Tokanga Taha ki he Ngaahi Akonaki Fakaepalōfitá

Taukei: Fakafanongo ki he konifelenisi lahí mo fakakaukau ki ha tokotaha ako.

Talateu

Naʻe akonaki ʻa Palesiteni ʻAealingi, “Hangē ʻoku ʻikai hano ngataʻanga ʻo e holi ʻa e Fakamoʻuí ke tataki kitautolu ki he maluʻangá. Pea ʻoku taʻe-feliliuaki ʻa e founga ʻokú Ne fakahaaʻi mai ai kiate kitautolu ʻa e halá. ʻOkú Ne ui ʻi ha ngaahi founga lahi koeʻuhí ke aʻu atu kiate kinautolu ʻoku nau loto-fiemālie ke nau tali iá. Pea ʻoku kau ʻi he ngaahi founga ko iá hono ʻomi ʻa e pōpoakí ʻi he ngutu ʻo ʻEne kau palōfitá, ʻi ha taimi pē ʻoku feʻunga ai ʻa e kakaí ke nau maʻu ha kau palōfita ʻa e ʻOtuá ʻi honau lotolotongá. Ko e kau tamaioʻeiki ko ia kuo fakamafaiʻí ʻoku tuku kiate kinautolu ha fekau ke fakatokanga ki he kakaí, ʻo fakahaaʻi kiate kinautolu ʻa e hala ki he maluʻangá” (Henry B. Eyring, “Finding Safety in Counsel,” Ensign, May 1997, 24).

Naʻe tānaki mai ʻa ʻEletā Kulisitofasoni, “ʻʻOku tau tui ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ki he ngaahi meʻa kotoa pē kuo fakahā mai ʻe he ʻOtuá, mo e ngaahi meʻa kotoa pē ʻokú Ne fakahā mai ʻi he taimi ní, pea ʻoku mau tui te Ne kei fakahā mai ʻamui ha ngaahi meʻa lalahi mo mahuʻinga ʻo kau ki he Puleʻanga ʻo e ʻOtuáʼ (Ngaahi Tefito ʻo e Tui 1:9). ʻOku ʻuhinga ʻeni neongo ʻoku lahi ha ngaahi meʻa ʻoku teʻeki ai ke tau ʻilo, ka ko e ngaahi moʻoni mo e tokāteline ko ia kuo tau ʻosi maʻú, ʻe kei hokohoko atu pē ʻetau maʻu iá ʻo fakafou ʻi he fakahā fakalangi. ʻOku tau fakamahuʻingaʻi ʻa e poto ʻokú ne tokoniʻi ʻa e mahinó, ka ʻi he Siasí he ʻahó ni, ʻo tatau pē mo e kuonga muʻá, ko hono fokotuʻu ko ia e tokāteline ʻo Kalaisí pe fakatonutonu ha ngaahi hehema fakatokāteliné, ko ha meʻa ia ʻoku fai mai ʻe he ʻEikí ʻi he fakahā fakalangi kiate kinautolu ʻokú Ne fakakoloaʻi ʻaki ʻa e mafai fakaeʻaposetoló” (Ko e Tokāteline ʻo Kalaisí,” Mē 2012).

ʻOku totonu ke tuku ʻe he kau faiakó ha taimi ke nau maheni ai mo e ngaahi lea ʻa e kau palōfita moʻuí, koeʻuhí ke nau lava ʻo fakahoko ʻa e taumuʻa ʻa e seminelí mo e ʻinisititiutí, koeʻuhí ke fakanatula pē ʻa e ongo ʻo ʻenau leá meiate kinautolu ki he fānau akó.

Ko e ngaahi lea ʻa e kau palōfitá ko e ngaahi folofola ia ʻa Sīsū Kalaisí, pea ko e ngaahi folofola ʻa Sīsū Kalaisí ko e ngaahi lea ia ʻa e kau palōfitá, kau tangata kikité, mo e kau tangata maʻu fakahaá (Tokāteline mo e Ngaahi Fuakava 1:38).

Ko ha ngaahi fehuʻi ʻeni ʻe niʻihi ʻe lava ke fai ʻe ha faiako lolotonga ʻo e taʻu fakaakó:

1. Ko e hā ʻeku ngaahi tōʻonga akó ʻi heʻene fekauʻaki mo e ngaahi lea ʻa e kau palōfita moʻuí?

2. Ko e hā ʻa e lahi ʻo e taimi ʻoku ou fakaʻaongaʻi ʻi hono ako ʻenau ngaahi leá?

3. ʻE tuʻo fiha nai haʻaku lea ʻaki ʻenau ngaahi leá pe fakaʻaongaʻi ʻenau ngaahi leá ʻi hoku ʻapí, ʻi he ngāué, ʻi he akó, pe ʻi he vaʻingá?

4. ʻOku ou maheni fēfē mo e meʻa ʻoku lea ʻaki ʻe Palesiteni Nalesoni ʻi he uike ní?

5. Ko e hā te u lava ʻo fai ke u ʻiloʻi ai ʻa e ngaahi lea ʻa e kau palōfitá mo e ngaahi meʻa ʻoku nau fakamuʻomuʻá?

Ko e taha ʻeni ʻo e ngaahi kalasi ako nounou ʻe fā naʻe fakataumuʻa ke tokoni ki he kau faiakó mo e kau akó ke nau ako mo fakaʻaongaʻi ʻa e ngaahi lea ʻa e kau palōfitá. Ko ha founga ʻeni ʻe fiemaʻu ki ai ha taimi ke fakatupulaki. ʻI he kamata ʻa e kau faiakó mo e kau akó, ʻe fakaʻau ke nau maheni ange mo e ngaahi lea ʻa e kau palōfitá, pea ʻi he ʻotu lea ki he ʻotu lea, te nau ako vave leva ʻa e kakano mo e puipuituʻa ʻo e ngaahi akonaki ʻa e kau palōfitá. Te nau hoko foki ʻo taukei ʻi hono kumi ʻa e ngaahi akonaki ko ʻení ʻi he laipeli ʻo e ongoongoleleí mo e ngaahi feituʻu kehe ʻe lava ke maʻu ai kinautolú. ʻE aʻu ki ha taimi te nau lava ai ʻo maʻu ʻa e talaʻofa ʻi he Teutalōnome 6:6: “Pea ko e ngaahi leá ni, ʻa ia ʻoku ou fekau kiate koe he ʻaho ní, ʻe ʻi ho lotó ia.”

Ko e hā ʻeku ʻuluaki mahinó pe meʻa te u malavá? (Sivi)

“Kuo hoko fēfē ha liliu ʻi hoʻo faiakó ʻi hoʻo fanongo pe ako ha lea ʻi he konifelenisi lahí mo fakakaukau ki ha tokotaha akó?”

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

ʻE lava ke fanongo ha faiako ki he konifelenisi lahí maʻana mo ʻene kau akó. ʻI he taimi ʻoku fanongo ai ha faiako ki he konifelenisi lahí maʻa ʻene kau akó, ʻokú ne fakakaukau ki he ngaahi faingataʻa, hohaʻa, pe ngaahi fehuʻi ʻoku maʻu ʻe heʻene kau akó pe ngaahi faingataʻa ʻoku nau fehangahangai mo iá. Mahalo te ne fakakaukau ki ha tokotaha ako ʻe taha pe ko e kalasí fakalūkufua. Ko ha faiako ʻokú ne fai ʻení, ʻokú ne teuteu atu pē ki he konifelenisi lahí ʻaki ʻa e fehuʻi ko ʻení: “Ko e hā te u ako ʻi he ʻahó ni mei he kau palōfitá ʻe tokoni kia [hingoa ʻo e tokotaha akó] pe ko ʻeku kalasí?” ʻI hono lekooti ʻe he faiakó ʻa e ngaahi lēsoni mo e ngaahi ongo ʻokú ne maʻu ki heʻene kau akó, ʻe tupulaki ʻa e ʻofa ʻokú ne maʻu kiate kinautolú pea ʻe tupulaki foki mo ʻene malava ke tataki kinautolu ki he Fakamoʻuí.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

ʻI he teuteu ki he konifelenisi lahí, naʻe fakakaukau ha faiako ke ne fakasio ha ngaahi tali ke fakamatalaʻi ʻaki ʻa e ngaahi meʻa ʻoku hohaʻa ki ai ʻa e kau ako ʻi heʻene kalasí. Ko e ongo fakalūkufua ʻi heʻene kalasí ko e manavahē ʻa e kau akó ki he kahaʻú. ʻI heʻene mamata ʻi he konifelenisi lahí, naʻá ne fekumi ʻi he faʻa lotu mo lekooti ha ngaahi ongo naʻá ne maʻu fekauʻaki mo e hohaʻa ko ʻení. ʻI heʻene hoko atu ʻo ako ʻa e ngaahi lea ʻi he Liahoná, naʻe hokohoko atu ʻene fekumi ki he ngaahi tali ʻe tokoni ke ne tataki ʻene kau akó ki he feituʻu totonú ʻi he taimi naʻa nau vahevahe loto-toʻa ai ʻenau ngaahi hohaʻá ʻi he kalasí.

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

1. Toe vakaiʻi ha lea ʻi he konifelenisi lahí meia Palesiteni Lāsolo M. Nalesoni mo haʻo fakakaukau ki ha hohaʻa fakalūkufua mei hoʻo kau ako ʻi hoʻo kalasí. Fai ʻa e fehuʻi, “Ko e hā te u ako mei he palōfitá ʻe tokoni ki heʻeku kalasí ʻi he ʻaho ní?” Lekooti ha faʻahinga ongo pē ʻokú ke maʻu ʻi hoʻo fakakaukauʻi ha ngaahi founga ke tokoniʻi ai kinautolú.

2. Toe ʻahiʻahi fakahoko ʻeni, ʻi he taimi ko ʻení fili ha lea kehe mo ke fakakaukau ki ha meʻa ʻoku hohaʻa ki ai ha tokotaha ako pau. Fai ʻa e fehuʻi, “Ko e hā te u ako ʻi he ʻahó ni mei he kau palōfitá ʻe tokoni kia [hingoa ʻo e tokotaha akó]?” Hiki ʻa e ngaahi ongó ʻi heʻenau haʻu kiate koé.

Fakalaulauloto pe aleaʻi:

Ko e hā naʻá ke ako pe aʻusia ʻi hoʻo fai ʻení? Ko e hā ʻe hoko ai ʻeni ko ha akoako lelei ʻi hoʻo feinga ke tokoniʻi hoʻo kau akó ke nau ului lahi ange kia Sīsū Kalaisí?

Fakakau:

ʻI hoʻo fakaofi atu ki he ngaahi fakatahaʻanga ʻo e konifelenisi lahí ʻi he kahaʻú, feinga ke ke fakaʻaongaʻi ʻa e taukei ko ʻení. Fakakaukau ki hoʻo kau akó fakalūkufua pe fakataautaha ʻi hoʻo fanongo pe toe vakaiʻi ʻa e ngaahi lea ʻo e konifelenisí. Lekooti hoʻo ngaahi ongó pea fakaʻaongaʻi ʻa e ngaahi ongo ko iá lolotonga ʻo e kalasí ʻo fakatatau mo e tūkunga ʻoku lava aí.

Fiemaʻu Lahi Ange?

Tokāteline mo e Ngaahi Fuakava 1:38: “ʻE ʻikai mole atu ʻa ʻeku leá, ka ʻe fakamoʻoniʻi hono kotoa, neongo pē ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē.”

“ʻOku ʻikai kamata ʻetau feinga ke akoʻí ʻaki hano teuteuʻi ha lēsoni pe fakakaukauʻi ʻa e founga ʻe lava ke ʻoatu aí pe ko hono toe vakaiʻi ʻo e naunau fakalēsoní. ʻOku kamata pē ʻetau ngāue fakafaiakó, ad fontes, pe ʻi he ngaahi matavaí.ʼ Hangē ko ia naʻe lea ʻaki ʻe Palesiteni Melioni G. Lomenií, ʻOku ʻikai ha toe teuteu fakafaiako lelei ange ka ko e ako mei he tupuʻangá ʻa ia ko e folofolá. Kapau ʻoku tau loto ke akoʻi ʻaki ʻa e folofolá ha mālohi, mo ongoʻi heʻetau kau akó e moʻoní mo e mahuʻinga ʻo ha potufolofola, kuo pau ke kamata ʻaki ia ha ongoʻi foʻou mo ha vēkeveke fakatāutaha ʻiate kitautolu.” (R. Kelly Haws, “Fuofua Feinga ke Maʻu ʻEku Leá,” [Fakamafola Ako Fakataʻu ʻa e S&I, 4 ʻAokosi, 2015]).