Talateú
Kuo fokotuʻu ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi tohi ʻo e Ngaahi Akonaki ʻa e Kau Palesiteni ʻo e Siasí ke tokoni atu ke ke ʻunu ʻo ofi ange ki hoʻo Tamai Hēvaní mo fakaloloto hoʻo mahino ki he ongoongolelei kuo fakafoki mai ʻo Sīsū Kalaisí. ʻI he tānaki mai ʻe he Siasí ʻa e ngaahi tohí ki he ʻū tohi ko ʻení, te mou fakatahatahaʻi ai ha ngaahi tohi fefakamoʻoni ʻaki ʻo e ongoongoleleí maʻa homou ʻapí. ʻOku fakataumuʻa ʻa e ngaahi tohí ni ke fakaʻaongaʻi ki he ako fakafoʻituituí pea mo e fakahinohino ʻi he Sāpaté. Te nau lava foki ʻo tokoni atu ʻi hoʻo teuteu ʻa e ngaahi lēsoni ʻo e efiafi fakafāmili ʻi ʻapí, teuteu ha ngaahi lēsoni mo ha ngaahi malanga, pea mo tali ha ngaahi fehuʻi fekauʻaki mo e tokāteline ʻo e Siasí.
ʻOku ʻoatu ʻi he tohí ni ʻa e ngaahi akonaki ʻa Palesiteni Kōtoni B. Hingikelī, ʻa ia naʻe hoko ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mei he ʻaho 12 ʻo Māʻasi 1995, ki he ʻaho 27 ʻo Sānuali 2008.
Ako Fakafoʻituitui
Fekumi ʻi he faʻa lotu ki he tataki ʻa e Laumālie Māʻoniʻoní ʻi hoʻo ako ʻa e ngaahi akonaki ʻa Palesiteni Kōtoni B. Hingikelií. ʻE tokoni atu ʻa e ngaahi fehuʻi ʻi he ngataʻanga ʻo e vahé ke ke fakalaulauloto, mahino, mo fakaʻaongaʻi ʻa e ngaahi akonaki ʻa Palesiteni Hingikelií. ʻE ala tokoni atu ʻa e ngaahi fakakaukau koʻení:
-
Hiki ʻa e ngaahi fakakaukau mo e ngaahi ongo ʻokú ke maʻu mei he Laumālie Māʻoniʻoní, ʻi hoʻo akó.
-
Laineʻi ʻa e ngaahi fakamatala ʻokú ke loto ke manatuʻí. Fakakaukau ke ako maʻuloto ʻa e ngaahi fakamatalá ni pe fakaʻilongaʻi ia ʻi hoʻo folofolá ʻi he tafaʻaki ʻo e ngaahi vēsí.
-
Toutou lau ha vahe pe potufolofola koeʻuhí ke mahino lelei ange kiate koe.
-
Fai kiate koe ʻa e ngaahi fehuʻi hangē koʻení, “ʻOku fakalahi fēfē ʻe he ngaahi akonaki ʻa Palesiteni Hingikelií ʻa ʻeku mahino ki he ngaahi tefitoʻi moʻoni ʻo e ongoongoleleí? pe “Ko e hā ʻoku fie maʻu ʻe he ʻEikí ke u ako mei he ngaahi akonaki ko ʻení? Ko e hā ʻokú Ne finangalo ke u faí?
-
Fehuʻi pē kiate koe pe ʻe tokoniʻi fēfē koe ʻe he ngaahi akonaki ʻi he tohí ni ʻi ho ngaahi faingataʻaʻia fakatāutahá mo ha ngaahi meʻa ʻokú ke hohaʻa ki ai.
-
Vahevahe ʻa e meʻa ʻokú ke akó mo e kau mēmipa ʻo e fāmilí mo e kaungāmeʻá.
Ko e Faiako mei he Tohi Ko ʻEní
ʻE tokoni atu ʻa e ngaahi fakahinohino ko ʻení ke ke faiako mei he tohí ni, ʻo tatau ai pē ʻi ʻapi pe ʻi he lotú.
Teuteu ke Faiako
Fekumi ki he fakahinohino ʻa e Laumālie Māʻoniʻoní ʻi hoʻo teuteu ke faiakó. Ako ʻi he faʻa lotu ʻa e vahé ke ke ʻiloʻi fakapapau ʻoku mahino kiate koe ʻa e ngaahi akonaki ʻa Palesiteni Hingikelií peá ke fili ʻa e ngaahi akonaki ʻokú ke ongoʻi ʻe ʻaonga lahi tahá.
Mahalo te ke fie fakalotolahiʻi kinautolu ʻokú ke akoʻí ke nau ako ʻa e vahé pea tokanga makehe ki he “Ngaahi Fokotuʻu ki he Akó mo e Akoʻí” ʻoku ʻi he ngataʻanga ʻo e vahé.
Poupouʻi hono Aleaʻi e Ngaahi Akonaki ʻa Palesiteni Hingikelií.
Fakaafeʻi ha niʻihi kehe, ʻi hoʻo faiako mei he tohi ko ʻení, ke nau vahevahe ʻenau fakakaukaú, fai ha ngaahi fehuʻi, fakamoʻoni, mo feakoʻiʻaki. Ko e taimi ʻoku nau kau lahi ange aí, te nau mateuteu lahi ange leva ke ako mo maʻu ha fakahā fakafoʻituitui.
Tuku ke hokohoko atu pē ʻa e ngaahi fealēleaʻaki leleí kae ʻoua te ke feinga ke ʻosiki kotoa ʻa e ngaahi akonakí. Tataki ʻa e fealēleaʻakí ke tokoni kiate kinautolu ʻoku kaú ke nau lau e ngaahi akonaki ʻa Palesiteni Hingikelií pea mo ʻilo ʻa e ngaahi founga ke fakaʻaongaʻi ai e ngaahi akonaki ko iá ʻi heʻenau moʻuí.
ʻOku hoko ʻa e ngaahi fehuʻi ʻi he fakaʻosinga ʻo e vahé takitaha ko ha maʻuʻanga tokoni mahuʻinga ke poupouʻi ʻa e fealēleaʻakí. Te ke lava foki ʻo faʻu haʻo ngaahi fehuʻi pē ʻaʻau maʻanautolu pē ʻokú ke akoʻí. ʻOku ʻoatu ʻi lalo ha ngaahi fakakaukau ke poupouʻi ʻa e fealēleaʻakí:
-
Kole ange kiate kinautolu ke nau vahevahe ʻa e meʻa naʻa nau maʻu ʻi heʻenau ako fakafoʻituitui ʻa e vahé.
-
Vahe ʻa e ngaahi fehuʻi kuo ʻosi fili ʻi he ngataʻanga ʻo e vahé ki ha niʻihi fakafoʻituitui pe fanga kiʻi kulupu. Kole kiate kinautolu ʻoku kaú ke nau kumi ʻa e ngaahi akonaki ʻi he vahé ʻoku fekauʻaki mo e ngaahi fehuʻí. Hili ia pea fakaafeʻi kinautolu ke nau vahevahe ʻenau ngaahi fakakaukaú mo ʻenau ʻiló.
-
Lau fakataha ha niʻihi ʻo e ngaahi akonaki ʻa Palesiteni Hingikelī ʻi he vahé. Kole ki he kau akó ke nau fakamatalaʻi ha ngaahi sīpinga mei he folofolá pea mei heʻenau ngaahi aʻusiá ʻoku fekauʻaki mo e ngaahi akonaki ko iá.
-
Kole ki he kau akó ke nau fili ha konga ʻe taha pea lau fakalongolongo ia. Fakaafeʻi kinautolu ke nau fakakulupu, tautau toko ua pe tolu ʻo fakatatau mo kinautolu naʻa nau fili ʻa e konga tataú pea aleaʻi ʻa e meʻa ne nau akó.
Poupouʻi ke Fakaʻaongaʻi mo Vahevahe
ʻE mahuʻingamālie taha ʻa e ngaahi akonaki ʻa Palesiteni Hingikelií ʻi he taimi ʻe fakaʻaongaʻi ai ʻe he fakafoʻituituí ʻi heʻenau moʻuí pea vahevahe mo e niʻihi kehé. Te ke lava ʻo fakaʻaongaʻi ha taha pe toe lahi ange ʻo e ngaahi fakakaukau ko ʻení:
-
ʻEke ki he kau akó pe te nau lava fēfē ʻo fakaʻaongaʻi e ngaahi akonaki ʻa Palesiteni Hingikelií ʻi honau fatongia ʻi ʻapí, ʻi he Siasí, mo ha toe ngaahi feituʻu kehe pē.
-
Fakaafeʻi ʻa kinautolu ʻoku kaú ke nau vahevahe haʻanau ngaahi aʻusia ʻi heʻenau muimui ki he faleʻi ʻa Palesiteni Hingikelií!
-
Poupouʻi e kau akó ke nau vahevahe ha niʻihi ʻo e ngaahi akonaki ʻa Palesiteni Hingikelií mo e kau mēmipa ʻo e fāmilí mo e kaungāmeʻá.
Fakaʻosi e Fealēleaʻakí
Fakamatalaʻi nounou mo mahino ʻa e lēsoní pe kole ki ha toko taha pe toko ua kehe ke nau fai ia. Fakamoʻoni ki he ngaahi akonaki ne mou aleaʻí, pea poupouʻi kinautolu ʻoku kaú ke nau fakaʻaongaʻi e meʻa ne nau akó. Te ke lava foki ʻo fakaafeʻi ha niʻihi kehe ke nau vahevahe ʻenau fakamoʻoní.
Fakamatala fekauʻaki mo e ngaahi Nāunau Maʻuʻanga Tokoní
Ko e ngaahi akonaki ʻi he tohí ni ko e toʻo fakahangatonu ia mei he ngaahi malanga mo e ngaahi fakamatala ʻa Palesiteni Kōtoni B. Hingikelī. Ko e toʻo fakahangatonu mei he ngaahi nāunau naʻe ʻosi pulusi, ʻoku kei tauhi pē ʻa e fakaʻilonga leá, sipelá, mataʻi tohi lahí, mo e fakapalakalafí ʻi he ʻuluaki tohí, tuku kehe kapau naʻe fie maʻu ha ngaahi liliu fakaʻētita pe fakataipe ke lelei ange hono laú. Te ke ala fakatokangaʻi ha fanga kiʻi fetōʻaki ʻi he founga fakamatalá koeʻuhí he ʻoku muimui pau ʻa e ngaahi kupuʻi lea ʻoku fakaʻaongaʻí ki he maʻuʻanga fakamatala kuo ʻosi pulusí. Hangē ko ʻení, ko e hoa-nauna fekauʻaki mo e ʻOtuá ʻoku mataʻitohi siʻi ʻi ha ngaahi kupuʻi lea ʻe niʻihi pea mataʻitohi lahi ʻi he niʻihi.
Naʻe faʻa ngāue ʻaki ʻe Palesiteni Hingikelī ʻa e ngaahi foʻi lea kakai tangatá, tangatá, pe faʻahinga ʻo e tangatá ki he kakaí kotoa, ʻo fakatoutatau pē ʻa tangata mo fafine. Naʻá ne faʻa ngāue ʻaki foki ʻa e hoa-nauna ko e ia, ʻene mo e ia ki he tangatá mo e fefiné fakatouʻosi. Naʻe angamaheni ʻaki e ngaahi konivēsio peheni ʻi he lea fakafonuá ʻi hono kuongá.