Tokangaʻi ʻo e Loki Akó

Taukei: Ko hono fai ha ngaahi fehuʻi ke mahino ʻa e ngaahi ʻuhinga ʻoku tōmui ai ha tokotaha akó.

Ko e hā ʻeku ʻuluaki mahinó pe meʻa te u malavá? (Sivi)

ʻI he taimi ʻoku kamata ke hā mai mei ha tokotaha ako ha sīpinga ʻo e aʻu tōmui ki he kalasí, ko e hā te ke lava ʻo fai ʻi hoʻo hoko ko e faiakó ke tokoni ʻi he meʻa ʻoku hokó?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

ʻI he taimi ʻoku tōmui mai ai ha tokotaha ako ki he kalasí, ʻoku mahuʻinga ke fai ʻe he kau faiakó ha ngaahi fehuʻi ke mahino lelei ange hono ʻuhingá. ʻOku totonu ke kumi ʻe he faiakó ha taimi ke talanoa fakafoʻituitui ai mo e tokotaha akó ke ʻiloʻi ʻa e ʻuhinga ʻoku tōmui ai ʻa e tokotaha akó. ʻI hono ʻiloʻi ʻa e ʻuhinga ʻoku tōmui ai ʻa e tokotaha akó, ʻokú ne fakaʻatā ai ʻa e faiakó mo e tokotaha akó ke na kamata mei ha mahino tatau ʻi hono fakakaukauʻi ha ngaahi founga ke fakaleleiʻi ʻakí. Ko ha ngaahi fehuʻi ʻeni ʻe lava ke fai ʻe ha faiako:

• Kuó u fakatokangaʻi ʻokú ke tōmui mai ki he kalasí. Te ke lava ʻo tokoni mai ke mahino kiate au ʻa e meʻa ʻokú ne ʻai koe ke ke tōmuí?

• ʻOku ʻi ai nai ha meʻa ʻokú ne ʻai ke faingataʻa ke ke aʻu taimi totonu mai?

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

Kuo aʻu tōmui atu ʻeni ʻa Makeleta ki he kalasí ʻi ha ʻaho ʻe tolu. ʻOku kole ange ʻe Brother Tate kia Makeleta ke nofo hifo ʻi ha miniti ʻe ua hili ʻa e ʻosi ʻa e kalasí. ʻOku fakahaaʻi ange ʻe Brother Tate ʻene houngaʻia ʻi he haʻu ʻa Makeleta ki he kalasí peá ne fehuʻi ange, “ʻOku ʻi ai nai ha meʻa ʻokú ne fakafaingataʻaʻiaʻi hoʻo aʻu mai ʻi he taimi totonu ki he kalasí?”

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

Fakakaukau ki ha tokotaha ako kuo fāifeinga ke aʻu mai ʻi he taimi totonu. Hiki ha fehuʻi te ke lava ʻo fai ange ke tokoni ke mahino kiate koe ʻa e ʻuhingá.

Fakalaulauloto pe aleaʻi:

ʻOkú ke pehē ko e hā ʻoku mahuʻinga ai ke maʻu ʻe ha tokotaha ako ʻa e faingamālie ke vahevahe mo koe ʻa e ʻuhinga ʻoku nau tōmui aí?

Ko e hā ʻa e founga mo e taimi te u fakahoko ai ʻení?

Kumi ha taimi ke ke ʻalu ai ki he tokotaha ako naʻá ke fakakaukau ki ai ʻi he akoako ʻi ʻolungá pea ʻeke ange ʻa e fehuʻi naʻá ke hikí ke tokoni ke mahino kiate koe ʻa e ʻuhingá.