Tokangaʻi ʻo e Loki Akó

Taukei: Ko hono kole ki he kalasí pe ko ha taha ʻi he kalasí ke vahevahe ha poupou fakalaumālie ʻi ha fakataha lotu ʻi ha founga tokanga mo ha founga fakavaʻivaʻinga.

Talateu

“Ki ha tokolahi taha ʻo kitautolu ʻe lava ke kau ʻi he fakataha lotú ʻa e hivá, lotú, mo ha poupou fakalaumālie—ʻoku faʻa hoko ʻi he hokohoko ko iá” (Henry B. Eyring, “ʻThe Lord Will Multiply the Harvestʼ An Evening with Elder Henry B. Eyring,” Feb. 6, 1998).

Ko e hā ʻeku ʻuluaki mahinó pe meʻa te u malavá? (Sivi)

Hiki ha fakaafe te ke lava ʻo fai ke vahevahe ʻe ha tokotaha ako ha poupou fakalaumālie ki he fakataha lotú.

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

Ko e kole ki he kalasí pe ko ha taha ʻi he kalasí ke vahevahe ha potufolofola ko ha fakaafe ia ki ha tokotaha ako ke ngāue ʻi he tuí. Naʻe pehē ʻe Palesiteni Henelī B. ʻAealingi, “Kuo teuteu foki ʻe he ʻEikí ha founga ke fakalahi ai ʻa e ngaahi feinga ʻa ha tokotaha ako ʻoku tau kole ke ne fai ha poupou fakalaumālie. Te tau takitaha fai ia ʻi heʻetau founga pē ʻatautolú, ka te tau lava ʻo fakaafeʻi ha tokotaha ako ke ne fai ʻa e fakakaukau fakalaumālié ʻaki ha ngaahi lea peheni: ʻʻOku ou ʻiloʻi kuo ueʻi koe ʻe ha meʻa kuó ke lau ʻi he folofolá. Te ke lava nai ʻo lau mai ʻa e potufolofola ko iá kiate kimautolu mo talamai ʻa e meʻa naʻá ke ongoʻí?ʼ

“ʻI he taimi ʻoku fakahoko ai ʻa e fakaafe ko iá ʻi ha taimi lahi kimuʻa, ʻe kamata leva ha ngāue hokohoko mālohi. ʻE toe fakafanongo tokanga ange ʻa e tokotaha akó ki he ngaahi fanafana leʻo siʻi ko ia ʻa e Laumālié ʻi heʻene laú. ʻE fanongo leva ʻa e kau ako ʻi he loki akó ki ha meʻa lahi ange ʻi he ngaahi lea ʻo e folofolá pea te nau ongoʻi ʻo lahi ange ʻi he ongo ʻa e tokotaha ako ʻokú ne fai ʻa e poupou fakalaumālie ʻo e ʻaho ko iá. Kuo ʻosi akoʻi kinautolu ʻe he Laumālié kimuʻa pea tau toki kamata akoʻi ʻa e naunau fakalēsoní.”

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi ki he Folofolá):

“ʻEsitoni, ʻoku ou tui kuo ongo kiate koe ha potufolofola ʻi hoʻo lau ʻa e ngaahi konga folofola ʻoku fekauʻaki mo e Haʻu ʻo Muimui ʻIate Aú. Te ke loto-fiemālie nai ke lau ʻa e potufolofola ko iá ki he kalasí ʻapongipongi ko ha konga ʻo e fakataha lotú pea vahevahe hoʻo ongó?”

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako)

1. Hiki ʻa e founga te ke fakaafeʻi ai ʻa Kelea ko ha tokotaha ako lelei kae mā, ke vahevahe ha potufolofola ki ha fakataha lotu.

2. Fakakaukau ki he tokotaha ako hoko ʻi hoʻo kalasí te ke fakaafeʻi ke vahevahe ha poupou fakalaumālie ki ha fakataha lotu, hiki ʻa e founga te ke fakaafeʻi ai kinautolu ke nau fai iá.

Fakalaulauloto pe aleaʻi:

• ʻOkú ke pehē ko e hā ha liliu ʻe hoko ki he tokotaha ako ʻokú ne fai ʻa e fakataha lotú ʻi he kole ange ke ne vahevahe ha poupou fakalaumālié ʻi he foungá ni?

• ʻOkú ke pehē ko e hā ha liliu ʻe hoko ki he kalasí?

Ko e hā ʻa e founga mo e taimi te u fakakau ai ʻení?

Fakaʻaongaʻi ʻa e meʻa kuó ke akó ʻi he taimi hoko te ke fakaafeʻi ai ha tokotaha ako ke vahevahe ʻa e poupou fakalaumālie ki he fakataha lotú.

Fakapapauʻi ʻa e founga te ke hokohoko atu ai ke fakakau ʻa e taukei ko ʻení ʻi hoʻo kole ki he kau akó ke vahevahe ha poupou fakalaumālie ki he fakataha lotú.

Fiemaʻu Lahi Ange?

Henry B. Eyring, “ʻThe Lord Will Multiply the Harvest’ An Evening with Elder Henry B. Eyring,” 6 February 1998.

Ako Nounou ki hono Tokangaʻi ʻo e Loki Akó: Ko hono kole ki ha taha ʻi he kalasí ke ne fai ʻa e fua lotú ʻi ha fakataha lotu ʻi ha founga tokanga mo ha founga fakavaʻivaʻingá.

Ako Nounou ki hono Tokangaʻi ʻo e Loki Akó: Ko hono kole ki he kalasí pe ko ha taha ʻi he kalasí ke ne feinga ke ʻiloʻi ha himi ke hivaʻi ʻi ha fakataha lotu ʻi ha founga tokanga mo ha founga fakavaʻivaʻingá.