Fakaafeʻi ʻa e Ako Fakamātoató

Taukei: ʻEke ki he kau akó ha ngaahi fehuʻi vakaiʻi.

Ko e hā ʻeku ʻuluaki mahinó pe meʻa te u malavá? (Sivi):

Hiki ha fehuʻi vakaiʻi ki he fakamatala ko ʻeni naʻe fai ʻe ha tokotaha ako ʻi hoʻo kalasí:

“ʻI he ʻaho ʻe tahá, naʻá ku lau ʻa e folofolá peá u ʻilo ai ha taha naʻe fuʻu fiemaʻu ke u fanongo ki ai.”

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

ʻOku fakaafeʻi ʻa e kau akó ʻi hono fai ʻo e ngaahi fehuʻi vakaiʻí ke nau vahevahe lahi ange fekauʻaki mo e meʻa ʻoku nau fakakaukau ki ai mo ongoʻí. ʻOkú ne fakaʻatā foki ʻa e faiakó ke kei tokanga taha pē ki he tokotaha akó pea ʻoange ki he kau akó ha faingamālie ke nau kau mai ʻi ha tuʻunga ʻoku loloto angé. ʻIkai ngata aí, ʻokú ne fakaafeʻi mai ʻa e fakahā mei he Laumālié, ki he tokotaha akó mo e faiakó fakatouʻosi. ʻI hoʻo fanongo ki ha fakamatala pe fehuʻi ʻa ha tokotaha akó, ko e founga ʻe taha ke teuteu ai ki ha fehuʻi vakaiʻí ko hoʻo fehuʻi pē kiate koe, “Ko e hā ʻoku ou fie ʻilo lahi ange ki aí?” (fekauʻaki mo e fakamatalá, fehuʻí, pe ko e tokotaha akó) pea fehuʻi ki he tokotaha akó fekauʻaki mo e meʻa ʻokú ke fie ʻiló. Ko ha ngaahi sīpinga ʻeni ʻe niʻihi ʻe lava ʻo tokoni atu ke ke kamata fai ha ngaahi fehuʻi vakaiʻi:

• “ʻE lava ke ke toe fai mai ha fakamatala lahi ange fekauʻaki mo e … ?”

• “Tokoni ke mahino lelei ange kiate kimautolu hoʻo ʻuhinga ki he … ?”

• “Ko e hā naʻá ke ako fekauʻaki mo e … ?”

• “Ko e hā haʻo fakakaukau … ?”

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

ʻI he vahevahe ʻe Uani ha aʻusia fekauʻaki mo ha lotu naʻe fai ʻe hono fāmilí, ʻoku ou fehuʻi loto pē, “Ko e hā mo ha toe meʻa ʻoku ou fie ʻilo fekauʻaki mo e aʻusia ʻa Uaní?” ʻI heʻeku fakafanongó, ʻoku ou fie ʻilo ki he meʻa naʻá ne ako fekauʻaki mo e Tamai Hēvaní ʻi he aʻusia ko iá, ko ia ʻoku ou fehuʻi ai, “Uani, ko e hā naʻá ke ako fekauʻaki mo e Tamai Hēvaní mei he aʻusia ko iá?”

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

ʻI hoʻo lau ʻa e ngaahi fakamatala ko ʻeni mei he kau akó ʻokú ke fehuʻi pē kiate koe, “Ko e hā ʻoku ou fie ʻilo lahi ange ki aí?” Hiki ha fehuʻi vakaiʻi te ke lava ʻo fai ki he tokotaha ako ko ʻení.

1. “ʻI he ʻaho ʻe tahá naʻá ku lau ʻa e folofolá peá u maʻu ai ha potufolofola naʻe fuʻu fiemaʻu ke u fanongo ki ai.”

2. “Te u ʻiloʻi fēfē ʻa e taimi ʻoku ou fakakaukau aí pe ko e taimi ʻoku folofola mai ai ʻa e Laumālie Māʻoniʻoní?”

3. “ʻOku fakamanatu mai ʻe he potufolofola ko ʻení ʻa e meʻa naʻe lea ʻaki ʻe Palesiteni Nalesoni fekauʻaki mo e hoko ko e kau faʻa fakaleleí.”

Fakalaulauloto pe aleaʻi:

Ko e hā ʻoku hoko ai hono fai ʻo e ngaahi fehuʻi vakaiʻí ko ha konga mahuʻinga ʻo e aʻusia fakaakó?

Fakafehoanaki ʻa e meʻa naʻá ke fai ʻi he kamataʻanga ʻo e siví mo e founga akoako naʻá ke toki fakakakató. Ko e hā ʻa e liliu ʻokú ke fakatokangaʻí?

Ko e hā ʻa e founga mo e taimi te u fakakau ai ʻení?

Fakaʻaongaʻi ʻa e meʻa kuó ke ako ʻi he ʻaho ní ʻaki haʻo tuku ha taimi ke fai ha ngaahi fehuʻi vakaiʻi ʻi hono vahevahe ʻe he kau akó ʻenau ngaahi aʻusiá mo koe ʻi he uike ka hoko maí.

Hiki ha palani ʻe tokoni atu ke ke akoako fakahoko ʻa e taukei ko ʻení ʻi he ʻaho kotoa pē ʻi he hokohoko atu ʻa e kalasí.