Tokanga Taha ki he Ngaahi Akonaki Fakaepalōfitá

Taukei: Fakaafeʻi ʻa e kau ako ʻinisititiuti lolotongá ke fakalaulauloto ki he founga kuo nau ʻosi maʻu ai ʻa e ngaahi tāpuaki kuo talaʻofa mai ʻe Palesiteni Nalesoní.

Ko e hā ʻeku ʻuluaki mahinó pe meʻa te u malavá? (Sivi):

Ko e hā hono tuʻo lahi hoʻo tokoniʻi ʻa e kau akó ke nau fakalaulauloto ki he ngaahi tāpuaki ʻoku nau maʻu mei he ʻalu ki he ʻinisititiutí?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

Naʻe toki lekōtí ni ʻe Palesiteni Lāsolo M. Nalesoni ha pōpoaki makehe maʻá e kakai lalahi kei talavoú, ʻo talaʻofa ange ha ngaahi tāpuaki maʻongoʻonga kapau te nau kau atu māʻu pē ki he ʻinisititiutí (Russell M. Nelson, “Fakaafe Fakataautaha ke ʻAlu ki he ʻInisititiutí,” ChurchofJesusChrist.org). Ko e founga ʻe taha ʻe lava ke fakaʻaongaʻi ai ʻe he kau faiakó ʻa e pōpoaki ko ʻení ke fakahoko ʻaki ʻa e taumuʻa ʻo e S&I mo fakatupulaki ʻa e lesisitá, ko hono fakaafeʻi ʻa e kau akó ke nau fakakaukau ki he founga kuo ʻosi fakahoko ai ʻa e ngaahi talaʻofa ʻa Palesiteni Nalesoní ʻi heʻenau moʻuí hili ʻenau mamata ʻi he vitioó. Ke fai ʻení, ʻe lava ke vahevahe ʻe he kau faiakó ha niʻihi pe kotoa ʻo e ngaahi talaʻofa naʻe lave ki ai ʻa Palesiteni Nalesoní (vakai ki he lisi ʻi laló) pe fakaafeʻi ʻa e kau akó ke kumi kinautolu ʻi heʻenau sio ʻi he vitioó pea fehuʻi ange, “Ko e fē ʻi he ngaahi tāpuaki ko ʻení kuó ke maʻu ʻi hoʻo kau ki he ʻinisititiutí?” Hili hono ʻoange ha taimi ki he kau akó ke nau fakalaulauloto aí, ʻe lava ke fakaafeʻi kinautolu ke nau fakakaukau ki he meʻa te nau fai ke hokohoko atu ai ʻenau maʻu ʻa e ngaahi tāpuaki ko ʻení pe ko hai te nau lava ʻo fakaafeʻi ke kau atu ki he ʻinisititiutí ke nau maʻu foki mo kinautolu ʻa e ngaahi tāpuaki ko ʻení. ʻE lava foki ke fakaafeʻi ʻa e kau akó ke vahevahe mo honau kaungāakó ʻa e ngaahi tāpuaki kuo nau maʻú pea mo e founga kuo fakafehokotaki ai kinautolu ʻe he ngaahi tāpuaki ko iá ki he Tamai Hēvaní mo Sīsū Kalaisí.

ʻOku kau ʻi he niʻihi ʻo e ngaahi talaʻofa naʻe fai ʻe Palesiteni Nalesoni ki he kakai lalahi kei talavou ʻoku kau ʻi he ʻinisititiutí ʻa e ngaahi meʻá ni:

• ʻE tokoni atu … ʻa e ʻinisititiutí ke fakaloloto hoʻo ului kia Sīsū Kalaisí.

• ʻE tokoni hoʻo ʻalu ki he ʻinisititiutí ke ke ongoʻi lahi ange ai ʻa e ʻofa lahi ʻa e Tamai Hēvaní ʻiate koé.

• ʻE ʻoatu ʻe he ʻinisititiutí ha kau faiako fakalaumālie, ngaahi kaungāmeʻa faivelenga, mo ha ongoʻi lata.

• ʻE tokoniʻi ai koe ke ke ʻiloʻi ʻa e ʻuhinga ʻoku iku ai hono moʻui ʻaki ʻo e ongoongoleleí ki he fiefia ʻoku ʻikai hano ngataʻangá.

• ʻE tokoni ʻa e ʻalu ʻo ʻinisititiutí ke ke moʻui ʻaki ʻa e ongoongoleleí mo ongoʻi fiefia ange ʻi he taimí ni.

• [Te ne tokoniʻi koe] ke ke ʻiloʻi ʻa e moʻoni fekauʻaki mo koé.

• [Te ne tokoniʻi koe] ke ke ʻiloʻi ʻa e taumuʻa ʻo e moʻuí.

• [Te ne tokoniʻi koe] ke ke nofo maʻu ʻi he hala ʻo e fuakavá.

• [Te ne tokoniʻi koe] ke ke ako ʻa e founga ke tuku ke lāngilangiʻia ai ʻa e ʻOtuá ʻi hoʻo moʻuí.

• [Te ne tokoniʻi koe] ke ke hoko ko ha tokotaha faʻa fakalelei.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

• ʻOku fakaʻaliʻali ʻe Sisitā Seiko ʻa e vitiō ʻa Palesiteni Nalesoní ki heʻene kalasi ʻinisititiutí, pea nau aleaʻi ha niʻihi ʻo e ngaahi palōmesi naʻá ne lave ki aí. ʻOkú ne fehuʻi ange leva ki heʻene kalasí, “Kātaki muʻa ʻo fakalaulauloto pe ko e fē ʻi he ngaahi tāpuaki ko ʻení kuó ke ʻosi maʻu ʻi he ʻalu ki he ʻinisititiutí mo e founga kuo nau fakafehokotaki ai koe ki he Fakamoʻuí?” ʻOkú ne ʻoange ha taimi ki heʻene kau akó ke nau fakalaulauloto ki ai peá ne fakaafeʻi leva ha toko tolu ʻo kinautolu ke vahevahe ʻenau ngaahi fakakaukaú mo e ongó mo e kalasí.

• ʻOku fakahaaʻi ʻe Brother ʻEkelanisi ʻa e vitiō ʻa Palesiteni Nalesoní ki heʻene fānau ako ʻinisititiutí pea ʻoange kiate kinautolu ha tatau kuo paaki ʻo e ngaahi talaʻofa naʻe lave ki ai ʻa Palesiteni Nalesoní. ʻOkú ne fehuʻi ange leva ki heʻene kau akó, “Ko e fē ʻi he ngaahi tāpuakí ni kuó ke maʻu ʻi hoʻo ʻalu ki he ʻinisititiutí?” Hili hono ʻoange ha taimi ke nau fakakaukau aí, naʻe kole ange ʻe Brother ʻEkelanisi ki heʻene kau akó ke nau fakakaukau ki ha taha ʻoku nau ʻiloʻi ʻe lava ke fakaafeʻi ki he ʻinisititiutí ke ne maʻu ha ngaahi tāpuaki tatau.

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

• Hiki ʻa e founga te ke fakaafeʻi ai hoʻo kau ako ʻinisititiutí ke nau fakalaulauloto ki he founga kuo nau ʻosi maʻu ai ʻa e ngaahi tāpuaki kuo talaʻofa mai ʻe Palesiteni Nalesoní.

• Hiki ʻa e founga te ke fakaafeʻi ai hoʻo kau ako ʻinisititiutí ke nau fakakaukau ki ha taha ʻoku nau ʻiloʻi ʻe lava ke fakaafeʻi ki he ʻinisititiutí ke ne maʻu ha ngaahi tāpuaki tatau.

Fakalaulauloto pe aleaʻi:

ʻE ueʻi fēfē hoʻo kau akó ʻe he fakalaulauloto ki he ngaahi tāpuaki kuo nau ʻosi maʻu ʻi he ʻalu ki he ʻinisititiutí?

Ko e hā ʻa e founga mo e taimi te u fakakau ai ʻení?

Palani ha taimi ke vahevahe ai ʻa e vitiō ʻa Palesiteni Nalesoní pea fakaafeʻi ʻa e kau akó ke fakalaulauloto ki he founga kuo nau ʻosi maʻu ai ʻa e ngaahi tāpuaki kuo talaʻofa mai ʻe Palesiteni Nalesoní pe ko hai ʻoku nau ʻilo ʻe ʻaonga ki ai ʻa e ngaahi tāpuaki ko ʻení.