E nāhea vau i te fa’atura i te mau ta’a-’ē-ra’a ?

Mai tē mea ē, tē vai nei te mau melo o te ’utuāfare ’e ’aore rā, tē mau hoa ’o tē parau nei ia rātou ’ei ta’ata hi’o ’ē i tōna ’āpeni, ’a pure nō te here o te Mesia ’a tūtava ai ’oe i te pe’e i tē hi’ora’a o te Fa’aora ’e i te here ia rātou. Te fa’auera’a ’ia aroha te tahi i te tahi, ’o rātou ato’a ïa tei ’ore e hi’o nei i teie nei ao mai ia tātou nei.

Mai tā tē peresideni Dallin H. Oaks i ha’api’i mai : « I roto i te mau autā’atira’a ’e i te mau huru e rave rahi o te orara’a, e tītauhia ia tātou ’ia ora ’e terā ’e terā ta’a-’ē-ra’a. Mai te mea ē, e mea faufa’a te reira, ’eiaha tātou e huna ’e ’aore rā, e fa’aru’e i tō tātou nei ta’a-’ē-ra’a, ’oia mau, ’ei feiā pe’e i te Mesia, e mea ti’a ia tātou ’ia ora ma te hau i pīha’i iho i taua mau ta’ata ra ’o tē tū’ati ’ore nei te mana’o i ni’a i tā tātou mau faufa’a ’e ’aore rā, ’o te ’ore e fāri’i i te mau ha’api’ira’a niuhia nō te reira. Tē tu’u nei te fa’anahora’a nō te fa’aorara’a a te Metua ia tātou, tā tātou i ’ite nā roto i te heheura’a, i roto i te orara’a tāhuti nei i reira e tītauhia ai ia tātou ’ia ha’apa’o i tāna mau fa’auera’a. ’O te herera’a ato’a ho’i i tō tātou mau ta’ata tupu nō terā ’e terā ta’ere, ’e terā ’e terā ti’aturira’a, mai iāna i aroha mai ia tātou nei. Mai tā te hō’ē peropheta nō te Buka a Moromona i ha’api’i mai, ’ia haere tātou i mua, ma te ‘here i te Atua ’e te ta’ata ato’a’ (2 Nephi 31:20) » (« Te herera’a ia vetahi ’ē ’e te orara’a i roto i te ta’a-’ē-ra’a », Liahona, Novema 2014, 28).