Fakaafeʻi ʻa e Ako Fakamātoató

Taukei: Fai ha ngaahi fehuʻi ʻe tokoni ki he kau akó ke nau sio ki he mahuʻinga ʻo ha tefitoʻi moʻoni ʻo e ongoongoleleí.

Ko e hā ʻeku ʻuluaki mahinó pe meʻa te u malavá? (Sivi)

Hiki ha fehuʻi ʻoku tokoni ke fakatupulaki ʻa e malava ʻa e tokotaha akó ke sio ki he mahuʻinga ʻo e moihū ʻi he temipalé.

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

ʻE lava ke tokoni hono fai ha ngaahi fehuʻi ʻe tokoni ki he kau akó ke nau ʻiloʻi hono mahuʻinga ʻo ha tefitoʻi moʻoni ʻo e ongoongoleleí ke nau ʻiloʻi ʻa e ʻuhinga ʻoku mahuʻinga ai kiate kinautolu ʻa e ngaahi moʻoni ʻoku nau akó. ʻI hoʻo teuteu ʻa e ngaahi lēsoní, fakakaukau ki he ngaahi fiemaʻu ʻa kinautolu ʻokú ke akoʻí pea fakakaukau ki he founga ʻe lava ke ʻuhingamālie mo ʻaonga ai ʻa e ngaahi moʻoni ʻi he folofolá ʻi honau ngaahi tūkungá. Ko e founga ʻe taha te ke lava ai ʻo tokoniʻi ʻa e kau akó ke nau sio ki he mahuʻinga ʻo e ngaahi moʻoni ʻoku nau ʻiló, ko hono fai ha ngaahi fehuʻi hangē ko ʻení:

• ʻE tokoniʻi fēfē koe ʻe he meʻá ni ʻi ha meʻa ʻokú ke aʻusia ʻi he taimí ni?

• Ko e hā ʻoku mahuʻinga ai ke ke ʻiloʻi ʻení?

• Ko e hā ha liliu te ne lava ʻo fakahoko ʻi hoʻo moʻuí?

(Ko e Faiako ‘i he Founga ‘a e Fakamoʻuí [2016], 23).

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

ʻI hono teuteuʻi ʻe Sisitā Lufikini ha aʻusia fakaako ki he tefitoʻi moʻoni ʻo e fakamolemolé, ʻokú ne fakakaukau ki he founga ʻe lava ke ʻaonga ai ʻa e tefitoʻi moʻoní ki he ngaahi tūkunga ʻo ʻene kau akó mo teuteuʻi ʻa e fehuʻi ko ʻení:

“ʻE tokoniʻi fēfē koe ʻe he kole pe maʻu ʻo e fakamolemolé ʻi ha meʻa ʻokú ke aʻusia ʻi he ʻahó ni?”

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako)

Hiki ha fehuʻi ʻokú ne fakatupulaki ʻa e malava ʻa e tokotaha akó ke vakai ki he felāveʻi mo e ngaahi tefitoʻi moʻoni ko ʻení:

• Fakafanongo mo muimui ki he ngaahi ueʻi ʻa e Laumālie Māʻoniʻoní

• Ko e Falala ki he ʻEikí

• Lotu fakaʻahó

Fakalaulauloto pe aleaʻi:

Ko e hā ha ngaahi lelei ʻokú ke vakai ki ai ʻi he aʻusia ʻa e tokotaha akó ʻi hoʻo ngāue ke ʻai ʻa e ngaahi tefitoʻi moʻoní ke felāveʻi mo kinautolú?

Ko e hā ʻa e founga mo e taimi te u fakahoko ai ʻení?

ʻI hoʻo teuteu ki he ngaahi lēsoni ka hokó, kumi ha ngaahi founga te ke lava ai ʻo fai ha ngaahi fehuʻi ʻe tokoni ki he kau akó ke nau sio ki heʻene fekauʻakí.