Ngaahi Taumuʻa ki he Ako Folofolá

Taukei: Fakaafeʻi ʻa e kau akó ke nau feinga ke ʻiloʻi mo fakaʻaongaʻi ʻa e ngaahi fakaafe mo e talaʻofa mei he Fakaafe Fakataautaha ʻa Palesiteni Nalesoni ke ʻAlu ki he Seminelí pe Fakaafe Fakataautaha ke ʻAlu ki he ʻInisititiutí ke tataki kinautolu ʻi hono fokotuʻu ha taumuʻa ako folofola fakataautaha ʻoku mahuʻingamālie.

Ko e hā ʻeku ʻuluaki mahinó pe meʻa te u malavá? (Sivi):

Kuó ke fakaʻaongaʻi fēfē pe te ke fakaʻaongaʻi fēfē ʻa e Fakaafe Fakataautaha ke ʻAlu ki he Seminelí pe ʻInisititiutí ʻa Palesiteni Nalesoní ke tokoni ki hoʻo kau akó ke fokotuʻu ha taumuʻa ako folofola ʻoku mahuʻingamālie?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

Kuo toutou akoʻi mai ʻe he ʻEikí ʻo fakafou ʻi Heʻene kau palōfitá, ʻa e mahuʻinga hono ako ʻEne folofolá. ʻE lava ke tokoni hono tokoniʻi ʻo e kau akó ke nau ʻiloʻi ʻa e ngaahi fakaafe mo e ngaahi tāpuaki kuo talaʻofa mai ʻe he kau palōfita ʻo e kuonga muʻá mo onopōní ke nau ʻiloʻi ʻa e ngaahi tāpuaki te nau fiemaʻú mo fakatupulaki ʻenau holi ke ako ʻa e folofolá. Ko e founga ʻe taha ke fai ai ʻení ko hono fakaafeʻi ʻa e kau akó ke nau ʻiloʻi mo fakaʻaongaʻi ʻa e ngaahi fakaafe mo e talaʻofa ʻo e ako folofola naʻe fai ʻe Palesiteni Nalesoní ʻi heʻene Fakaafe Fakataautaha ke ʻAlu ki he Seminelí (Russell M. Nelson, “Fakaafe Fakataautaha ke ʻAlu ki he Seminelí,” ChurchofJesusChrist.org) pe Fakaafe Fakataautaha ke ʻAlu ki he ʻInisititiutí (Russell M. Nelson, “Fakaafe Fakataautaha ke ʻAlu ki he ʻInisititiutí,” ChurchofJesusChrist.org). pea fakaʻaongaʻi ia ko ha fakahinohino ʻi hono fokotuʻu ha taumuʻa ako folofola fakataautaha ʻoku mahuʻingamālie. Hili hono fakamanatu ki he kau akó ko ha konga mahuʻinga ʻo ʻenau aʻusia ʻi he seminelí pe ʻinisititiutí ko hono fokotuʻu mo ngāueʻi ha taumuʻa ako folofola fakataautaha ʻoku mahuʻingamālié, te ke lava ʻo

• tuku ki he kau akó ke nau lau pe mamata ʻi he Fakaafe Fakataautaha ke ʻAlu ki he Seminelí pe ʻInisititiutí ʻa Palesiteni Nalesoní ʻo kumi ʻa e ngaahi fakaafe mo e ngaahi tāpuaki ʻoku fekauʻaki mo e ako folofolá;

• Tuku ke vahevahe ʻe he kau akó ʻa e meʻa naʻa nau maʻú; pea

• fakaafeʻi ʻa e kau akó ke nau fekumi ki he fakahinohino ʻa e Laumālié ke ʻiloʻi ʻenau taumuʻa fakatāutahá ʻa ia ʻe tokoni kiate kinautolu ke nau ngāue ke maʻu ʻa e ngaahi tāpuaki kuo talaʻofa mai ʻoku nau fiemaʻú.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

Hili hono fakamanatu ki heʻene kau akó ko e meʻa mahuʻinga mo mālohi ʻe taha te nau lava ʻo toʻo mei heʻenau aʻusia ʻi he seminelí ko hono fakatupulaki ha ʻulungaanga ʻo hono ako ʻo e folofolá, ʻoku fakamamafaʻi ange ʻe Brother Meiā ʻa e mahuʻinga hono fokotuʻu ha taumuʻa ako folofolá. ʻOkú ne ʻoange leva ki heʻene kau akó ha tatau ʻo e fakamatala mei he Fakaafe Fakataautaha ke ʻAlu ki he Seminelí ʻa Palesiteni Nalesoní. ʻOkú ne fakaafeʻi kinautolu ke nau kumi mo fakaʻilongaʻi ʻa e ngaahi fakaafe mo e ngaahi tāpuaki ʻoku fekauʻaki mo e ako folofolá ʻi heʻenau mamata ʻi he vitiō ʻo e pōpoakí. Hili ʻa e vitioó, ʻoku kole ʻe Brother Meiā ki heʻene kau akó ke vahevahe ʻa e meʻa naʻa nau fakaʻilongaʻí mo ha fakaafe pe talaʻofa naʻe makehe kiate kinautolú. ʻOkú ne fakaafeʻi leva kinautolu ke tuku ha kiʻi taimi ʻi he ʻaho ʻe taha pe ua hono hokó ke nau fekumi ʻi he faʻa lotu ki he fakahinohino ʻa e Laumālié ke nau ʻiloʻi ʻa e taumuʻa ako folofola fakataautaha te nau lava ʻo fokotuʻu ʻa ia te ne tokoniʻi kinautolu ke nau ngāue ke maʻu ʻa e (ngaahi) tāpuaki kuo talaʻofa mai ʻa ia ʻoku nau fakaʻamuá.

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

Hiki ʻa e ngaahi meʻa takitaha ko ʻení:

• Ko ha fehuʻi, fakakaukau, pe kupuʻi lea te ke lava ʻo fakaʻaongaʻi ke fakamanatu ki hoʻo kau akó ʻa e mahuʻinga ʻo hono fokotuʻu mo ngāueʻi ha taumuʻa ako folofola fakataautaha.

• Ko ha fakaafe te ke lava ʻo fakaʻaongaʻi ke tokoni ki hoʻo kau akó ke nau ʻiloʻi ʻa e ngaahi fakaafe mo e ngaahi talaʻofa ʻoku fekauʻaki mo e ako folofolá ʻi heʻenau toe vakaiʻi ʻa e pōpoaki ʻa Palesiteni Nalesoní.

• Ko ha fakaafe pe ʻekitivitī te ke lava ʻo fakaʻaongaʻi ke tokoni ki hoʻo kau akó ke vahevahe mo aleaʻi ʻa e meʻa naʻa nau akó.

• Ko ha fakaafe ke fekumi ki he fakahinohino ʻa e Laumālié ʻi hono fokotuʻu ʻenau taumuʻa ako folofola fakatāutahá.

Fakalaulauloto pe aleaʻi:

• Ko e hā naʻá ke ako ʻi hoʻo faʻu ʻa e ngaahi fakaafe ʻi ʻolungá?

• Ko e hā ha ola ʻokú ke ongoʻi ʻe hoko ʻi hoʻo kau akó ʻi hono ʻoange kiate kinautolu ʻa e faingamālie ke toe vakaiʻi ʻa e pōpoaki ʻa Palesiteni Nalesoní ʻi he founga ko ʻení?

Ko e hā ʻa e founga mo e taimi te u fakakau ai ʻení?

ʻI he uike ka hokó, fakaʻaongaʻi ʻa e ʻekitivitī naʻá ke faʻú (pe ha ʻekitivitī tatau) ke tokoni ki hoʻo kau akó ke fokotuʻu ha taumuʻa ako folofola ʻoku mahuʻingamālie. (ʻE faingofua pē hano liliu ʻeni ke poupouʻi ʻa e kau akó ke nau fakakaukau, vakaiʻi, pe poupouʻi kinautolu ke nau ngāueʻi ha taumuʻa kuo nau ʻosi fokotuʻu.)