To Moroni Fâraa Mai
No reira, i te ruʻi i faaitehia i mua nei, oia hoi i te piti ahuru ma hoê no Setepa, i muri aʻe i toʻu taravaraa i raro no te taoto, ua pure au e ua ani au i te Atua Mana-Hope ia faaore i taʻu mau hara atoa e toʻu mau hapehape, e ia faaitehia mai toʻu huru, e ia ite au i te huru o toʻu tiʻaraa i mua iaʻna; e mea papu roa iaʻu e farii au i te faaiteraa moʻa, no te mea i farii ê na vau i te hoê faaiteraa.
E toru matahiti i muri aʻe i te orama matamua a Iosepha Semita, ua tono atura te Atua i te melahi ra o Moroni no te haapii ia Iosepha no niʻa i te faahoʻiraa mai i te evanelia a Iesu Mesia.
A tiʻaoro ai au i te Atua, ua ite ihora vau i te maramarama i te tupuraa i te rahi i roto i toʻu piha, e tae noaʻtu ua hau te maramarama o te piha i te mahana o te avatea, e i muri iho ua fâ mai te hoê taata i pihai iho i toʻu roʻi, i te tiʻa-noa-raa i roto i te reva, e aita hoi toʻna avae i taahi noaʻtu i te tahua.
E ahu roa topa noa toʻna tei hau atu i te teatea. E teatea to te reira tei hau i to te mau mea atoa taʻu i ite i roto i te ao nei, e i toʻu nei manaʻoraa aore roa e mea i te ao nei o tei tiʻa ia faaauhia mai te reira i te uouo e te anaana rahi. E mea tahaa toʻna mau manimani rima e toʻna atoa rima i niʻa rii noa aʻe i na fatiraa rima, e oia atoa toʻna avae i niʻa rii aʻe i toʻna fatiraa avae. E mea tahaa atoa toʻna upoo e toʻna atoa ra aʻi. Ite atoaʻtura vau e, o te reira anaʻe iho toʻna ahu i niʻa iaʻna, no te mea e te vai mahiti noa ra ïa , e ua ite au i toʻna ouma.
E ere ïa toʻna ahu anaʻe tei hau atu i te teatea, o toʻna tino atoa râ, ua hau atu ïa i te hanahana o te ore roa e nehenehe ia faaauhia, e toʻna mata, mai te uira ïa. Ua maramarama roa te piha, eiaha râ mai te maramarama tei faaati i toʻna tino. I toʻu hiʻo-matamua-raaʻtu i niʻa iho iaʻna, mataʻu ihora vau: aita râ i maoro, ore atura toʻu mataʻu iaʻna.
Ua faahiti mai oia i toʻu iʻoa, e na ô maira iaʻu e, e veʻa oia i tonohia mai mai mua mai i te aro o te Atua, e o Moroni toʻna iʻoa; e, e ohipa ta te Atua e horoʻa mai iaʻu ia rave; e, e haamaitaihia e, e faainohia toʻu iʻoa i rotopu i te mau nunaa atoa, te mau opu atoa, e te mau reo atoa hoi, oia hoi, e parauhia i rotopu i te mau taata atoa e, e taata maitai au e aore râ, e taata ino.
Ua parau maira oia e, te vai ra te hoê buka i papaʻihia i niʻa iho i te mau api auro, o tei hunahia i raro i te repo e o tei faaite mai i te tuatapaparaa o te feia tei parahi matamua i niʻa iho i teie nei fenua (Marite) e te fenua atoa no reira mai ratou ra. Ua faaite atoa mai oia e, tei roto i taua buka ra te îraa o te Evanelia mure ore o tei horoʻahia mai e te Faaora i taua feia tahito ra.
E, te vai ra e piti ofaʻi i roto i te fana ario. Ua haamauhia taua na ofaʻi nei i te hoê paruru ouma, e o te reira ïa tei parauhia e, e Urima e te Tumima–ua huna atoa-hia te reira i pihai iho i taua mau api ra; e o tei tapeʻa e o tei faaohipa i taua na ofaʻi ra i mutaa ihora, o tei parauhia ïa e mau “hiʻo”; e na te Atua i faaineine i te reira ei raveʻa no te iriti i taua buka ra.
I muri iho i toʻna faaiteraa mai i taua mau mea ra iaʻu, ua haamata ihora oia i te faahiti mai i te mau parau tohu o te Faufaa Tahito. Ua faahiti mai oia na mua i te hoê tufaa o te pene toru no te Malaki, e oia atoa i te pene maha, oia hoi te pene hopea, no te reira ihoa tohu ra, area râ ua huru ê rii te faahitiraa i to tei papaʻihia i roto i ta tatou nei Bibilia. Aita oia i faahiti i te irava matamua mai tei papaʻihia i roto i ta tatou mau buka; ua na ô mai ra oia:
“Inaha hoi; te fatata maira te mahana mai te umu ra i te amaraa, e te feia atoa i teʻoteʻo ra e te feia atoa i rave i te parau ino ra e ama ïa mai te aihere ra; e na ratou o te haere mai ra e tutuʻi ia ratou; te na reira maira te Iehova Sabaota ra, e ore e faatoehia te tumu e te amaʻa atoa ra.”
Ua faahiti atoa mai oia i te irava pae, i te na ôraa e: “Inaha, e tuʻu atu vau i te autahuʻaraa ia outou na roto i te rima o te peropheta ra o Eliaha, a tae atu ai i taua mahana rahi mataʻu o Iehova ra.”
Ua faahiti faahuru ê rii atoa mai oia i te irava i raro mai: “E e tuʻu hoi oia i roto i te aau o te mau tamarii te fafau i faaauhia i to ratou ra mau metua, e, e fariu hoi te aau o te mau tamarii i to ratou ra mau metua. Ahiri aita ra, e hope roa te fenua i te faainohia i toʻna taeraa mai.”
Taaê noaʻtu i teie nei mau parau tohu, ua faahiti atoa maira oia i te pene ahuru ma hoê o Isaia, i te na ô raa mai e, ua fatata roa te reira i te tupu. Ua faahiti atoa mai oia i te pene toru o te Ohipa, irava 22 e te 23, mai te au ihoa ïa i tei papaʻihia i roto i ta tatou Faufaa Apî. Ua faaite maira oia e, taua peropheta ra, o te Mesia ïa; aita râ i tae i te mahana e “tapu-ê-hiaʻtu ai mai roto atu i te taata te feia tei ore i faaroo iaʻna,” ua fatata râ.
Ua faahiti atoa maira oia i te pene piti o Ioela, mai te irava 28 e tae noaʻtu i te hopea. Ua faaite atoa mai oia e, aita te reira i tupu, ua fatata râ. E ua faaite atoa mai oia e ua fatata roa atoa te tau no te îraa o te Etene i te tae mai. E rave rahi atu â te mau irava parau taʻna i faaite mai e, e rave rahi atoa taʻna mau tatararaa o te ore e tiʻa ia faaitehia i ô nei.
Ua faaite faahou mai oia iaʻu e, ia noaa mai iaʻu taua mau api taʻna i parau maira– aita hoi i tae i te mahana e ravehiaʻi- eiaha ia faaite i te reira i te hoê noaʻtu taata; eiaha atoa i te paruru ouma e te Urima e te Tumima; maori râ ia ratou anaʻe tei faauehia mai iaʻu ra; ia ore râ vau ia haapaʻo ra, e haamouhia ïa vau. A paraparau noa mai ai oia iaʻu no niʻa i taua mau api ra, ua iritihia mai te orama i toʻu manaʻo, e ua ite au i te vahi i hunahiaʻi te mau api; e no te papu maitai hoi o toʻu hiʻoraa i te reira, ua ite papu vau i taua vahi ra iaʻu i haere atu i reira.
I muri iho i teie nei paraparauraa, ua ite ihora vau i te maramarama i roto i te piha i te faaatiraa i te tino o teie taata i paraparau mai iaʻu, e ua na reira noa e tae noaʻtu ua poiri faahou te piha, maori râ, na pihai iho iaʻna; I reira, ite oioi-atu ra vau , mai te mea ra e, i te hoê eʻa tei tae roa i niʻa i te raʻi. Ua haere atu oia i niʻa e tae noaʻtu ua moʻe roa, e ua vai faahou te piha mai te huru matamua hou taua maramarama ra no te raʻi mai i tae mai ai.
A tarava noa ai au ma te feruri i te mau mea huru ê i tupu, e te maere ra vau i te mau parau i parauhia mai e taua veʻa taa ê ra, e a feruri noa ai au ra, ua ite faahou atura vau i toʻu piha i te maramarama-faahou-raa, e ua fâ faahou mai taua veʻa no te raʻi mai ra i pihai iho i toʻu roʻi.
Ua haamata oia, e ua parau faahou mai i te mau parau iho i parauhia e aʻna i toʻna tae-matamua-raa mai, ma te faahuru ê ore i te hoê noa aʻe vahi. E oti aʻera te reira, ua faaara mai oia iaʻu i te mau faautuʻaraa rahi o te tae mai i niʻa iho i te ao nei, te mau haamouraa rarahi na roto i te oʻe, te ʻoʻe, e te maʻi; e e tae mai teie nei mau haavaraa rahi i niʻa i te ao nei i roto ihoa i teie nei uʻi. I muri iho i toʻna faaiteraa mai iaʻu i teie nei mau parau ra, ua haere faahou atura oia i niʻa i te raʻi mai to te matamua ra te huru.
I te matahiti 421 hou te Mesia, ua huna te peropheta Moroni i te mau papâ’a parau moʻa o to’na nunaa i te Aivi no Cumorah. I to’na hoʻiraa mai ei taata tei tiʻa-faahou-mai, ua faaite oia ia Iosepha Semita i te parau no te papâʻa parau tahito, e tei roto i taua buka ra te îraa o te evanelia o tei horoʻahia mai e te Faaora i te feia i tahito ra no te fenua Marite. Taua papâʻa parau ra, o te Buka a Moromona ïa.
I teie nei, no te hohonu o taua mau mea ra i roto i toʻu manaʻo, ua ore roa toʻu vareʻa taoto, e te faaea noa ra vau i niʻa i toʻu roʻi ma te maere rahi i te mau mea taʻu i ite e taʻu hoi i faaroo. E rahi faahou atura toʻu maere i toʻu ite faahou-raa i taua veʻa ra i pihai iho i toʻu roʻi. Ua faaroo vau iaʻna i te tapiti faahou-raa mai i taua ihoa mau parau ra i parauhia mai e aʻna na mua aʻera. Ua faaara mai oia iaʻu e, e tamata Satane i te faahema mai iaʻu (no te huru veve o te utuafare o toʻu metua) ia rave i te mau api auro ei raveʻa e roaa mai ai te moni. Ua opani roa maira oia iaʻu eiaha roa vau ia na reira, ia hoê noa râ toʻu hinaaro ia roaa mai te mau api iaʻu, oia hoi, ia faahanahanahia te Atua e, eiaha te hoê atu opuaraa maori râ, ia patu i toʻna ra basileia. Ia ore au ia na reira, eita ïa taua mau api e tuʻuhia mai i roto i toʻu rima.
I muri aʻe i teie fâ-toru-raa mai, ua hoʻi faahou atura oia i niʻa i te raʻi mai te huru matamua, e ua vaiiho-faahou-hia vau ia feruri i te mea maere tei tupu mai iaʻu; e i taua iho taime ra, ua aaoa ihora te moa e ua taʻa ihora iaʻu e, ua fatata te ao, e ua pau te pô taatoa i to maua paraparauraa.
I muri rii aʻe i toʻu tiʻaraa mai i niʻa i toʻu roʻi, ua haere atura vau i te ohipa o te ao i mâtauhia e au, i toʻu tamataraa râ ia rave i te ohipa, mai taʻu i rave tamau noa, ua ite au, e ua paruparu roa toʻu tino e aita i nehenehe iaʻu ia rave faahou i te ohipa. Ua ite toʻu metua, o te rave ra i te ohipa i pihai iho iaʻu, e ere au i te mea maitai, e ua faaue maira oia iaʻu ia hoʻi i te fare. Ua haere atura vau ma te manaʻo e hoʻi au i te fare; area râ, a tamata ai au i te paʻuma i niʻa i te aua no te haere i rapae i te vahi raveraa ohipa, ua pau roa toʻu puai, e ua marua vau i raro i niʻa i te fenua; e ua faaea matapoiri noa vau no te hoê taime.
Te mea matamua taʻu i ite, o te hoê ïa reo i te parauraa mai iaʻu, ma te pii mai i toʻu iʻoa. Ua hiʻo ihora vau i niʻa e ua ite faahou ihora i taua iho veʻa ra i te tiʻaraa i niʻa noa aʻe i toʻu upoo, ua faaati-faahou-hia oia i te maramarama mai te matamua ra. Ua faaite faahou maira oia i te mau mea atoa taʻna i faaite mai i te pô ra, e ua faaue maira iaʻu ia hoʻi i toʻu metua tane, e ia faaite iaʻna i taʻu orama e te mau faaueraa taʻu i farii.
Ua na reira vau; ua hoʻi atura vau i toʻu metua tane i roto i te aua ra, e ua faaite atura iaʻna i te mau mea atoa. Ua pahono maira oia iaʻu e, no ô mai i te Atua anaʻe taua mau mea ra, e ua faaue maira oia iaʻu ia haapaʻo i te mau mea i faauehia mai e taua veʻa ra. Ua faarue ihora vau i te aua, e ua haere i te vahi ta te veʻa i faaite mai iaʻu e, tei reira te vairaa o te mau api ra; e no te papu maitai o taʻu orama no niʻa i te reira vahi, ua ite oioi au i te reira i toʻu taeraa i reira.