Fakaafeʻi ʻa e Ako Fakamātoató

Taukei: ʻAi ke ʻilo ʻe he kau akó ʻoku ʻi ai honau taimi ke nau fakakaukau ai ki ha tali ʻi he taimi ʻoku fai ai ha fehuʻí.

Ko e hā ʻeku ʻuluaki mahinó pe meʻa te u malavá? (Sivi)

Ko e hā hono tuʻo lahi hoʻo talaange ki hoʻo kau akó te ke ʻoange ha taimi ke nau fakakaukauʻi ai ha fehuʻi kimuʻa pea nau toki talí?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

Ko hono ʻai ke ʻilo ʻe he kau akó ʻoku ʻi ai honau taimi ke nau fakakaukau ai ki ha tali kimuʻa pea nau vahevahé, ko ha founga ia ʻe taha ke poupouʻi ai ha ngaahi tali lelei ange ʻi he taimi ʻoku fai ai ha ngaahi fehuʻí. ʻOku nau maʻu heni ha taimi ke fakakaukau, teuteu, mo maʻu ha ngaahi ueʻi mei he Laumālie Māʻoniʻoní. ʻOkú ne toʻo foki ʻa e meʻa ʻe ala ui ʻe he kau ako ʻe niʻihi ko e “lōngonoa taʻefakafiemālié.” Ko e taimi pē ʻoku fai ai ha fehuʻí, ʻe lava ke ʻai ʻe he faiakó ke ʻiloʻi ʻe he kau akó te nau maʻu ha taimi pau ke fakakaukauʻi ai ʻa e fehuʻí kimuʻa pea nau toki vahevahe ʻenau ngaahi fakakaukaú mo e ongó.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

Ko ha ngaahi sīpinga ʻeni ʻe niʻihi ʻo e meʻa ʻe lava ke lea ʻaki ʻe ha faiakó:

• “Kimuʻa peá ke tali ʻa e fehuʻi ko ʻení, kiʻi taimi siʻi hifo ke ke fakakaukau ki ai.”

• “Kātaki ʻo fakalaulauloto ki he fehuʻi ko ʻení ʻi ha miniti ʻe ua pea teuteu ke vahevahe mo e tokotaha ʻokú ke tangutu mo iá.”

• “Kātaki ʻo tuku ha kiʻi taimi ke ke fakakaukau ai ki he founga te ke tali ʻaki ʻa e fehuʻi ko ʻení.”

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako)

Hiki ha fakamatala ʻokú ne ʻai ke ʻilo ʻe hoʻo kau akó ʻoku ʻi ai honau taimi ke teuteu ai ha tali ki he ngaahi fehuʻi takitaha ko ʻeni ʻoku fai angé:

1. Ko e fē ha taimi kuó ke ongoʻi ai ʻa e ʻofa ʻa e ʻOtuá ʻi hoʻo moʻuí?

2. Ko e hā ʻene ʻuhinga kiate koe ke “falala ki he ʻEikí ʻaki ho lotó kotoa”?

3. ʻOku tokoniʻi fēfē koe ʻe he tefitoʻi moʻoni ko ʻení ke ke haʻu kia Sīsū Kalaisí?

Fakalaulauloto pe aleaʻi:

ʻI hoʻo lava hono akoako fakahoko ʻa e taukei ko ʻení, ʻokú ke pehē ko e hā ʻoku mahuʻinga ai ke ʻiloʻi ʻe hoʻo kau akó ʻi he taimi ʻe niʻihi ʻoku ʻi ai ha taimi ke nau fakalaulauloto ai ki ha fehuʻi kimuʻa pea nau toki tali?

Ko e hā ʻa e founga mo e taimi te u fakakau ai ʻení?

Fakakaukau ki he ngaahi fehuʻi te ke fai ʻi he ngaahi lēsoni ka hokó pea fakapapauʻi pe ko e fē ʻa e ngaahi fehuʻi te ke talaange ki he kau akó ʻoku ʻi ai honau taimi ke fakalaulauloto ki ai kimuʻa pea nau talí.