Tokanga Taha ki he Ngaahi Akonaki Fakaepalōfitá

Taukei: Fakakaukau kimuʻa—fakafehoanaki ʻa e ngaahi akonaki fakaepalōfitá ki he ngaahi hohaʻa ʻa e kau akó.

Talateu

Naʻe akonaki ʻa Palesiteni Henelī B. ʻAealingi, “ʻOku hangē ʻoku ʻikai hano ngataʻanga ʻo e holi ʻa e Fakamoʻuí ke tataki kitautolu ki he malú. Pea ʻoku taʻe-feliliuaki ʻa e founga ʻokú Ne fakahaaʻi mai ai kiate kitautolu ʻa e halá. ʻOkú Ne ui ʻi ha ngaahi founga lahi koeʻuhí ke aʻu atu kiate kinautolu ʻoku nau loto-fiemālie ke nau tali iá. Pea ʻoku kau ʻi he ngaahi founga ko iá hono ʻomi ʻa e pōpoakí ʻi he ngutu ʻo ʻEne kau palōfitá, ʻi ha taimi pē ʻoku feʻunga ai ʻa e kakaí ke nau maʻu ha kau palōfita ʻa e ʻOtuá ʻi honau lotolotongá. Ko e kau tamaioʻeiki ko ia kuo fakamafaiʻí ʻoku tuku kiate kinautolu ha fekau ke fakatokanga ki he kakaí, ʻo fakahaaʻi kiate kinautolu ʻa e hala ki he maluʻangá” (Henry B. Eyring, “Finding Safety in Counsel,” Ensign, May 1997, 24).

Naʻe tānaki mai ʻa ʻEletā D. Toti Kulisitofasoni, “ʻʻOku tau tui ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ki he ngaahi meʻa kotoa pē kuo fakahā mai ʻe he ʻOtuá, mo e ngaahi meʻa kotoa pē ʻokú Ne fakahā mai ʻi he taimi ní, pea ʻoku mau tui te Ne kei fakahā mai ʻamui ha ngaahi meʻa lalahi mo mahuʻinga ʻo kau ki he Puleʻanga ʻo e ʻOtuáʼ (Ngaahi Tefito ʻo e Tui 1:9). ʻOku ʻuhinga ʻeni neongo ʻoku lahi ha ngaahi meʻa ʻoku teʻeki ai ke tau ʻilo, ka ko e ngaahi moʻoni mo e tokāteline ko ia kuo tau ʻosi maʻú, ʻe kei hokohoko atu pē ʻetau maʻu iá ʻo fakafou ʻi he fakahā fakalangi. … ʻOku tau fakamahuʻingaʻi ʻa e poto ʻokú ne tokoniʻi ʻa e mahinó, ka ʻi he Siasí he ʻahó ni, ʻo tatau pē mo e kuonga muʻá, ko hono fokotuʻu ko ia e tokāteline ʻo Kalaisí pe fakatonutonu ha ngaahi hehema fakatokāteliné, ko ha meʻa ia ʻoku fai mai ʻe he ʻEikí ʻi he fakahā fakalangi kiate kinautolu ʻokú Ne fakakoloaʻi ʻaki ʻa e mafai fakaeʻaposetoló” (D. Todd Christofferson, “Ko e Tokāteline ʻo Kalaisí,” Mē 2012).

Ke fakahoko ʻa e taumuʻa ʻo e seminelí mo e ʻinisititiutí, ʻoku totonu ke tuku ʻe he kau faiakó ha taimi ke nau maheni ai mo e ngaahi lea ʻa e kau palōfita moʻuí, koeʻuhí ke fakanatula pē ʻa e ongo mai ʻenau ngaahi leá mei he kau faiakó ki he fānau akó.

Ko e ngaahi lea ʻa e kau palōfitá ko e ngaahi folofola ia ʻa Sīsū Kalaisí, pea ko e ngaahi folofola ʻa Sīsū Kalaisí ko e ngaahi lea ia ʻa e kau palōfitá, kau tangata kikité, mo e kau tangata maʻu fakahaá (Tokāteline mo e Ngaahi Fuakava 1:38).

Ko ha ngaahi fehuʻi ʻeni ʻe niʻihi ʻe lava ke fai ʻe ha faiako lolotonga ʻo e taʻu fakaakó:

1. Ko e hā te u fai ke ako maʻu pē ʻa e ngaahi lea ʻa e kau palōfita moʻuí?

2. Ko e hā ʻa e lahi ʻo e taimi ʻoku ou fakaʻaongaʻi ʻi he uike takitaha ke ako ʻenau ngaahi leá?

3. ʻE tuʻo fiha nai haʻaku lea ʻaki ʻenau ngaahi leá pe fakaʻaongaʻi ʻenau ngaahi leá ʻi ʻapi, ʻi he ngāué, ʻi he akó, pe lolotonga ʻo e ngaahi ʻekitivitī ʻi he taimi ʻataá?

4. ʻOku ou maheni fēfē mo e meʻa ʻoku lea ʻaki ʻe Palesiteni Lāsolo M. Nalesoni ʻi he uike ní?

5. Ko e hā te u lava ʻo fai ke u ʻiloʻi ai ʻa e ngaahi lea ʻa e kau palōfitá mo e ngaahi meʻa ʻoku nau fakamuʻomuʻá?

Ko e taha ʻeni ʻo e ngaahi kalasi ako nounou ʻe fā naʻe fakataumuʻa ke tokoni ki he kau faiakó mo e kau akó ke nau ako mo fakaʻaongaʻi ʻa e ngaahi lea ʻa e kau palōfitá. Ko ha founga ʻeni ʻe fiemaʻu ki ai ha taimi ke fakatupulaki. ʻI he hokohoko atu hono ako ʻe he kau faiakó mo e kau akó ʻa e kakano mo e puipuituʻa ʻo e ngaahi akonaki ʻa e kau palōfitá, ʻe toe maheni ange ai ʻa e kau akó mo e ngaahi lea ʻa e kau palōfitá. Te nau taukei foki ʻi hono maʻu ʻo e ngaahi akonaki ko ʻení ʻi he Gospel Library mo e ngaahi maʻuʻanga tokoni kehé. ʻE aʻu ki ha taimi te nau lava ai ʻo maʻu ʻa e talaʻofa ʻi he Teutalōnome 6:6: “Pea ko e ngaahi leá ni, ʻa ia ʻoku ou fekau kiate koe he ʻaho ní, ʻe ʻi ho lotó ia.”

Ko e hā ʻeku ʻuluaki mahinó pe meʻa te u malavá? (Sivi)

Ko e hā ʻokú ke fai ke ʻiloʻi ai ʻa e ngaahi meʻa ʻoku hohaʻa ki ai ʻa e kau akó pea teuteu kimuʻa ke lea fekauʻaki mo ʻenau hohaʻá?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

ʻE lava ke hoko ʻa e fakakaukau kimuʻá mo ha holi ke fakafehoanaki ʻa e ngaahi akonaki fakaepalōfitá ki he ngaahi hohaʻa ʻa e kau akó ʻi he lolotonga ʻo e mālōlō ʻa e semesitaá pe fakaʻosinga ʻo e uiké. ʻE lava ke fakakaukau ha faiako ki ha ngaahi meʻa ʻe ala hohaʻa ki ai ʻa e kau akó ʻi heʻenau ako ʻa e ngaahi lēsoni mo e ngaahi konga folofola ka hokó. ʻE lava ke ʻosi ʻiloʻi pe ʻamanaki atu ki he ngaahi hohaʻa ko ʻení. Kapau ʻoku ʻi ai ha lisi ʻo ha ngaahi meʻa ʻoku fai ki ai ha hohaʻa, ʻe lava leva ke feinga ʻa e faiakó ke fakafehoanaki ʻa e ngaahi hohaʻá mo e ngaahi akonaki fakaepalōfita ʻe tokoni ke fakaleleiʻi ʻa e ngaahi hohaʻa ko iá. Ke fai ʻení, ʻe lava ke fai ʻe ha faiako ha fehuʻi faingofua ʻe ua:

1. Ko e hā ha ngaahi hohaʻa pe fehuʻi ʻe lava ke maʻu ʻe heʻeku kau akó ʻi heʻemau ako ʻa e vahe, konga, pe tohi ko ʻení?

ʻE lava leva ke toʻo ʻe he faiakó ha hohaʻa pe fehuʻi ʻe taha ʻi ha taimi, ʻo fehuʻi ange:

1. Ko e hā ha ngaahi akonaki fakaepalōfita ʻokú ne fakamatalaʻi ʻa e hohaʻa ko ʻení?

ʻI hono fai ʻeni ʻe he kau faiakó, te nau hoko ai ko ha toe fakaongo atu mo ha fakamahino lelei ange ʻo e ngaahi lea ʻa e kau palōfitá, pea ʻe hoko ʻa e loki akó ko ha feituʻu ke maʻu ai ʻa e ngaahi talí ki he fānau akó.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

ʻI he teuteu ʻa ha faiako ki he Tohi ʻa Molomoná ki he taʻu ka hoko maí, ʻokú ne toe vakaiʻi ʻa e vakai fakalūkufua fakauike ʻi he naunau fakalēsoní peá ne fehuʻi, “Ko e hā ha ngaahi meʻa ʻe ala hohaʻa ki ai ʻeku kau akó pe ngaahi fehuʻi ʻe hoko ʻi he taʻú ni ʻi heʻemau ako ʻa e Tohi ʻa Molomoná?”

ʻOkú ne ʻiloʻi ha ngaahi fehuʻi ʻe ono ʻe ala hoko, ʻa ia ko e taha ai ko e, “ʻOku faingofua nai ʻa e fakatomalá? Naʻe hangē naʻe fai ia ʻe ʻĪnosi mo ʻAlamā ʻi ha ngaahi ʻaho siʻi pē.”

ʻOku fehuʻi ange leva ʻe he faiakó, “Ko e hā ha (ngaahi) akonaki fakaepalōfita te ne lava ʻo fakamatalaʻi ʻa e meʻa ʻe ala hohaʻa ki ai ʻa e tokotaha ko ʻení?”

ʻOku toe vakaiʻi ʻe he faiakó ʻa e akonaki ʻa Palesiteni Nalesoni fekauʻaki mo e “fakatomala fakaʻahó” ʻa ia ʻoku maʻu ʻi heʻene lea ʻi he konifelenisi lahi ʻo ʻEpeleli 2022, “Ko e Mālohi ʻo e Ivi Fakalaumālié.”

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

Fakalaulauloto ki ha meʻa ʻe taha pe ua ʻokú ke ʻiloʻi ʻoku maʻu ʻe hoʻo kau akó pe naʻá ke ʻamanaki te nau maʻu ʻaki hano fehuʻi ange, “Ko e hā ha ngaahi meʻa ʻe ala hohaʻa pe fehuʻi ʻe maʻu ʻe heʻeku kau akó ʻi he uiké ni ʻi heʻemau akó ?”

ʻI he taimi ʻokú ke ʻilo ai ha hohaʻa ʻe taha pe uá, fehuʻi ange leva, “Ko e hā ha (ngaahi) akonaki fakaepalōfita te ne lava ʻo fakamatalaʻi ʻa e hohaʻa ko ʻení?”

Fakalaulauloto pe aleaʻi:

‘Okú ke pehē ko e hā ‘a e ‘uhinga ‘oku mahuʻinga ai ‘a e taukei ko ʻení? Fakakaukau ki hoʻo aʻusia ʻi hono fai ʻení. Ko e hā ʻa e ngaahi lelei ʻe hoko mai kiate koé? Fakakaukau ki he aʻusia ʻa e tokotaha akó. Ko e hā ha ngaahi lelei te nau maʻú? ʻOkú ke pehē ko e hā ha liliu ʻe lava ke hoko heni ʻi hoʻo faiakó?

Fakakau:

Laka atu ki muʻa, feinga ke ke ʻamanaki atu ki ha ngaahi hohaʻa pe fehuʻi ʻe fai atu ʻe hoʻo kau akó. Ko e taimi pē ʻokú ke fanongo ai ki he lea ʻa e kau palōfitá ki ha tefito ʻe ala ʻaongá, lekooti pea fokotuʻutuʻu ia ʻi ha founga ʻe faingofua ai haʻate lava ʻo maʻu ia ʻi he kahaʻú. ʻE aʻu ki ha taimi te ke maʻu ai ha tauhiʻanga ʻo e ngaahi moʻoní ke ke fakaʻaongaʻi.

Fiemaʻu Lahi Ange?

ʻAlamā 31:5: “Pea ko ʻeni, koeʻuhí kuo hoko hono malanga ʻaki ʻo e folofolá ko ha fuʻu meʻa ke takiakiʻi ai ʻa e kakaí ke fai ʻa ia ʻoku totonú—ʻio, naʻe mālohi lahi ange ʻene ngāué ʻi he fakakaukau ʻa e kakaí ʻi he heletā, pe ko ha toe meʻa kehe, ʻa ia kuo hoko kiate kinautolú—ko ia naʻe … ʻaonga ke nau ʻahiʻahiʻi ʻa e ivi ʻo e folofola ʻa e ʻOtuá.”

Ko ha sīpinga ʻo e founga ʻe lava ke fakamatalaʻi ai ʻe ha tali ʻa e palōfitá ha meʻa ʻoku fai ki ai ha hohaʻa:

Russell M. Nelson, “Ngaahi Fili ki he Taʻengatá” [fakataha lotu fakaemāmani lahi maʻá e kakai lalahi kei talavoú, 15 Mē 2022], Gospel Library.