Tokangaʻi ʻo e Loki Akó

Taukei: Tokoniʻi ʻa e kau akó ke nau ʻiloʻi ʻa e ngaahi founga ke fakaleleiʻi ʻaki ʻenau tōmuí.

Ko e hā ʻeku ʻuluaki mahinó pe meʻa te u malavá? (Sivi)

Ko e hā te ke lava ʻo fai ke tokoniʻi ha tokotaha ako ke ne ʻiloʻi ʻene founga ke fakaleleiʻi ʻa e tōmuí?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

ʻI he taimi pē ʻoku mahino ai ki ha faiako ʻa e ʻuhinga ʻoku tōmui mai ai ha tokotaha ako ki he kalasí, te ne lava ʻo fakaafeʻi ʻa e tokotaha akó ke ne feinga ke ʻiloʻi ʻa e ngaahi founga ke haʻu ai ʻi he taimi totonú. Ko e founga ʻe taha ke fai ai ʻení ko hono fai ha ngaahi fehuʻi ʻokú ne fakaafeʻi ʻa e tokotaha akó ke ʻilo haʻanau founga pē ʻanautolu ke haʻu ai ʻi he taimi totonú. ʻE lava ke kau ʻa e ngaahi meʻá ni ʻi he ngaahi sīpinga ʻo e ngaahi fehuʻí:

• Te ke lava nai ʻo fakakaukau ki ha ngaahi meʻa te ne tokoniʻi koe ke ke haʻu ʻi he taimi totonu ki he kalasí?

• Ko e hā ha meʻa ʻe ua pe tolu te tau lava ʻo fai ke tokoniʻi koe ke ke haʻu vave ange ki he kalasí?

Kapau ʻoku ʻikai lava ʻa e kau akó ʻo fakakaukau ki ha faʻahinga founga fakaleleiʻi, ʻoku sai pē ke vahevahe ha ngaahi fakakaukau ʻe ua ke fakakaukau ai ʻa e kau akó pea fehuʻi ange pe ʻoku ʻaonga nai ha taha ʻo e ngaahi fakakaukau ko iá. ʻI he taimi ʻoku maʻu ai ʻe ha tokotaha ako ʻene ngaahi founga fakaleleiʻi pē ʻaʻaná, ʻoku ngalingali te nau loto-fiemālie ange ke fakaleleiʻi ʻenau taimi haʻu ki he kalasí.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

Lolotonga ha talanoa ʻa Sisitā ʻAlavalato mo Siale mo ʻiloʻi kuó ne tōmui koeʻuhí ko e mohe fuoloa ʻene tangataʻeikí, naʻá ne fehuʻi ange, “Siale, ʻoku ʻi ai nai ha meʻa te ke lava ʻo fai ke ke haʻu ai ʻi he taimi totonu ki he kalasí?”

ʻOku tali mai ʻe Siale, “Mahalo te u lava ʻo sio pe ʻe lava ʻe heʻeku faʻeé ʻo ʻomi au pe talanoa ki heʻeku tangataʻeikí fekauʻaki mo hono tokoniʻi au ke u aʻu mai ʻi he taimi totonu ki he kalasí.”

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

Hiki ha fehuʻi ke tokoni ki he kau ako ko ʻení ke nau maʻu ha ngaahi founga ke fakaleleiʻi ʻaki ʻa e tōmui ʻi he ngaahi tūkunga ko ʻení:

1. ʻOku ke ʻiloʻi ʻoku tōmui ʻa Kataliná koeʻuhí he ʻoku ngalo ʻiate ia ke fakamoʻui ʻene uasi tatangí ʻi he poʻulí.

2. ʻOkú ke ʻiloʻi ʻoku tōmui ʻa Seilomí koeʻuhí ʻoku ʻikai faʻa kamata ʻa e kalasí kae ʻoua kuo ʻosi ha miniti ʻe hongofulu mei he taimi ʻoku totonu ke kamata aí.

Fakalaulauloto pe aleaʻi:

Ko e hā ʻoku mahuʻinga ai ke tokoniʻi ʻa e kau akó ke nau ʻiloʻi ʻa e ngaahi founga ke fakaleleiʻi ʻaki ʻenau tōmuí?

Ko e hā ʻa e founga mo e taimi te u fakakau ai ʻení?

Fakakaukau ki ha tūkunga ʻi hoʻo kalasí ʻoku tōmui ai ha tokotaha ako. Hili hono ʻiloʻi ʻa e ʻuhinga ʻoku tōmui ai ʻa e tokotaha ako ko iá, fai ange ha fehuʻi ʻe tokoni ke nau ʻiloʻi ha founga ke fakaleleiʻi ʻaki ke nau haʻu ʻi he taimi totonú.