Tokangaʻi ʻo e Loki Akó

Taukei: Fakamatalaʻi ki he kau akó pe ko e hā ʻa e fakataha lotu mo e ʻuhinga ʻoku tau fakahoko ai kinautolú.

Ko e hā ʻeku ʻuluaki mahinó pe meʻa te u malavá? (Sivi):

ʻI he meʻafua 1–5, ʻokú ke pehē ʻoku mahino lelei fēfē ki hoʻo kau akó ʻa e ʻuhinga ʻoku fakahoko ai haʻanau fakataha lotu ʻi he kalasi takitahá?

Ko e hā ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

ʻI he kamataʻanga ʻo e teemi kotoa pē pe ʻi he taimi ʻoku ongoʻi ai ʻe he faiakó ʻoku fiemaʻú, ʻe tokoni ke fakamatalaʻi ki he kau akó ʻa e ʻuhinga ʻo e fakataha lotú pea mo e ʻuhinga ʻoku tau fakahoko ai kinautolú. ʻI he lea faka-Pilitāniá, ko e lea tefito ki he fakataha lotú ko e līʻoa. ʻOku ʻuhinga ʻa e līʻoá ke vaheʻi ha meʻa ki ha ngāue pe taumuʻa pau. Ko e fakataha lotú ko ha ngāue ia ʻoku tau tuku līʻoa ai hotau taimi ʻi he kalasí ki he ʻOtuá.

Ngaahi ʻuhinga ke kamata ʻaki ha fakataha lotú:

• ʻOku fakaafeʻi ʻe he konga takitaha ʻo e fakataha lotú ʻa e Laumālie ʻo e ʻEikí ki he kalasí.

• ʻOkú ne poupouʻi ʻa e mateuteu ʻa e tokotaha akó mo fakaafeʻi ʻa e ako fakamātoató.

• ʻOkú ne teuteuʻi ʻa e kau akó ki he tuʻunga fakatakimuʻá mo e ngaahi fatongia kehe ʻi he Siasí.

• ʻOkú ne fakamanatu ki he kalasí ʻoku ʻikai ko e taimi ko ʻení maʻanautolu ka kuo tuku līʻoa ia kiate Ia.

ʻOku totonu ke kamata ʻa e ngaahi kalasi seminelí mo e ʻinisititiutí ʻaki ha fakataha lotu. ʻOku faʻa kau ai ha himi ʻoku hivaʻi ʻe he kalasí, ko ha lotu, mo ha fakakaukau fakalaumālie ʻoku makatuʻunga ʻi he folofolá pe ngaahi lea ʻa e kau palōfitá. ʻOku fakaafeʻi ʻa e kau akó ke nau kau ʻi he konga takitaha ʻo e fakataha lotú: tā ʻo e himí, hoko ko ha faihiva ki he himí, fai ʻo e ngaahi lotú, mo vahevahe ʻa e fakakaukau fakalaumālié. ʻOku tokoni foki ke tuku ki he kau akó ke nau tataki ʻa e fakataha lotú.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

“Kalasi, te u fakamatalaʻi atu ʻi he ngaahi miniti siʻi ka hokó ʻa e founga te tau kamata ʻaki ʻa e seminelí ʻi he ʻaho takitaha. ʻOku kamata ʻa e seminelí ʻaki ha fakataha lotu. ʻI he lea faka-Pilitāniá, ko e lea tefito ki he fakataha lotú ko e līʻoa. ʻOku ʻuhinga ʻa e līʻoá ke vaheʻi ha meʻa ki ha ngāue pe taumuʻa pau. Ko e fakataha lotú ko ha ngāue ia ʻoku tau tuku līʻoa ai hotau taimi ʻi he kalasí ki he ʻOtuá. ʻOku kau ʻi he fakataha lotú ha himi, ko ha lotu, mo ha fakakaukau fakalaumālie ʻoku fai ʻe ha tokotaha ako. Ko e fakataha lotú ko e taha ia ʻo e ngaahi meʻa lelei taha te tau lava ʻo fai ke fakaafeʻi ai ʻa e Laumālie Māʻoniʻoní ke ʻiate kitautolu ʻi he kalasi takitaha.”

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

Hiki ʻa e meʻa te ke lea ʻaki ke tokoni ke mahino ki hoʻo kau akó ʻa e ʻuhinga ʻo e fakataha lotú mo e ʻuhinga ʻoku mahuʻinga ai ke kamata ʻa e kalasí ʻaki iá. Mahalo te ke fie akoako vahevahe ia mo ha taha kimuʻa peá ke toki fakamatalaʻi ia ki he kalasí.

Fakalaulauloto pe aleaʻi:

Ko e hā mo ha toe ngaahi lelei kuó ke maʻu ʻi hono kamataʻi ʻo e kalasi takitaha ʻaki ha fakataha lotú?

Ko e hā ʻa e founga mo e taimi te u fakahoko ai ʻení?

ʻI he uike ka hokó, tuku ha taimi ke tokoni ke mahino ki he kau akó ʻa e ʻuhinga ʻo e fakataha lotú mo e ʻuhinga ʻokú ke fakahoko ai kinautolu ʻi hoʻo kamata ʻa e kalasi takitahá.

Te ke lava foki ʻo fakakau ha taha pe lahi ange ʻo e ngaahi meʻá ni:

• Fakaafeʻi ʻa e kau akó ke vahevahe ʻa e ʻuhinga ʻoku nau pehē ai ʻoku ʻaonga ke kamata ʻa e kalasí ʻaki ha fakataha lotú.

• ʻAi ke ʻomi ʻe he kau ako matuʻotuʻa angé ha ngaahi sīpinga ʻo hono fai ʻo e fakakaukau fakalaumālié.

• Fakaafeʻi ʻa e kau ako matuʻotuʻa angé ke vahevahe ʻa e founga kuo hoko ai hono kamataʻi ʻo e kalasí ʻaki ha fakataha lotú ko ha tāpuaki kiate kinautolú.