Ngaahi Taumuʻa ki he Ako Folofolá

Taukei: Fakaafeʻi ʻa e kau akó ke nau lau ʻa e ngaahi lea ʻa e kau palōfita ʻo e kuonga muʻá mo onopōní pea feinga ke ʻiloʻi ʻa e ngaahi tāpuaki ʻoku nau fiemaʻu pe lava ke maʻu ʻi he ako folofolá.

Ko e hā ʻeku ʻuluaki mahinó pe meʻa te u malavá? (Sivi):

• Ko e hā ha ngaahi tāpuaki te ke lava ʻo fakakaukau ki ai kuo talaʻofa mai ʻe he kau palōfita ʻo e kuonga muʻá pe ʻi onopōní, ʻi he taimi ʻoku tau ako ai ʻa e folofolá?

• ʻOkú ke pehē ko e hā ha liliu ʻe hoko ki hoʻo kau akó kapau ʻe mahino kiate kinautolu ʻa e ngaahi talaʻofa ko iá?

Ko e hā nai ia, pea ko e hā ʻa e ʻuhinga ʻoku mahuʻinga aí? (Fakamatalaʻi):

Kuo toutou akoʻi mai ʻe he ʻEikí ʻo fakafou ʻi Heʻene kau palōfitá, ʻa e mahuʻinga hono ako ʻEne folofolá. ʻE lava ke tokoni hono tokoniʻi ʻo e kau akó ke nau ʻiloʻi ʻa e ngaahi tāpuaki kuo talaʻofa mai te nau fiemaʻú, ʻo tatau ai pē pe naʻe foaki ʻe he kau palōfita ʻo e kuonga muʻá pe ʻi onopōní, ke nau maʻu ha holi lahi ange ke ako ʻa e folofolá.

Ko e founga lelei ʻe taha ke fai ai iá ko hono ʻai ke lau ʻe he kau akó ha potufolofola pe fakamatala mei ha palōfita pea fakaafeʻi kinautolu ke nau feinga ke ʻiloʻi ʻa e ngaahi tāpuaki ʻoku nau fiemaʻú.

Ko hai pe ko e hā ʻokú ne ʻomi ha fakatātā lelei ʻo e meʻá ni? (Fakatātaaʻi):

ʻOku fakaafeʻi ʻe Brother Tavenipooti ʻene kau akó ke nau lau ʻa e lea ʻi lalo meia ʻEletā Lisiate G. Sikotí pea kole ange ke nau fakakaukau ki he ngaahi fehuʻi ko ʻení ʻi heʻenau fai iá.

• Ko e fē ʻa e ngaahi tāpuaki ʻo e ako folofolá ʻoku fakahaaʻi mai ʻe ʻEletā Sikotí ʻokú ke fiemaʻu lahi taha ʻi he ʻaho kotoa pē?

• ʻOkú ke pehē ʻe tokoniʻi fēfē ʻe he ako fakaʻaho ʻo e folofolá ho vā fetuʻutaki mo Sīsū Kalaisí?

“ʻE lava ke hoko ʻa e fakalaulauloto ki ha potufolofolá ko ha kī ke ne fakaava mai ʻa e fakahaá pea mo e tataki mo e ueʻi ʻa e Laumālie Māʻoniʻoní. ʻE lava ke fakafiemālieʻi ʻe he folofolá ʻa e laumālie taʻemanongá, ʻo ʻomai ʻa e melinó, ʻamanaki leleí, mo toe fakafoki ʻa e loto-falalá ke malava ai ʻe ha taha ʻo ikunaʻi e ngaahi faingataʻa ʻo e moʻuí. ʻOkú na maʻu ʻa e ivi mālohi ke fakaleleiʻi e ngaahi faingataʻaʻia fakaelotó ʻi he taimi ʻoku tau tui ai ki he Fakamoʻuí. Te nau lava ʻo fakamoʻui leva e sinó”(“Ko e Mālohi ʻo e Folofolá,” Liahona, Nōvema 2011, 6).

Te u akoako fakaʻaongaʻi fēfē ʻa e taukei ko ʻení pe fakaʻaongaʻi ʻa e tefitoʻi moʻoni ko ʻení? (Akoako):

Hiki ha fehuʻi ʻe ua pe lahi ange te ke lava ʻo fai ʻe lava ʻo tokoni ki hoʻo kau akó ke nau fakakaukau ki he ngaahi tāpuaki ʻo e ako folofola naʻe talaʻofa ʻe Palesiteni Nalesoní ʻi he kupuʻi lea ko ʻení:

“ʻOku mātuʻaki mahuʻinga e femoʻuekina fakaʻaho ʻi he folofola ʻa e ʻOtuá ki heʻetau moʻui fakalaumālié ʻo tautautefito ʻi he ngaahi ʻaho ko ʻeni ʻo e fakautuutu e moveuveú. ʻI heʻetau keinanga fakaʻaho he folofola ʻa Kalaisí, ʻe fakahā mai ʻe he folofola ʻa Kalaisí e founga ke tau tali ʻaki e ngaahi faingataʻa naʻe ʻikai ke tau lavelaveʻiloa te tau fehangahangai mo iá” (“Fanongo Kiate Ia,” ʻEpeleli 2020).

Fakalaulauloto pe aleaʻi:

• Ko e hā ʻokú ke ako te ne tokoniʻi koe ʻi hono tokoniʻi hoʻo kau akó ke fakatupulaki ʻenau holi ke ako ʻa e folofolá?

Ko e hā ʻa e founga mo e taimi te u fakakau ai ʻení?

Kātaki ʻo fili ha fakamatala fakaepalōfita pe potufolofola ʻe taha pe lahi ange te ke fakaʻaongaʻi ʻi he uike ka hokó ke tokoni ke ʻiloʻi ʻe hoʻo kau akó ha niʻihi ʻo e ngaahi tāpuaki ʻo e ako folofolá pea faʻu ha fehuʻi ʻe taha pe lahi ange te ke fai ke tokoni ki hoʻo kau akó ke fokotuʻu haʻanau taumuʻa ki he ako fakaʻahó.

Fiemaʻu Lahi Ange?

“Folofolá” ʻi he Fakahinohino ki he Ngaahi Folofolá,

Teachings of Latter-day Prophets on the Blessings of Scripture Study (1997)