Fakaafeʻi ʻa e Ako Fakamātoató

Taukei: Poupouʻi ʻa e kau akó ke vahevahe ʻaki hano fakaafeʻi kinautolu ke tali ʻa e ngaahi fehuʻi ʻa honau kaungāakó.

Ko e hā ʻeku ʻuluaki mahinó pe meʻa te u malavá? (Sivi)

Ko e hā hono tuʻo lahi hoʻo fakaafeʻi hoʻo kau akó ke nau tali ʻa e fehuʻi ʻa ha kaungāako?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

ʻE lava ʻe hono fakaafeʻi ʻa e kau akó ke tali ʻa e ngaahi fehuʻi ʻa honau kaungāakó ʻo poupouʻi kinautolu ke nau vahevahe, ʻoange ha ngaahi faingamālie ke fakaʻaongaʻi ai ʻenau tuí, pea ke akoʻi kinautolu ʻe he Laumālie Māʻoniʻoní. ʻI he taimi ʻoku ʻohake ai ʻe ha tokotaha ako ha fehuʻi, ʻe lava ke fakaafeʻi ʻe ha faiako ʻa e kau ako kehé ke nau tali ʻaki haʻane fai ange ha ngaahi fehuʻi hangē ko ʻení:

• ʻE lava nai ʻe ha taha ʻo tali ʻa e fehuʻi naʻe fai ʻe Hōseá?

• Kalasi, te mou tali fēfē ʻa e fehuʻi ko ʻení?

• ʻOku ʻi ai nai ha taha ʻi he kalasí ʻoku ʻi ai haʻanau fakakaukau pe ʻilo fekauʻaki mo e fehuʻi ko ʻení?

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

Lolotonga ha fealeaʻaki fekauʻaki mo e ʻuhinga naʻe tāmateʻi ai ʻe Nīfai ʻa Lēpaní, naʻe ʻohake ʻe ha tokotaha ako ʻa e fehuʻi, “ʻIkai ʻoku maumauʻi ai ʻa e fekau ʻa e ʻOtuá ke ʻoua ʻe fakapoó?” ʻOku tali ʻa e faiakó ʻaki ʻene pehē: “Fakamālō atu ʻi hoʻo fai ʻa e fehuʻi ko iá. ʻOku ʻi ai ha taha ʻi he kalasí ʻokú ne maʻu ha ngaahi fakakaukau pe ʻilo fekauʻaki mo e fehuʻi ko ʻení?” ʻOku kiʻi longo ʻa e faiakó pea fakaʻatā ʻa kinautolu ʻoku hiki honau nimá ke fai ha tali.

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

Hiki ha fehuʻi te ke lava ʻo fai ke tali ai ʻe he kalasí ʻa e ngaahi fehuʻi ko ʻeni mei he kau akó:

• ʻOku ʻuhinga ki he hā ke toʻo kiate kitautolu ʻEne haʻamongá?

• Te u lava fēfē ʻo keinanga lelei ange ʻi he ngaahi folofola ʻa Kalaisí?

Fakalaulauloto pe aleaʻi:

• Ko e hā ʻokú ke ako ʻi hoʻo faʻu ha ngaahi fehuʻi ʻokú ne fakaafeʻi hoʻo kau akó ke nau tali ʻa e ngaahi fehuʻi ʻa honau kaungāakó?

• ʻOkú ke ongoʻi fēfē ʻi hono tali ʻe he kau akó ʻa e ngaahi fehuʻi ʻa honau kaungāakó ʻe fakatupulaki ai ʻa e akó ki hoʻo kau akó?

Ko e hā ʻa e founga mo e taimi te u fakakau ai ʻení?

ʻI hono fai ʻe he kau akó ha ngaahi fehuʻi ʻi he uike ní, fakaʻaongaʻi ʻa e meʻa kuó ke akó ke fakaafeʻi ʻa e kalasí ke nau tali, ʻo ka fiemaʻu.