Tokangaʻi ʻo e Loki Akó

Fakamatala Fakahinohinó: Ko hono fili mo fokotuʻutuʻu ʻo e kau taki ʻa e fānau akó ʻi he seminelí.

“ʻE lava ke fili ʻe ha faiako semineli ha kau ʻōfisa fakakalasi, hangē ko ha palesiteni, ongo tokoni palesiteni, pea mo ha sekelitali. ʻE ʻuluaki fetuʻutaki ʻa e faiakó ki he ongomātuʻa pea mo e pīsope ʻa e fānau ako takitaha ke maʻu ha fakangofua. ʻE fakahā ʻe he faiakó ʻa e kau ʻōfisá ʻi he kalasí, ka he ʻikai hikinimaʻi pe vaheʻi kinautolu. Te nau lava ʻo tokoni ki he faiakó ʻi he ngaahi fatongia angamaheni ʻi he loki akó pea poupouʻi ʻa e toenga ʻo e fānau akó ke nau maʻuako mo kau mai” (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 15.1.4 ʻi he ʻaho 28 ʻo ʻAokosi 2023). Ke tokoni ke fakaloloto ʻa e ului ʻa e kau akó kia Sīsū Kalaisí, ʻe ala tokoni ʻa e kau taki ʻo e fānau ako seminelí ki he kau faiakó ʻi hono fakahoko ʻa e ngaahi meʻá ni:

• Tauhi ha laumālie totonu ʻi he kalasí.

• Poupouʻi ʻa e lesisita mo e maʻu kalasi ʻi he ngaahi kalasi seminelí.

• Fokotuʻu ha ngaahi tukufakaholo lelei.

ʻE lava ke fakatou ngāue ʻa e fānau ako tangata mo fefiné ʻi ha faʻahinga tuʻunga pē ko ha kau ʻōfisa fakakalasi.

ʻOku ola lelei taha ʻa e kau ʻōfisa fakakalasí ʻi he taimi ʻoku fakataukeiʻi mo akoʻi ai kinautolu fekauʻaki mo honau ngaahi fatongia ʻi he kamataʻangá pea ʻi he kotoa ʻo ʻenau ngaahi ngāué. ʻE lava ke fai ʻeni lolotonga ha fakataha nounou fakakulupu mo e faiakó ʻo fakahoko ʻi he taimi pē ko iá kimuʻa pe ʻi he ʻosi ʻa e kalasí pe ko hano vahevahe fakalelei ha lisi ʻo ʻenau ngaahi ngāué, ngaahi fatongiá, mo e ngaahi ngafá. ʻE tokoni foki ʻa e fealeaʻaki maʻu pē ʻi he vahaʻa ʻo e faiakó mo e kau ʻōfisa fakakalasí.

ʻE lava ke liliu maʻu pē ʻa e kau ʻōfisa fakakalasí ʻi he lolotonga ʻo e taʻu fakaakó ʻi he ngaahi mālōlō fakatēmí ke fakaʻatā ha kau ako tokolahi ange ke nau maʻu ʻa e faingamālie ke tokoní.

ʻOku totonu ke toutou fakahīkihikiʻi mo fakamālōʻiaʻi maʻu pē ʻe he kau faiakó ʻa e kau ʻōfisa fakakalasí ʻi heʻenau ngaahi ngāué.

ʻE lava ke fakaʻaongaʻi ʻa e kau ʻōfisa fakakalasí ʻi ha ngaahi founga kehekehe ke fakatupulaki ʻa e aʻusia ʻa e tokotaha akó ʻi he kalasí. Ko ha lisi ʻeni ʻo e ngaahi founga ʻe lava ke fakaʻaongaʻí:

• Talitali lelei ʻa e toenga ʻo e kau akó ki he kalasí.

• Tataki ʻa e kalasí.

• Poupouʻi ʻa e kalasí ke nau kamata ʻi he taimi totonu.

• Ngaahi fakataha lotú—tokoni ʻi he fokotuʻutuʻú, fakataimi-tēpileʻí, mo e ngaahi fakamanatú.

• Fakamanatu ki he kau ako kehé fekauʻaki mo e ngaahi meʻa mahuʻinga ʻoku hoko ʻi he kalasí, ngaahi ngāué, teuteú, mo hono muimuiʻí.

• Fakataukei fakatokāteliné.

• Ngāue fakaetauhi ki he kau ako kehé.

• Fokotuʻu taumuʻá mo e ngaahi fakamanatú/poupoú.

• Tā ha sīpinga lelei.

• Lotua ke nau ʻiloʻi ʻiate kinautolu pē ʻa e founga ke ngāue maʻá e kau mēmipa ʻo e kalasí pea mo e ʻEikí.

Tūkunga—ʻE Founga Fēfē:

Kamataʻanga ʻo e taʻú:

ʻI he fakaʻosinga ʻo e ʻuluaki uike ʻo ha taʻu fakaako foʻou, kuo ʻiloʻi ʻe Sisitā Lōsasi ʻi he faʻa lotu ha fānau ako ʻe toko tolu ʻokú ne ongoʻi te nau hoko ko ha kau taki lelei ʻo e kalasí: ʻIsapela Kelemeni ko e palesiteni fakakalasi, Sēkope Sāmita ko e tokoni palesiteni, mo Sala ʻApalā ko e sekelitali. ʻOkú ne telefoni ki heʻenau mātuʻá mo e kau pīsopé takitaha ke maʻu ha fakangofua ke kole ki he fānau akó ke nau tali ʻa e ngaahi ngāue kuo vahe angé.

Fetuʻutaki ki he mātuʻá mo e kau pīsopé:

ʻOku telefoni ʻa Sisitā Lōsasi ki he faʻē ʻa ʻIsapelá ʻo pehē ange, “Mālo ʻetau toe maʻu ki he hoʻataá ni, Sisitā Kelemeni. Ko Sisitā Lōsasi au, ko e faiako semineli ʻa ʻIsapelá. Kuó u ongoʻi ke kole ange ke ne hoko ko e palesiteni ʻo ʻemau kalasí ki he teemi ʻuluakí. ʻE fiemaʻu heni ke ʻi ai hono fanga kiʻi fatongia ʻi heʻemau kalasí ʻi he lolotonga ʻo e kalasi takitaha. ʻOkú ke ongoʻi fiemālie nai ʻi heʻeku kole kia ʻIsapela ke fakahoko ʻa e fatongiá ni?” ʻOkú ne fakahoko ha ngaahi fepōtalanoaʻaki tatau mo e ongomātuʻa ʻa Sēkope mo Salá pea mo ʻena ongo pīsopé takitaha.

Fakaafé mo e Akó:

Hili hono tali ʻe he mātuʻa mo e pīsope takitaha, ʻoku fokotuʻu leva ʻe Sisitā Lōsasi ha taimi lolotonga ʻo e kalasi hokó ke ngāue ai ʻa e kau akó ʻi ha ngāue kuo vahe ange mo hanau hoa. Lolotonga ʻo e taimi ko ʻení, ʻokú ne kole kia ʻIsapela, Sēkope, mo Sala ke nau hū taha taha ki he holó ke fakaafeʻi kinautolu ke nau hoko ko ha kau ʻōfisa fakakalasi, pea ʻoku ʻoange ha fakamatala fakapepa ʻoku ʻi ai ha ngaahi fatongia kiate kinautolu ke nau ako. ʻOkú ne fakaafeʻi leva ʻa e kau ako ʻe toko tolú ke nau haʻu ki he kalasi hokó ʻi ha miniti ʻe 15 kimuʻa koeʻuhí ke nau lava ʻo aleaʻi ʻa e ngaahi fatongiá mo tali ha faʻahinga fehuʻi pē.

ʻOku aʻu mai ʻa e kau ʻōfisa ʻo e kalasí ʻi ha miniti ʻe 15 kimuʻa ʻi he kalasi hokó, pea nau aleaʻi ʻa e fakamatala fakapepa naʻa nau maʻú pea ʻeke ange kia Sisitā Lōsasi ʻa e ngaahi fehuʻi ʻoku nau maʻu fekauʻaki mo ʻenau ngaahi ngāué. ʻOku kole ange ʻe Sisitā Lōsasi kia ʻIsapela ke ne tataki ʻa e kalasi ʻo e ʻaho ní pea ʻoange ha lisi ʻo ha ngaahi meʻa mahuʻinga ke aleaʻi ke tokoni ki he aʻusiá.

ʻUluaki kalasi hili ʻa e akó:

Hili ʻenau fakataha ako nounoú, ʻoku fakahā ʻe Sisitā Lōsasi ko ʻIsapela, Sēkope, mo Salá ko ha kau ʻōfisa fakakalasi kinautolu. ʻI heʻene fakahaaʻi kinautolu ki he toenga ʻo e kau akó, ʻokú ne fakamatalaʻi nounou honau fatongiá pea ʻoange leva ʻa e taimí kia ʻIsapela ke kamata ʻa e kalasí ʻaki ʻa e ngaahi fanongonongó mo e fakataha lotú.

ʻI he kotoa ʻo e tēmí:

ʻOku kumi maʻu pē ʻe Sisitā Lōsasi ha ngaahi founga ke fakamālō ai ki he kau ʻōfisa ʻo e kalasí mo hokohoko atu hono akoʻi kinautolu lolotonga ʻa e ngaahi fakataha nounou kimuʻa mo e hili ʻa e kalasí. ʻOku fakaʻau ke fiemālie ʻa e kau ʻōfisa ʻo e kalasí ʻi honau ngaahi fatongiá, pea ʻoku nau fakahoko lelei kinautolu. ʻOku nau taufetongi ʻi hono talitali lelei ʻo e kau akó ki he kalasí mo hono kamata ʻo e kalasí. ʻOku fakahoko ʻe Sala ha ngāue lelei ʻo fakamanatu ki he kau ako kehé ʻa e taimi ke nau fakahoko ai ʻa e fakataha lotú. ʻOku feinga mālohi ʻa Sēkope ke fakapapauʻi ʻoku ongoʻi ʻe he tokotaha kotoa ʻoku talitali lelei mo fiemaʻu kinautolu. ʻOku faʻa vahevahe ʻe ʻIsapela ha ngaahi meʻa mei heʻene ako folofola fakatāutahá mo poupouʻi hono kaungāakó ke hokohoko atu ʻenau ngāueʻi ʻenau ngaahi taumuʻa akó. ʻI he taimi ʻe niʻihi ʻoku ʻoange ʻe he kau ʻōfisa ʻo e kalasí ha ngaahi fokotuʻu kia Sisitā Lōsasi fekauʻaki mo e founga ʻe lava ke fakalakalaka ai ʻa e kalasí pe ko e taimi ʻoku nau fakatokangaʻi ai ha tokotaha ako ʻoku faingataʻaʻia. ʻOku nau fekumi foki ʻi he faʻa lotu ki ha ngaahi founga ke fakakaungāmeʻa mo tokoniʻi ai honau kaungāakó.

ʻI he fakaʻosinga ʻo e tēmí:

ʻOku fakakaukau ʻa Sisitā Lōsasi ke fokotuʻu ha kau ʻōfisa foʻou ʻo e kalasí ke ʻoange ai ha faingamālie ki he kau ako kehé ke nau taki. ʻOkú ne muimui ʻi he founga tatau pē kimuʻá ke fakaafeʻi ha kau ako foʻou ʻe toko tolu ke nau hoko ko e kau ʻōfisa fakakalasi ki he teemi hokó. Lolotonga ʻo e kalasi fakaʻosi ʻo e tēmí, ʻoku ui ʻe Sisitā Lōsasi ʻa ʻIsapela, Sēkope, mo Sala ki muʻa ʻi he kalasí pea fakamālō ange ʻi heʻenau ngaahi ngāué. ʻOkú ne fakafeʻiloaki leva ʻa e kau ʻōfisa foʻou ʻo e kalasí ki he teemi ka hokó.