Tokanga Taha ki he Ngaahi Akonaki Fakaepalōfitá

Taukei: Poupouʻi ʻa e kau akó ke fakaʻaongaʻi ʻa e ngaahi akonaki fakaepalōfita ʻo onopōní ʻi he ngaahi fakataha lotú.

Talateu

Naʻe akonaki ʻa Palesiteni ʻAealingi, “Hangē ʻoku ʻikai hano ngataʻanga ʻo e holi ʻa e Fakamoʻuí ke tataki kitautolu ki he feituʻu ke tau malu aí. Pea ʻoku taʻe-feliliuaki ʻa e founga ʻokú Ne fakahaaʻi mai ai kiate kitautolu ʻa e halá. ʻOkú Ne ui ʻi ha ngaahi founga lahi koeʻuhí ke aʻu atu kiate kinautolu ʻoku nau loto-fiemālie ke nau tali iá. Pea ʻoku kau ʻi he ngaahi founga ko iá hono ʻomi ʻa e pōpoakí ʻi he ngutu ʻo ʻEne kau palōfitá, ʻi ha taimi pē ʻoku feʻunga ai ʻa e kakaí ke nau maʻu ha kau palōfita ʻa e ʻOtuá ʻi honau lotolotongá. Ko e kau tamaioʻeiki ko ia kuo fakamafaiʻí ʻoku tuku maʻu pē kiate kinautolu ha fekau ke fakatokanga ki he kakaí, ʻo fakahaaʻi kiate kinautolu ʻa e hala ki he maluʻangá” (Henry B. Eyring, “Finding Safety in Counsel,” Ensign, May 1997, 24).

Naʻe tānaki mai ʻa ʻEletā Kulisitofasoni, “ʻʻOku tau tui ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ki he ngaahi meʻa kotoa pē kuo fakahā mai ʻe he ʻOtuá, mo e ngaahi meʻa kotoa pē ʻokú Ne fakahā mai ʻi he taimi ní, pea ʻoku mau tui te Ne kei fakahā mai ʻamui ha ngaahi meʻa lalahi mo mahuʻinga ʻo kau ki he Puleʻanga ʻo e ʻOtuáʼ (Ngaahi Tefito ʻo e Tui 1:9). ʻOku ʻuhinga ʻeni neongo ʻoku lahi ha ngaahi meʻa ʻoku teʻeki ai ke tau ʻilo, ka ko e ngaahi moʻoni mo e tokāteline ko ia kuo tau ʻosi maʻú, ʻe kei hokohoko atu pē ʻetau maʻu iá ʻo fakafou ʻi he fakahā fakalangi. ʻOku tau fakamahuʻingaʻi ʻa e poto ʻokú ne tokoniʻi ʻa e mahinó, ka ʻi he Siasí he ʻahó ni, ʻo tatau pē mo e kuonga muʻá, ko hono fokotuʻu ko ia e tokāteline ʻo Kalaisí pe fakatonutonu ha ngaahi hehema fakatokāteliné, ko ha meʻa ia ʻoku fai mai ʻe he ʻEikí ʻi he fakahā fakalangi kiate kinautolu ʻokú Ne fakakoloaʻi ʻaki ʻa e mafai fakaeʻaposetoló” (D. Todd Christofferson, “Ko e Tokāteline ʻo Kalaisí,” Mē 2012).

ʻOku totonu ke tuku ʻe he kau faiakó ha taimi ke nau maheni ai mo e ngaahi lea ʻa e kau palōfita moʻuí, koeʻuhí ke nau lava ʻo fakahoko ʻa e taumuʻa ʻa e seminelí mo e ʻinisititiutí, koeʻuhí ke fakanatula pē ʻa e ongo ʻo ʻenau leá meiate kinautolu ki he fānau akó.

Ko e ngaahi lea ʻa e kau palōfitá ko e ngaahi folofola ia ʻa Sīsū Kalaisí, pea ko e ngaahi folofola ʻa Sīsū Kalaisí ko e ngaahi lea ia ʻa e kau palōfitá, kau tangata kikité, mo e kau tangata maʻu fakahaá (Tokāteline mo e Ngaahi Fuakava 1:38).

Ko ha ngaahi fehuʻi ʻeni ʻe niʻihi ʻe lava ke fai ʻe ha faiako lolotonga ʻo e taʻu fakaakó:

1. Ko e hā ʻeku ngaahi tōʻonga akó ʻi heʻene fekauʻaki mo e ngaahi lea ʻa e kau palōfita moʻuí?

2. Ko e hā ʻa e lahi ʻo e taimi ʻoku ou fakaʻaongaʻi ʻi hono ako ʻenau ngaahi leá?

3. ʻOku tuʻo fiha nai haʻaku lea ʻaki ʻenau ngaahi leá pe fakaʻaongaʻi ʻenau ngaahi leá ʻi hoku ʻapí, ʻi he ngāué, ʻi he akó, pe ʻi he vaʻingá?

4. ʻOku ou maheni fēfē mo e meʻa ʻoku lea ʻaki ʻe Palesiteni Nalesoni ʻi he uike ní?

5. Ko e hā te u lava ʻo fai ke u ʻiloʻi ai ʻa e ngaahi lea ʻa e kau palōfitá mo e ngaahi meʻa ʻoku nau fakamuʻomuʻá?

Ko e taha ʻeni ʻo e ngaahi kalasi ako nounou ʻe fā naʻe fakataumuʻa ke tokoni ki he kau faiakó mo e kau akó ke nau ako mo fakaʻaongaʻi ʻa e ngaahi lea ʻa e kau palōfitá. Ko ha founga ʻeni ʻe fiemaʻu ki ai ha taimi ke fakatupulaki. ʻI he kamata ʻa e kau faiakó mo e kau akó, ʻe fakaʻau ke nau maheni ange mo e ngaahi lea ʻa e kau palōfitá, pea ʻi he ʻotu lea ki he ʻotu lea, te nau ako vave leva ʻa e kakano mo e puipuituʻa ʻo e ngaahi akonaki ʻa e kau palōfitá. Te nau hoko foki ʻo mateuteu ʻi hono kumi ʻa e ngaahi akonaki ko ʻení ʻi he laipeli ʻo e ongoongoleleí mo e ngaahi feituʻu kehe ʻe lava ke maʻu ai kinautolú. ʻE aʻu ki ha taimi te nau lava ai ʻo maʻu ʻa e talaʻofa ʻi he Teutalōnome 6:6: “Pea ko e ngaahi leá ni, ʻa ia ʻoku ou fekau kiate koe he ʻaho ní, ʻe ʻi ho lotó ia.”

Ko e hā ʻeku ʻuluaki mahinó pe meʻa te u malavá? (Sivi)

Ko e hā ha ngaahi founga te ke lava ai ʻo tokoniʻi lelei ange hoʻo kau akó ke nau tokanga taha ki he faleʻi fakaepalōfita ʻo onopōní ʻi he kalasí?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

ʻE lava ke tokoniʻi ʻe he kau faiakó ʻa e kau akó ke nau maheni ange mo e ngaahi lea ʻa e kau palōfita ʻo onopōní ʻaki ʻenau poupouʻi hono fakaʻaongaʻi ia ko ha konga ʻo e fakataha lotú ʻi he ʻaho takitaha ʻi he kalasí. ʻE lava ʻe ha faiako ʻokú ne maʻu ʻa e fakaʻamu ko ʻení ʻo ʻeke ki he tokotaha akó pe kau palesitenisī fakakalasí ha fehuʻi ʻokú ne poupouʻi kinautolu ke nau tokanga taha ki he ngaahi akonaki ʻa e kau palōfita ʻo onopōní. Hangē ko ʻení, ʻe lava ke fai ha taha ʻo e ngaahi fehuʻi ko ʻení:

1. “ʻI hoʻo teuteu ke vahevahe ʻa e poupou fakalaumālié, te ke fili nai mei he ngaahi lea ʻa ha taha ʻo e kau palōfita moʻuí ha meʻa ʻokú ne ueʻi fakalaumālie koe pe ko ha meʻa ʻokú ke pehē te ne tāpuekina ʻa e kau ako ʻi he kalasí?”

2. “Ki he fakakaukau te ke fai ʻi hoʻomou fakataha lotu hokó, kātaki ʻo fili mei he lea ʻa ha taha ʻo e kau palōfita moʻuí ha meʻa ke tānaki atu ki he meʻa kuó ke ʻosi palani ke vahevahe mo e kalasí?”

ʻE lava ke tokoni hono tokoniʻi ʻo e kau akó ke nau tokanga taha ki he ngaahi akonaki fakaepalōfita ʻo onopōní lolotonga ʻa e fakataha lotú ke fakatefito ʻenau kalasí ʻia Sīsū Kalaisi, pea te nau maheni ange mo ʻEne ngaahi folofolá lolotonga ʻenau fakataha maí.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

ʻOku fakataha ʻa Sisitā Sōnasi hili ʻa e kalasí mo Seimī, ko ha tokotaha ako ʻi heʻene kalasí. ʻE fakahoko ʻe Seimī ʻa e fakataha lotú ʻi ha ʻaho ʻe ua. ʻOku fakamanatu ʻe Sisitā Sōnasi kia Seimī ʻene ngāué peá ne fehuʻi ange, “ʻI hoʻo teuteu ko ia ke vahevahe ʻa e poupou fakalaumālié ʻi ha ʻaho ʻe uá, te ke fili nai mei he ngaahi lea ʻa ha taha ʻo e kau palōfita moʻuí?”

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

Fakakaukau ki he kau ako ʻoku vahe ke nau fai ha ngaahi fakataha lotu ʻi he ngaahi ʻaho siʻi ka hokó. Hiki ʻa e fehuʻi te ke fai ki ha taha ʻo e kau ako ko ʻení ke tokoni ke nau tokanga taha ki he ngaahi lea ʻa e kau palōfita ʻo onopōní.

Fakalaulauloto pe aleaʻi:

ʻOkú ke pehē ko e hā ha ngaahi tāpuaki ʻe maʻu ʻe hoʻo kau akó ʻi heʻenau toutou tokanga taha ki he ngaahi lea ʻa e kau palōfita ʻo onopōní?

Fakakau:

Tuku ha taimi ke muimui ai ki he akoako ko ʻení ʻi he uike takitaha. Fokotuʻu ha ʻulungaanga fakakalasi ʻo e fekumi mo fakaʻaongaʻi ʻa e ngaahi lea ʻa e kau palōfitá.

Kātaki ʻo tuku ha taimi lolotonga ʻo e taʻú ni ke ʻiloʻi ha ngaahi founga kehe te ke lava ai ʻo fakakau ʻa e ngaahi lea ʻa e kau palōfitá ʻi hoʻo aʻusia ʻi he loki akó.

Fiemaʻu lahi ange?

Mōsaia 18:19: “ … ʻoua naʻa nau akonaki ʻaki ha meʻa ka ko e ngaahi meʻa pē kuó ne akonaki ʻakí, pea kuo lea ʻaki ʻe he ngutu ʻo e kau palōfita māʻoniʻoní.”

Clark G. Gilbert, “ʻKo Ha Palōfita ʻi he Fonuá: Ngaahi Fakamamafa Fakaepalōfita Lolotonga ki he Kakai Lalahi kei Talavoúʼ Fakamafola fakataʻu ʻa e S&I 2023,” 27 Sānuali 2023.