Qhia cov Lus Qhuab Qhia

Txawm yog Yexus loj hlob zoo muaj tswv yim thiab kev txawj ntse hauv Nws lub neej, Nws tsis tau kawm ntawv zoo li lwm tus thawj coj teev ntuj hauv Nws lub caij nyoog. Tiam sis thaum Nws qhia, cov neeg xav tsis thoob, hais tias, “Ua li cas tus txiv neej no yuav paub ua luaj li, nws twb tsis tau kawm ntawv li los sav?” Vim li cas Nws tej lus qhia muaj hwj chim heev? Tus Cawm Seej piav tias, “Tej lus uas kuv qhia no tsis yog kuv tej lus, tiam sis yog Vajtswv tus uas txib kuv los tej lus” (Yauhas 7:15–16). Cov lus qhuab qhia yog qhov tseeb uas nyob mus ib txhis li—nyob hauv cov vaj lug kub thiab cov yaj saub hauv hnub nyoog kawg tej lus—uas qhia peb txog txoj kev hloov los ua neeg zoo li peb Leej Txiv Saum Ntuj Ceeb Tsheej thiab txoj kev rov qab mus cuag Nws. Txawm koj paub npaum li cas ua ib tug xib hwb los, koj yej muaj hwj chim qhia, ib yam li tus Cawm Seej tau ua, thaum koj qhia Leej Txiv cov lus qhuab qhia. Koj thiab cov uas koj qhia yuav xav tsis thoob txog cov koob hmoov uas Vajtswv xa rau koj thaum koj qhia thiab kawm raws li Nws txoj lus.

Qhia cov Lus Qhuab Qhia

• Cia li kawm Yexus Khetos cov lus qhuab qhia.

• Qhia los ntawm cov vaj lug kub thiab cov yaj suab hauv hnub nyoog kawg no tej lus.

• Pab cov neeg kawm nrhiav, pom, thiab to taub tej yam tseeb nyob hauv cov vaj lug kub.

• Tsom ntsoov rau tej yam tseeb uas pab neeg hloov siab los ntseeg thiab txhawb lawv txoj kev ntseeg Yexus Khetos.

• Pab cov neeg kawm nrhiav tej yam tseem ceeb rau lawv lub neej nyob hauv Yexus Khetos cov lus qhuab qhia.

Tus Cawm Seej tau Kawm cov Lus Qhuab Qhia

Peb yeej paub tias tus Cawm Seej tau kawm los ntawm cov vaj lug kub thaum Nws tseem hluas vim Nws “loj hlob zoo muaj tswv yim, [thiab] nws ua haum Vajtswv siab” (Lukas 2:52). Txhua tus paub tias Nws txawj to taub Leej Txiv cov lus qhuab qhia thaum Nws niam Nws txiv nrhiav tau Nws nyob hauv lub tuam tsev thaum Nws yog ib tug tub hluas, qhia cov xib hwb Yudais thiab teb lawv tej lus nug (saib Joseph Smith Kev Txhais, Lukas 2:46 [nyob hauv Lukas 2:46, lus cim c]). Tom qab ntawd, thaum Dab Ntxwg Nyoog sim ntxias Nws nyob hauv roob moj sab qhua, Yexus txoj kev paub txog cov lus qhuab qhia nyob hauv cov vaj lug kub tau pab Nws tiv tau kev ntxias (saib Lukas 4:3–12).

Koj kuj yuav tau kawm cov lus qhuab qhia ntxiv ua ntej koj yuav qhia lwm tus. Thaum koj npaj qhia thiab kawm nrog lwm tus, cia li ua tib zoo nrhiav tej yam uas tus Tswv tau hais txog tej yam tseeb uas koj qhia. Nyeem cov vaj lug kub thiab cov yaj saub tej lus kom nrhiav tau tej lus piav thiab tej lus ntuas. Kev ua raws li tej lus tseeb uas koj kawm yuav caw tus Ntsuj Plig qhia koj txog cov lus qhuab qhia thiab pom zoo rau qhov tseeb ntawm cov lus qhuab qhia ntawd nyob hauv cov neeg uas koj qhia lub siab.

Tej Lus Nug Zoo Xav Txog: Vim li cas yuav tsum to taub txog txoj moo zoo ntawm yus tus kheej? Koj tau ua li cas kom thiaj li to taub tej lus tseeb ntawm txoj moo zoo? Koj tau txais kev tshoov siab twg kom kawm vaj lug kub zoo ntxiv thiab cov yaj saub tej lus?

Los ntawm cov Vaj Lug Kub: Paj Lug 7:1–3; 2 Nifais 4:15–16; Lus Qhuab Qhia thiab Kev Khi Lus 11:21; 88:118

Tus Cawm Seej tau Qhia Los ntawm cov Vaj Lug Kub

Tom qab tus Cawm Seej tuag, Nws ob tug thwj tim taug kev mus thiab sib tham nrog kev tu siab thiab kev xav tsis thoob hauv nkawd lub siab. Nkawd yuav tsum xav li cas txog tej xwm txheej uas raug lawm? Yexus los ntawm Naxales, tus txiv neej uas nkawd ntseeg tias yog nkawd tus Txhiv Dim, tau taug peb hnub dhua los lawm. Ces muaj neeg qhia tias Nws lub ntxa tsis muaj leej twg lawm, thiab cov tim tswv tau tshaj tawm tias Nws muaj txoj sia nyob! Thaum lub sij hawm tseem ceeb ntawm cov thwj tim txoj kev ntseeg, ib tug qhua tau koom nrog nkawd mus kev. Nws tau nplij nkawd lub siab thaum nws “piav Vajtswv txoj lus uas hais txog [tus Cawm Seej].” Thaum kawg, ob tug no paub tias nkawd tus xib hwb ntawd yog Yexus Khetos thiab Nws twb sawv rov los lawm. Lawv tau ua li cas kom paub Nws yog leej twg? Lawv xav hais tias, “Thaum peb taug kev tuaj, nws nrog wb tham thiab piav Vajtswv txoj lus rau wb mloog, mas wb lub siab kub lug cuag li hluav taws hlawv puas yog?” (Lukas 24:27, 32).

Txwj Laug D. Todd Christofferson qhia hais tias, “Lub ntsiab ntawm tag nrho cov vaj lug kub yog ua kom peb muaj txoj kev ntseeg Vajtswv Leej Txiv thiab ntseeg Nws Leej Tub, Yexus Khetos” (“The Blessing of Scripture,” Liahona, Tsib Hlis Ntuj 2010, 34) Thaum Yexus ua hauj lwm qhuab qhia, Nws siv cov vaj lug kub kom qhia, kho, thiab tshoov lwm tus lub siab. Ua tib zoo saib xyuas kom koj tej lus qhia yeej yog raws nraim li cov vaj lug kub thiab cov yaj saub tej lus qhia. Thaum koj rau siab siv Vajtswv txoj lus nyob hauv koj tej lus qhia, koj yuav pab lwm tus zoo li tus Cawm Seej tau pab. Koj yuav pab lawv kom paub Nws, vim yeej yuav tsum txhawb peb txoj kev ntseeg tus Cawm Seej kom muaj zog. Cov uas koj qhia yuav paub zoo tias koj nyiam cov vaj lug kub, thiab koj cov lus qhia yuav caw tus Ntsuj Plig los ua rau lawv lub siab kub lug thaum lawv ua tim khawv txog Leej Txiv thiab Leej Tub.

Tej Lus Nug Zoo Xav Txog: Puas muaj ib tug xib hwb uas siv cov vaj lug kub kom pab koj paub tus Cawm Seej zoo dua? Koj yuav ua li cas kom siv rau cov vaj lug kub thiab cov yaj saub tej lus thaum koj qhia? Koj yuav pab li cas kom cov uas koj qhia paub thiab nyiam Vajtswv txoj lus?

Los ntawm cov Vaj Lug Kub: Lukas 4:14–21; Amas 31:5; Hilamas 3:29–30;3 Nifais 23

Tus Cawm Seej tau Pab cov Neeg Nrhiav, Pom, thiab To Taub tej Yam Tseeb

Ib tug kws lij choj tau nug Yexus tias, “Xib hwb …, kuv yuav ua li cas kuv thiaj tau txoj sia ntev dhawv mus ib txhis?” Ces tus Cawm Seej tau teb los ntawm cov vaj lug kub: “Vajtswv txoj lus qhia li cas? tej uas koj nyeem ntawd, koj to taub li cas?” Ces ua rau tus txiv neej teb li no tias—“Hlub tus Tswv uas yog koj tus Vajtswv … thiab hlub koj tej kwv tij zej zog”—thiab rov qab nug ib yam ntxiv: “Tus twg thiaj yog kuv tej kwv tij zej zog?” Tus Cawm Seej teb thaum Nws hais ib zaj lus piv txwv txog peb tug txiv neej uas pom ib tug neeg txom nyem. Tsuas muaj ib tug txiv neej uas tau nres los pab, ib tug neeg Xamalis, uas cov Neeg Yudais ntxub vim nws tuaj qhov chaw txawv tuaj. Ces Yexus caw tus kws lij choj teb nws tej lus nug: “Koj sim xav saib, lawv peb tug no, tus twg yog tus uas tub sab ntaus ntawd tus kwv tij?” (saib Lukas 10:25–37).

Koj xav tias vim li cas tus Cawm Seej tau qhia li no—Nws hais kom lawv nrhiav, xav, thiab kawm li no thaum lawv nug Nws tej yam zoo li no? Yog vim tus Tswv saib kev siv zog nrhiav qhov tseeb muaj nqis heev. Nws pheej hais kom tib neeg “Nrhiav, thiab nej yuav nrhiav tau” (saib, ua piv txwv, Mathais 7:7; Lukas 11:9; Lus Qhuab Qhia thiab Kev Khi Lus 4:7). Nws muab nqi zog rau tus uas xav ntseeg thiab ua siab ntev.

Zoo li tus Cawm Seej, koj pab tau cov uas koj qhia kom lawv paub thiab to taub qhov tseeb. Ua piv txwv, cov vaj lug kub muaj tej lus tseeb los ntawm txoj moo zoo, tiam sis tej zaum yuav tsum ua tib zoo nrhiav kom nyeem tau. Thaum nej kawm ua ke los ntawm cov vaj lug kub, thov cov uas koj qhia kom hais txog tej lus tseeb ntawm txoj moo zoo uas lawv pom. Pab lawv pom tias tej lus tseeb no qhia dab tsi txog Leej Txiv Saum Ntuj Ceeb Tsheej txoj hau kev cawm seej. Tej lub sij hawm muaj tej lus tseeb mus ib txhis uas hais kiag hauv cov vaj lug kub, thiab tej lub sij hawm muaj nyob hauv tej zaj dab neeg thiab cov neeg lub neej. Tej zaum yuav pab thaum nej kawm ua ke txog caj ceg ntawm tej nqe uas nej nyeem, thiab lub ntsiab ntawm tej nqe vaj lug kub thiab yuav pab li cas nyob hauv peb lub neej.

Tej Lus Nug Zoo Xav Txog: Koj ua li cas kom thiaj paub tias cov vaj lug kub los sis cov yaj saub tej lus muaj tseeb? Tej lus tseeb ntawd ua li cas foom koob hmoov rau koj lub neej? Muaj tej kev twg uas koj yuav pab cov neeg kawm paub thiab to taub tej lus tseeb uas yuav muaj nqis rau lawv thiab coj lawv los nyob ze Vajtswv?

Los ntawm cov Vaj Lug Kub: Yauhas 5:39; 1 Nifais 15:14; Lus Qhuab Qhia thiab Kev Khi Lus 42:12

cov neeg kawm ntawv

Peb yuav pab cov uas peb qhia kom nrhiav thiab paub tej lus tseeb.

Tus Cawm Seej tau Qhia tej Yam Tseeb uas Ua rau cov Neeg Hloov Siab Los Ntseeg thiab Txhawb Lawv txoj Kev Ntseeg

Muaj ib Hnub Caiv, tus Cawm Seej thiab Nws cov thwj tim, tshaib plab heev, ces thaum lawv mus txog hauv ib daim teb npleg, cov thwj tim txawm de hnab nplej los tev noj. Cov Falixais, uas yeej nyiam ua txhua yam raws nraim li lawv txoj kev txhais Mauxes txoj kev cai, lawv tau hais tias kev de nplej yeej yog kev ua hauj lwm uas txwv tsis pub ua thaum Hnub Caiv (saib Malakaus 2:23–24). Raws li tus yaj saub hauv Phau Ntawv Maumoos Yakhauj hais tias, cov Falixais “ntsia dhau lub hom phiaj” (Yakhauj 4:14). Los yog hais tias, lawv tsom ntsoov rau lawv tej kev txhais cov lus txib lawv thiaj li tsis nco qab txog lub hom phiaj ntawm cov lus txib ntawd—kom peb nyob ze Vajtswv. Muaj tseeb tiag, cov Falixais tsis tau paub tias tus usa muab cov txib kom hwm Hnub Caiv yeej yog tus uas sawv ntawm lawv.

Tus Cawm Seej tau siv lub cib fim no kom ua tim khawv tias Nws yog los ntawm Vajtswv los thiab qhia vim li cas Hnub Caiv tseem ceeb heev. Twb tsim Hnub Caiv rau peb kom muaj ib hnub teev tiam tus Tswv, Yexus Khetos (saib Malakaus 2:27–28). Tej lus tseeb no pab peb to taub tias Vajtswv cov lus txib tsis yog kom peb coj yam ntxwv ntawm sab nraud xwb. Cov lus txib pab peb hloov peb lub siab thiab hloov siab los ntseeg ntxiv.

Ua tib zoo xav txog qhov uas koj yuav tsom ntsoov rau cov lus qhuab qhia thiab cov ntsiab cai twg. Muaj ntau yam tseeb nyob hauv vaj lug kub uas tsim nyog sib tham txog, tiam sis yuav zoo tshaj yog koj tsom ntsoov rau tej lus tseeb ntawm txoj moo zoo uas pab tib neeg hloov siab los ntseeg thiab muaj kev ntseeg Yexus Khetos ntxiv. Tej lus tseeb uas yooj yim to taub uas tus Cawm Seej qhia yeej muaj hwj chim hloov peb lub neej—tej lus tseeb txog Nws txoj Kev Theej Txhoj, txoj hau kev cawm seej, cov lus txib kom hlub Vajtswv thiab hlub peb cov neeg zej zog, thiab li ntawd. Caw tus Ntsuj Plig ua tim khawv txog tej lus tseeb, pab lawv paub cov uas koj qhia lub siab lub ntsws.

Tej Lus Nug Zoo Xav Txog: Tej lus tseeb twg ntawm txoj moo zoo tau pab koj hloov siab los ntseeg Yexus Khetos thiab rau siab ntseeg Nws ntxiv? Ib tug xib hwb puas tau pab koj tsom ntsoov rau tej lus tseeb tseem ceeb tshaj plaws ntawm txoj moo zoo? Koj yuav qhia dab tsi kom pab lwm tus hloov siab los ntseeg Yexus Khetos ntxiv?

Los ntawm cov Vaj Lug Kub: 2 Nifais 25:26; 3 Nifais 11:34–41; Lus Qhuab Qhia thiab Kev Khi Lus 19:31–32; 68:25–28; 133:57; Mauxes 6:57–62

Tus Cawm Seej tau Pab cov Neeg Nrhiav tej Yam Tseem Ceeb rau Lawv lub Neej Nyob hauv Nws cov Lus Qhuab Qhia

Cov Falixais tau yws yws txog Yexus hais tias, “Tus no nrog cov neeg txhaum ua ke thiab nrog lawv noj mov”—vim lawv xav tias tsis tsim nyog uas ib tug xib hwb ua li no (Lukas 15:2). Yexus pom tias qhov no yog ib lub cib fim kom qhia lawv txog tej yam tseeb tseem ceeb. Nws yuav ua li cas kom ua li ntawd? Nws yuav ua li cas kom pab cov Falixais pom tias yeej yog lawv lub siab uas tsis dawb huv thiab yuav tsum kho zoo—tsis yog Nws li? Nws yuav siv Nws cov lus qhuab qhia li cas kom qhia lawv tias lawv yuav tsum hloov lawv lub siab thiab txoj kev coj cwj pwm?

Nws tau ua li no thaum Nws hais lus rau lawv txog ib tug yaj uas mus yuam kev lawm thiab txog ib lub npib nyiaj uas ploj lawm. Yexus hais txog ib tug tub uas ntxeev siab thiab xav kom nws tus tij laug zam txim pub rau nws tiam sis tus tij laug tsis kam tos txais nws los sis noj mov nrog nws. Txhua zaj lus piv txwv no muaj tej lus tseeb uas qhia txog cov Falixais txoj kev saib lawm tus, thiab qhia tias txhua tus neeg muaj nqis heev (saib Lukas 15). Tus Cawm Seej tsis tau qhia cov Falixais—los yog peb txhua tus—hais tias lawv yog piv txog leej twg nyob hauv Nws tej zaj lus piv txwv. Tej lub sij hawm peb yog leej txiv uas txhawj xeeb. Tej lub sij hawm peb yog tus tij laug uas khib siab. Feem ntau peb yog tus yaj uas ploj lawm los sis tus tub uas ua yuam kev. Tiam sis peb raug xwm txheej dab tsi los, los ntawm Nws tej zaj lus piv txwv, tus Cawm Seej caw peb kawm qhov tseeb ntawm Nws tej lus qhia—kom paub tias Nws xav kom peb kawm dab tsi thiab peb yuav tsum hloov dab tsi nyob hauv peb txoj kev xav thiab peb txoj kev coj cwj pwm.

Tej zaum koj yuav pom tias ib txhis neeg tsis paub tias vim li cas tej lus tseeb muaj nqis rau lawv. Thaum koj xav txog cov uas koj qhia, cia li xav txog tej lus tseeb nyob hauv cov vaj lug kub uas yuav muaj nqis thiab yuav zoo siv thaum lawv raug xwm txheej. Ib yam koj ua tau kom pab cov neeg kawm txog tej lus tseeb yog thaum koj nug tej yam xws li“Qhov no yuav pab koj li cas ua tej yam hauv koj lub neej tam sim no?” “Vim li cas qhov no tseem ceeb rau koj paub?” “Qhov no puas yuav hloov koj lub neej?” Mloog zoo rau cov uas koj qhia. Cia lawv nug koj tej yam uas lawv xav paub. Yaum kom lawv muab tus Cawm Seej tej lus qhia txuas rau lawv lub neej. Tej zaum koj yuav xav qhia tias vim li cas tej yam uas koj qhia tseem ceeb rau koj lub neej. Yog koj ua li no ces tus yuav pab tus Ntsuj Plig qhia lawv tias Vajtswv cov lus qhuab qhia yuav hloov lawv lub neej li cas.

Tej Lus Nug Zoo Xav Txog: Vim li cas tej lus tseeb txog txoj moo zoo muaj nqis rau koj thiab zoo rau koj siv? Muaj dab tsi uas pab koj thaum koj kawm txog txoj moo zoo? Koj ua dab tsi kom tsom ntsoov rau tej lus tseeb uas muaj nqis rau cov neeg uas koj qhia?

Los ntawm cov Vaj Lug Kub: 1 Nifais 19:23; 2 Nifais 32:3; Lus Qhuab Qhia thiab Kev Khi Lus 43:7–9

Tej Yam uas Koj Ua Tau Kom Ua Raws Li tej Yam Koj Qhia

• Ntsuas tej yam uas koj qhia kom paub tseeb tias koj qhia cov lus qhuab qhia tiag tiag. Tej lus nug no yuav pab koj:

  • Tej yam uas kuv npaj qhia puas los ntawm cov vaj lug kub thiab cov yaj saub hauv hnub nyoog kawg tej lus?

  • Cov yaj saub coob puas tau qhia qhov no? Cov thawj coj hauv lub Koom Txoos tam sim no qhia dab tsi txog qhov no?

  • Qhov no yuav pab li cas kom lwm tus ntseeg Yexus Khetos, hloov siab lees txim, thiab vam meej nyob ntawm txoj kev ua raws li lawv tej kev khi lus?

  • Qhov no puas yog raws li tus Vaj Ntsuj Plig Dawb Huv tej kev tshoov siab, los sis kuv ntxhov siab txog qhov no?

• Cia li kawm Vajtswv txoj lus niaj hnub kom paub tseeb txog Nws cov lus qhuab qhia tseeb.

• Hais kom cov neeg uas koj qhia kom nyeem cov vaj lug kub thiab cov yaj saub tej lus thaum koj qhia.

• Cia li qhia lawv kom paub siv tej lus cim, Phau Qhia txog Vaj Lug Kub, thiab lwm yam cov ntaub ntawv thaum lawv kawm txog cov vaj lug kub.

• Caw cov neeg kawm kom nrhiav qhov tseeb nyob hauv ib nqe vaj lug kub los sis ib zaj dab neeg.

• Ua tim khawv txog tej yam uas koj tau ua kom paub tias ib co lus qhuab qhia muaj tseeb.

• Siv tej zaj dab neeg los sis zaj lus piv txwv kom pab cov neeg kawm to taub zoo dua txog tej yam tseeb ntawm txoj moo zoo.