Maʻá e Kau Takí—Tokoniʻi e Kau Faiakó ke Lavameʻa

Ngaahi Fengāueʻaki Fakatāutahá

Ko e taimi lahi ko e founga lelei taha ke feau ai e ngaahi fiemaʻu makehe ʻa e kau faiakó ʻoku fakafou ia ʻi he ngaahi fengāueʻaki fakatāutahá. Hangē ko ʻení, ʻi hoʻo hoko ko ha takí, te ke lava ʻo fai ha fealeaʻaki nounou mo ha faiako kimuʻa pe ʻi he ʻosi ʻa e kalasí ke aleaʻi ʻa e ngaahi tefitoʻi moʻoni ʻo e Ko e Faiako ʻi he Founga ʻa e Fakamoʻuí. Te ke lava ʻo teuteu ki he fealēleaʻaki ko ʻení ʻaki haʻo vakai ki he faiako ʻa e faiakó. Feinga ke mahino lelei ange ʻa e ngaahi mālohinga ʻo e faiakó pea ʻiloʻi e ngaahi founga te ke lava ai ʻo fai ha tokoní.

ʻOku mahuʻinga tatau pē hono langaki ʻo e ngaahi mālohinga ʻo ha faiako mo hono ʻiloʻi ʻo e ngaahi faingamālie ke fakalakalaká. ʻOku tokoni ke kamataʻi ha fealēleaʻaki mo e kau faiakó ʻaki hano kole ange ke nau fakakaukau ʻiate kinautolu pē ki he meʻa ʻoku ngāue leleí pea mo e tafaʻaki ʻoku nau ongoʻi ʻe lava ke fai ai ha fakalakalaká.

ʻI hoʻomou fakataha mo e kau faiakó, fakakaukau ki ha ngaahi founga ke fakamālohia mo poupouʻi kinautolu ʻi he angaʻofa mo e houngaʻia ʻi he ngāue ʻoku nau faí.

Ngaahi Fakataha Alēlea ʻa e Kau Faiakó

ʻOku totonu ke fakahoko fakakuata ʻe he uooti takitaha e fakataha alēlea ʻa e kau faiakó ʻa ia ʻe lava ke talatalaifale fakataha ai e kau faiakó ki he ngaahi tefitoʻi moʻoni ʻo e faiako hangē ko Kalaisí. ʻE toe lava foki ke fakahoko e fakataha alēlea ʻa e kau faiakó maʻá e mātuʻá (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 13.5, ChurchofJesusChrist.org).

Ko e Fē Taimi ʻOku Totonu ke Fakahoko ai e Ngaahi Fakataha ko ʻEní?

ʻOku fakahoko ʻa e ngaahi fakataha alēlea fakafaiakó, ʻi he lolotonga ʻo e taimi kalasi miniti ʻe 50 he Sāpaté.

• ʻE lava ke kau atu e kau faiako ʻo e Lakanga Fakataulaʻeikí, Fineʻofá mo e Kau Finemuí ʻi he Sāpate ʻuluakí pe Sāpate tolú, ʻo fakatatau mo e fakahinohino ʻa e kau taki fakalotofonuá.

• ʻE lava ke kau atu e kau faiako Lautohi Faka-Sāpaté ʻi he Sāpate uá pe Sāpate faá, ʻo fakatatau mo e fakahinohino ʻa e kau taki fakalotofonuá.

• ʻE lava ke kau atu e kau faiako Palaimelí ʻi ha faʻahinga Sāpate pē, ʻo fakatatau mo e fakahinohino ʻa e kau palesitenisī Palaimeli mo e Lautohi Faka-Sāpate ʻi he uōtí. Kapau ʻe fie maʻu, ʻe lava ke fakataha mavahevahe ʻa e kau faiako Palaimelí ia mei he kau faiako kehé ke nau talatalaifale fekauʻaki mo e ngaahi fiemaʻu makehe ki hono akoʻi ʻo e fānaú. ʻE lava ke fakahoko ʻeni lolotonga e taimi hiva miniti ʻe 20, kimuʻa pe hili e ngaahi fakataha angamaheni ʻo e Sāpaté, pe ʻi ha ʻaho kehe ʻo e uiké. ʻE lava ke fakahoko ha fakataha alēlea ʻo tuʻo taha pe lahi ange lolotonga e kuatá, maʻá e kau faiako Palaimelí ke ʻoua naʻa nau mavahe kotoa he taimi tatau, kae liʻaki e ngaahi kalasi Palaimelí ʻi he uike tatau. (Fakatokangaʻi ange: Kapau ʻe fiemaʻu, ʻe vahe ʻe he kau palesitenisī ʻo e Palaimelí ha kau faiako talifaki, fakatahaʻi e ngaahi kalasí pe fai ha ngaahi fokotuʻutuʻu kehe kae lava e kau faiako Palaimelí ʻo ʻalu ki he fakataha alēlea ʻa e kau faiakó.)

• ʻE lava ke fakahoko ʻa e fakataha alēlea fakafaiakó maʻá e mātuʻá ʻi ha faʻahinga Sāpate pē, ʻo fakatatau mo e tuʻutuʻuni ʻa e fakataha alēlea fakauōtí.

Ko Hai ʻOku Totonu ke Kau Ki Aí?

ʻOku totonu ke kau ki ai e tokotaha kotoa pē ʻokú ne akoʻi ha kōlomu pe kalasi ʻi he uōtí, fakataha mo ha taha ʻi he kau taki ʻo e lakanga fakataulaʻeikí pe houalotú ʻokú ne tokangaʻi e kau faiako ko iá. Kapau ʻe fiemaʻu, ʻe lava ke vahevahe e niʻihi ʻoku kau ki aí ke fakakulupu ʻo fakatatau mo e fiemaʻu ʻa e niʻihi ʻoku nau akoʻí. Hangē ko ʻení, mahalo naʻa ʻaonga ange ki he kau faiako ʻo e toʻu tupú pe fānaú ke nau fakataha mavahe ʻi ha taimi ʻe niʻihi ke aleaʻi ha ngaahi meʻa ʻoku fekauʻaki tonu pē ia mo hono akoʻi ʻo e toʻu tupú pe fānaú.

Ki he ngaahi fakataha alēlea ʻa e kau faiakó maʻá e mātuʻá, ʻe fakapapauʻi ʻe he fakataha alēlea ʻo e uōtí pe te nau fakaafeʻi ha mātuʻa pau pe fakaʻatā ki he taha kotoa ʻoku fie kau maí.

Ko Hai ʻOkú Ne Tataki e Ngaahi Fakataha Ko ʻEní?

ʻOku tokangaʻi e fakataha alēlea ʻa e kau faiakó ʻe he fakataha alēlea fakauōtí, pea tokoni ki ai e kau palesitenisī ʻo e Lautohi Faka-Sāpaté. ʻOku nau fealēleaʻaki fakataha fekauʻaki mo e ngaahi fiemaʻu ʻa e kau faiakó mo e kau akó ʻo makatuʻunga ʻi he meʻa kuo nau fakatokangaʻi ʻi he ngaahi kalasí mo e ngaahi fakatahá. ʻOku nau ngāue fakataha ke fakapapauʻi pe ko e fē ʻa e ngaahi tefitoʻi moʻoni mo e founga ngāue mei he Ko e Faiako ʻi he Founga ʻa e Fakamoʻuí te nau feau lelei taha e ngaahi fiemaʻu kuo nau ʻiló.

Ko e angamahení, ʻoku tataki ʻe ha mēmipa ʻo e kau palesitenisī ʻo e Lautohi Faka-Sāpaté ʻa e ngaahi fakataha alēlea fakafaiakó. Ka ʻe lava pē ke vahe ki ha kau mēmipa kehe ʻo e uōtí ke tataki ʻa e ngaahi ngaahi fakatahá. ʻOku toe fakamālohia ʻe he kau palesitenisī ʻo e kōlomú mo e houalotú mo ʻenau kau faiakó ʻa e ngaahi tefitoʻi moʻoni mo e ngaahi founga ngāue naʻe aleaʻi ʻi he fakatahá.

Ko e hā ʻOku Totonu ke Hoko ʻi ha Fakataha Alēlea ʻa e Kau Faiakó?

ʻOku totonu ke muimui ʻa e fakataha alēlea ʻa e kau faiakó ʻi he foungá ni:

• Feʻinasiʻaki mo fealēleaʻaki fakataha. Fakaafeʻi e kau faiakó ke nau vahevahe ha ngaahi meʻa ne hoko ʻi heʻenau faiakó, fai ha ngaahi fehuʻi fekauʻaki mo e taimi faiakó pea vahevahe ha ngaahi fakakaukau ki ha ngaahi faingataʻa ʻe ala hoko. ʻE lava ke fakakau he konga ko ʻeni ʻo e fakatahá hano toe fakamanatu e ngaahi tefitoʻi moʻoni ne aleaʻi ʻi he ngaahi fakataha kimuʻá.

• Ako fakataha. Fakaafeʻi e kau faiakó ke nau aleaʻi ha taha ʻo e ngaahi tefitoʻi moʻoni ʻoku ʻoatu ʻi he maʻuʻanga tokoni ko ʻení: tukutaha e tokangá kia Sīsū Kalaisi, ʻofa ʻiate kinautolu ʻokú ke akoʻí, faiako ʻaki e Laumālié, akoʻi e tokāteliné, pea fakaafeʻi e ako fakamātoató. ʻE lava ke akoʻi e ngaahi tefitoʻi moʻoni ko ʻení ʻi ha faʻahinga fakahokohoko pē, tukukehe kapau ʻe toki tuʻutuʻuni ʻe he fakataha alēlea fakauōtí ia ha meʻa kehe, pea ʻe lava ʻe he niʻihi ʻoku kau atu ki he fakatahá ʻo fili e tefitoʻi moʻoni hoko ke aleaʻí. Te ke lava ʻo fakaʻaongaʻi ha fakataha ʻe taha pe lahi ange ke aleaʻi ai ha foʻi tefitoʻi moʻoni ʻe taha, ʻo ka fiemaʻu.

• Palani pea Fakaafe. Tokoniʻi e kau faiakó ke nau palani e founga te nau fakaʻaongaʻi ai e tefitoʻi moʻoni kuo nau aleaʻí. Kapau ʻe feʻunga, te mou lava foki ʻo akoako fakataha ha pōtoʻi ngāue kuo mou aleaʻi. Fakaafeʻi ke nau lekooti mo ngāue ki ha faʻahinga ongo ʻoku nau maʻu ki he founga ke fakaʻaongaʻi ai ha tefitoʻi moʻoni ʻi heʻenau faiakó—kau ai ʻenau feinga ke faiako ʻi honau ngaahi ʻapí. Fakalotolahiʻi kinautolu ke nau kamata ako leva ki he tefitoʻi moʻoni hoko ke aleaʻí.

ʻOku totonu ke hanga ʻe he fakataha alēlea ʻa e kau faiakó ʻo faʻifaʻitaki e ngaahi tefitoʻi moʻoni ʻoku aleaʻí ki he lahi taha te nau lavá.

ʻE lava ke tokoni ʻa e ngaahi fakataha alēlea fakafaiakó ke mahino lelei ange ki he kau faiakó mo nau fakaʻaongaʻi ʻa e ngaahi tefitoʻi moʻoni ʻo e faiako hangē ko Kalaisí.

Fakataukeiʻi ʻo e Kau Faiako Ne Toki Uiuiʻi Foʻoú

ʻI hoʻo hoko ko e takí, ʻoku ʻi ai ho fatongia ke “fakataha mo e kau faiako ne toki uiuiʻi foʻoú” ʻi hoʻo houalotú pea “tokoniʻi ʻa kinautolu ke nau teuteu ki honau ngaahi uiuiʻí” (Tohi Tuʻutuʻuni Fakakātoa, 17.3, ChurchofJesusChrist.org). ʻOku hoko e ngaahi fakatahá ni ko ha faingamālie ke fakafeʻiloaki ai ha kau faiako foʻou ki honau uiuiʻi toputapú pea fakalotoa kinautolu ʻaki ha vīsone ki he ʻuhinga ʻo e faiako ʻi he founga ʻa e Fakamoʻuí. ʻI hoʻo hoko ko ha takí, ʻe lava ke ke tokoni ki he kau faiako foʻoú ke nau teuteu ke ngāue ʻi hono fai ʻo e ngaahi meʻá ni:

• Fakahaaʻi hoʻo loto falala ʻe tokoniʻi kinautolu ʻe he Fakamoʻuí ʻi honau uiuiʻí (vakai, Tokāteline mo e Ngaahi Fuakava 88:78).

• ʻOange ki he kau faiako foʻoú ha tatau ʻo e maʻuʻanga tokoni ko ʻení, pea poupouʻi kinautolu ke nau kumi ha ngaahi founga ke fakaʻaongaʻi ai hono ngaahi tefitoʻi moʻoní ʻi heʻenau faiakó.

• Vahevahe mo e kau faiako foʻoú ha faʻahinga meʻa fekauʻaki mo hoʻo houalotú ʻe ʻaonga ke nau ʻiloʻi.

• ʻO ka fie maʻu, talaange ki he kau faiako foʻoú ʻa e loki ke nau faiako aí pea mo e lēsoni ke kamata ʻakí. ʻOange ha faʻahinga fakamatala pē ʻoku nau fie maʻu fekauʻaki mo ʻenau kalasí mo e kau mēmipa ʻo e kalasí.

• Fakamatalaʻi ange ki he kau faiako foʻoú te ke lava ʻo tokoniʻi kinautolu ʻi honau uiuiʻí. Fai ha tokoni ʻi he loki akó pea ʻai ke nau lava ke maʻu e ngaahi maʻuʻanga tokoni fakafaiakó ʻo ka fiemaʻu.

• Fokotuʻu ange ke ke faʻa vakaiʻi e ngaahi kalasi ʻa e kau faiakó, pea ʻoange ha ngaahi fakamatala ʻo fakatatau mo e ueʻi ʻa e Laumālié.

• Fakaafeʻi e kau faiakó ke nau kau ʻi he fakataha alēlea fakakuata ʻa e kau faiakó.