:

• Ko e hā ʻoku lelei ange ai ke fakahinohinoʻi ʻa e kau akó ki he ngaahi lea ʻa e kau palōfitá ʻi he taimi ʻoku nau fai ai ha fehuʻí kae ʻikai ʻoange kiate kinautolu ʻa e tali mei heʻetau manatú pe ʻiló?

• Ko e hā ʻokú ke ako fekauʻaki mo hono tataki ʻa e kau akó ki he ngaahi lea ʻa e kau palōfitá?

Fakakau:

Akoako fakaʻaongaʻi maʻu pē ha taha ʻo e ngaahi fehuʻi ʻi ʻolungá pe ko ha fehuʻi tatau ʻa koe pē ʻi he kalasí ʻi he māhina ka hokó. Feinga ke ʻiloʻi ʻa e meʻa ʻoku hokó. Faʻa kātakiʻi ʻa e kau akó pea mo koe foki. Vakai ki he founga ʻoku fakalakalaka ai ʻa e ngaahi tūkungá ʻi hoʻo tokoniʻi kinautolu ke nau lelei ange mo toe lelei ange ʻi hono maʻu ʻo e ngaahi tali totonú ʻi he foʻi lea kuo fakahā maí.

ʻI he fakataha hoko mo hoʻo pule ʻi he polokalamá, vahevahe ʻa e founga ʻoku fakalakalaka ai ʻa e ngaahi tūkungá.

Fiemaʻu Lahi Ange?

Naʻe vahevahe ʻe ʻEletā Makongikī ʻa e meʻá ni, “ʻOku foaki ʻe he ʻEikí ki hono kakaí ʻi he kuonga kotoa pē ʻa e fakahinohino ʻoku nau fiemaʻu ʻi he taimi ʻo e fakatuʻutāmakí. Pea ko e moʻoni ʻe ʻi ai e ngaahi taimi ʻi he ngaahi ʻaho ka hoko maí he ʻikai lava ha meʻa ka ko e poto pē ʻa e ʻOtuá, fakafou mai ʻi he ngutu ʻo e kau palōfitá, ʻo fakahaofi hono kakaí” (ʻi he Carol F. McConkie, “Moʻui ʻo Fakatatau mo e Lea ʻa e Kau Palōfitá,” Liahona, Nōvema 2014, 79).

Ko ha sīpinga ʻo e founga ʻe lava ke mahino ʻaupito ai ʻa e tali ʻa ha palōfitá:

Dallin H. Oaks, “Falala ki he ʻEikí,” Liahona, Nōvema 2019