Faatomuaga i Tolauapiga a Tamaitai Talavou

“Ioe, o mai ia ia Keriso, ma faaatoatoaina ia te ia” (Moronae 10:32).

“Se puna o vai manino” ma “se vaovao o laau laiti” (Mosaea 18:5)—Sa faaaoga e Mamona upu nei e faamatala ai le nofoaga na lafi ai Alema i le mavae ai o le sola ese mai i le Tupu o Noa. O na laau ma lena vai na “matagofie … i le vaai” o tagata na faatasi atu ia Alema iina. Aisea? Aua i lena nofoaga, o Alema ma ona tagata na “o atu i le malamalama o lo latou Togiola” (Mosaea 18:30).

O le nofoaga o la outou tolauapiga a Tamaitai Talavou—pe o loo i se togavao, i se paka, i luga o se matafaga, po o totonu o se falelotu—e mafai ona avea ma mea matagofie i le vaai a tagata uma e faapotopoto ai iina. E pei o Alema ma ona tagata, e manaomia e tamaitai talavou se nofoaga lea e mafai ai ona latou potopoto faatasi, e ese mai aafiaga faalelalolagi, e lagona ai le Agaga o le Alii, tuputupu a’e i le lotogatasi ma le alofa, ma faamalosia lo latou faatuatua ma molimau i le Tama Faalelagi ma Iesu Keriso.

Ua fautuaina e le Ekalesia le tolauapiga mo tamaitai talavou. I lalo o le taitaiga a taitai perisitua ma faatasi ai ma le iloiloina o manaoga o aiga, e fuafuaina e ‘au peresitene o Tamaitai Talavou o le uarota ma siteki le taimi masani ma le umi o le polokalama o le tolauapiga. O se tolauapiga e silia ma le tasi le aso e masani lava ona faia i tausaga taitasi i tulaga faaleuarota pe faalesiteki. O isi aso po o po atoa o tolauapiga e mafai ona faia i le filifiliga a taitai perisitua e taulima ai manaoga o le lotoifale ma mea e fiafia i ai. E tatau ona faaaoga mataupu faavae o loo i totonu o le tusi lenei i fuafuaga uma.

O le tolauapiga e mo tamaitai talavou uma e agavaa e auai i le polokalama o Tamaitai Talavou. O tagata e le auai i le Ekalesia o e naunau e usitai i tulaga faatonuina o le Ekalesia e mafai foi ona faaaofia ai. E tatau i taitai ona iloilo po o le fea o tamaitai talavou e lava le matua i le aso o le tolauapiga ma valaaulia i latou e auai. E mafai ona fefautuaai faatasi matua ma taitai i soo se tuusaunoaga i le taiala o le vaitausaga ma mafaufau i le matua ma sootaga faaleuo. Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 11.2.1.3, ChurchofJesusChrist.org.)

Vaitausaga Faatulagaina: Faatasi ma le faamaoniga a o latou matua, e mafai ai e tamaitai talavou ona auai i tolauapiga a Tamaitai Talavou e amata ia Ianuari o le tausaga e atoa i ai lo latou 12.

O au peresitene o Tamaitai Talavou, taitai o le tolauapiga, ma taitai talavou o le tolauapiga e tatau ona faaaogaina mataupu faavae o i lenei taiala e fuafua ai ma faatulaga ai le tolauapiga. O nei mataupu faavae o le a fesoasoani i taitai matutua ma taitai talavou o le tolauapiga e fuafua se aafiaga mo tamaitai talavou i iunite taitasi o le Ekalesia, e tusa lava po o a nofoaga ma tulaga. O se tolauapiga e fuafuaina ma faatulagaina e tusa ai ma nei mataupu faavae musuia o le a fesoasoani i tamaitai talavou e tuputupu a’e i le talalelei a Iesu Keriso, atiae faauoga, ma faateleina le ola tutoatasi ma tomai i fafo.

E le’i nonofo Alema ma ona tagata i le Vai o Mamona, ae o o latou aafiaga i le Vai o Mamona sa tumau pea ia i latou. E faapena foi, a o toe foi atu tamaitai talavou i o latou aiga, o o latou aafiaga i le tolauapiga o le a tumau pea ia i latou ma faamalolosia ai i latou aua ua latou maua se malamalama sili o lo latou Togiola.