Fakaafeʻi ʻa e Ako Fakamātoató

Taukei: Fakaʻaongaʻi lelei ʻa e ngāue fakakulupú ʻi he loki akó.

Ko e hā ʻeku ʻuluaki mahinó pe meʻa te u malavá? (Sivi)

• Ko e hā hono tuʻo lahi hoʻo fakaafeʻi hoʻo kau akó ke nau kau ʻi he ngāue fakakulupú?

• Ko e hā ʻokú ke fai ke tokoniʻi kinautolu ke nau maʻu ha aʻusia ʻoku ola leleí?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

ʻOku hoko ʻa e ngāue fakakulupu leleí ʻi ha loki ako, ʻi he taimi ʻoku ngāue fakataha ai ʻa e kau akó ʻi ha fanga kiʻi kulupu iiki ke vakaiʻi, aleaʻi, mo fakaloloto ʻa e mahino ʻoku nau maʻu ki he ngaahi tefitoʻi moʻoni ʻo e ongoongoleleí. ʻI he kau ʻa e kau akó ʻi he ngāue fakakulupú, ʻe lava ke fakatupulaki ai ʻenau malava ke fakamatalaʻi, vahevahe, mo fakamoʻoniʻi ʻa e ngaahi moʻoni ʻo e ongoongoleleí ʻiate kinautolú. ʻOku totonu ke fakakaukauʻi ʻa e ngaahi fakahinohino ko ʻení ʻi he taimi ʻoku fakatupulaki ai ʻa e ngaahi ʻekitivitī ngāue fakakulupú:

1. Faʻu ha ngaahi kulupu.

2. ʻOange ha ngaahi taumuʻa mahino (fakamatala ki he ʻuhinga ʻokú ke fiemaʻu ai ke nau fakatahatahá mo e lahi ʻo e taimi ʻoku nau maʻú).

3. Vahevahe ʻa e meʻa ʻoku totonu ke nau faí.

4. Vahe ʻa e ngaahi ngafa mo e ngaahi fatongia ʻi he kulupú.

5. Poupouʻi ʻa e fetuʻutakí.

6. ʻUnu takai ʻi he ngaahi kulupú ke vakaiʻi ʻa e fakalakalaká, fai ha fakahinohino, pea fakapapauʻi ʻoku nofo maʻu ʻa e kau akó ʻi he ngāué.

7. ʻI hono fakaafeʻí, ʻe vahevahe ʻe he ngaahi kulupú ʻa e meʻa kuo nau akó mo e kalasí kotoa.

Fakatokangaʻi ange: Ko ha taukei lahi ʻeni ʻoku lahi ai ʻa e ngaahi taukei iiki angé. ʻE ala tokoni ke akoako fakafoʻituitui ʻa e ngaahi sitepu takitaha ko ʻeni ʻe fitú.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

ʻOku fie tokoni ʻa Sisitā Sōnasi ki heʻene kau akó ke nau fakataha ʻi ha fanga kiʻi kulupu iiki ke aleaʻi ʻa e Mātiu 11:28–30. ʻOkú ne fokotuʻutuʻu ʻa e kalasí ki ha fanga kiʻi kulupu iiki ʻe tolu ʻo ha kau ako ʻe toko fā pea kole ki ha tokotaha ako ʻi he kulupu takitaha ke ne hoko ko e takí. ʻOkú ne ʻoange ki he kulupu takitaha ha laʻipepa ʻoku ʻi ai ʻa e ngaahi fakahinohinó mo talaange ʻoku nau maʻu ha miniti ʻe ono. ʻOku poupouʻi ʻe Sisitā Sōnasi ʻa e kau akó ke nau fevahevaheʻaki tauʻatāina. ʻI heʻene lue holó, te ne lava ʻo tala pe ʻoku muimui ʻa e kau akó ki he ngaahi fakahinohinó pea ʻokú ne fai ha ngaahi liliu ʻi he taimi ʻoku fiemaʻu aí.

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

Vakai ki ha lēsoni ka hoko mai pea kumi ha konga ai ʻokú ke fiemaʻu ke ngāue fakakulupu ai hoʻo kau akó. Vakai ki hoʻo tohi taliui fakakalasí pea vahevahe fakakulupu hoʻo kalasí. Fakapapauʻi ʻa e taumuʻa ʻo e ʻekitivitī ʻa e kulupú, ko hai ʻe hoko ko e kau taki ʻo e kulupú, mo e meʻa ʻokú ke loto ke nau faí.

Fakalaulauloto pe aleaʻi:

• Ko e hā ʻokú ke ako ʻe lava ʻo tokoni atu ke fakatupulaki ʻa e ola lelei ʻo e ngāue fakakulupu ʻi hoʻo kalasí?

Ko e hā ʻa e founga mo e taimi te u fakahoko ai ʻení?

Fakaʻaongaʻi ʻa e ʻekitivitī naʻá ke fakamatalaʻi ʻi ʻolungá, pe lolotonga hoʻo teuteuʻi ha lēsoni kehe ka hoko maí, fakapapauʻi ʻa e konga ʻi he lēsoní te ke lava ʻo fakaʻaongaʻi ai ʻa e taukei ko ʻení. Hokohoko atu hono fakaʻaongaʻi ʻo e ngaahi fakahinohino ʻi ʻolungá ʻi hoʻo palani ʻa e ngaahi ʻekitivitī ngāue fakakulupu ʻi hoʻo ngaahi lēsoní ʻi he tuʻo lahi totonú.