Iloilo le Tolauapiga

“Ina ia mafai e tagata taitoatasi ona tuu mai ia te aʼu se tala o le mea-tausi ua tofi atu ia te ia” (MF&F 104:12).

A o outou feiloai e iloilo le tolauapiga, o le a taitai outou e le Agaga e faaleleia ai ma aoao mai i o outou aafiaga. E tatau ona feiloai faatasi taitai uma matutua ma talavou i aso taitasi ma i le faaiuga o le tolauapiga e iloilo gaoioiga o le tolauapiga. O iloiloga o aso taitasi e tatau ona pupuu ma fesoasoani e faaleleia le tulaga manuia o aafiaga.

A o outou iloiloina o outou aafiaga o le tolauapiga, mafaufau i fesili nei:

Pe na lelei le gasologa o a tatou gaoioiga e pei ona sa fuafuaina? Aisea pe aisea foi na le lelei ai?
O a mea semanu e mafai ona faia ia sili atu ai le asō?
O le a le mea na lelei le faataunuuina?
O a mataupu faavae na tatou aoao atu, ma o a foi lesona na aoaoina e tamaitai talavou?
Pe o i ai soo se faafitauli e manaomia ona tatou foiaina?
Pe na lagona e tamaitai talavou le Agaga i le asō? Afai e leai, o le a se mea e mafai ona tatou faia taeao ia ese ai?

I le taimi o la outou fonotaga o le iloiloga i le mavae ai o le tolauapiga, fai atu fesili nei ma isi fesili e fuafua ai mea na lelei le faataunuuina ma pe mafai faapefea ona faaleleia i le tausaga e sosoo ai.

Pe na tatou ausia a tatou sini? Aisea pe aisea e leai ai?
O le a le lelei na tatou saunia ai faaleagaga?
O le a le lelei na tatou fefautuaai faatasi ai?
O a mea na a’oa’o e tamaitai talavou e uiga i le auauna atu i le tasi ma le isi?
Pe na faapefea ona faataunuuina e taitai talavou o le tolauapiga o latou tiutetauave?
Pe na faapefea ona faamalolosia ai aiga o tamaitai talavou?
O fea ma po o anafea na lagona ai e tamaitai talavou le Agaga i le tolauapiga?
O a mea e mafai ona tatou faia e fesoasoani ai i tamaitai talavou ia faaauau le iloaina ma mulimuli i le Agaga?
O a mea na tutupu i olaga o a tatou tamaitai talavou o se taunuuga o le tolauapiga?
O a manatu o ia i tatou mo le isi a tatou tolauapiga a Tamaitai Talavou?

O le a faaauau pea ona faaleleia ou aafiaga o le tolauapiga a o e tausia lelei faamaumauga. O nei faamaumauga e tatau ona aofia ai se aotelega o gaoioiga, se lipoti o le paketi, faamatalaga o femalagaaiga ma le mea na nonofo ai, meaai, numera o tagata auai, ata pue, ma afai e mafai, o molimau. O nei faamaumauga o ni punaoa taua mo i latou o e fuafuaina tolauapiga i tausaga e sosoo ai.

Valaaulia tamaitai talavou e toe mafaufau i o latou aafiaga o le tolauapiga. Uunaia i latou e faasoa atu mea sa latou a’oa’oina i o latou aiga ma uo. E ala i gaoioiga o le Motuale, e mafai ona e faaauau pea ona faaopoopo i tomai na aoaoina e tamaitai talavou i le tolauapiga. E mafai foi ona e talanoaina aoaoga faavae na aoaoina i le tolauapiga i lesona o le Aso Sa. Afai sa manuia a outou gaoioiga, mafaufau e faasoa atu i isi.