Mataupu Faavae o le Taitaiga o le Tolauapiga

“Ia e lotomaualalo; ma o le a taitai ai oe e le Alii lou Atua i le lima, ma tuu mai ia te oe tali i au tatalo” (Mataupu Faavae ma Feagaiga 112:10).

E mafai e le autalavou ma taitai ona avea ma taitai faamanuiaina o le tolauapiga a o latou mulimuli ai i mataupu faavae o le taitaiga o loo maua i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai: saunia faaleagaga, auai i aufono, auauna atu i isi, ma a’oa’o atu le talalelei a Iesu Keriso (tagai Tusitaulima Aoao,, 4.2 ma lesona o le taitaiga a au peresitene o vasega o loo maua i le Helps for Presidencies).

taitai o loo tatalo — O lau tapenaga faaleagaga o le a taiala ai au taumafaiga a o e fuafua ma sauni mo le tolauapiga.

Saunia Faaleagaga

I le avea ai o se taitai, e mafai ona e maua uunaiga a o e tatalo, suesue i tusitusiga paia, ma anapogi a o mafaufau ai i tamaitai talavou. Mafaufau e alu i le malumalu, pe afai e mafai. O lau tapenaga faaleagaga o le a taiala ai au taumafaiga a o e fuafua ma saunia mo le tolauapiga.

Saofagā i Aufono

O au peresitene o Tamaitai Talavou, taitai matutua o le tolauapiga, ma taitai talavou o le tolauapiga e feiloai e fefautuaai faatasi e uiga i le tolauapiga. O le fefautuaai faatasi i lenei auala e valaaulia ai uunaiga mai le Agaga Paia ma o le a fesoasoani ia te oe e iloa ai auala aoga e taulimaina ai manaoga o tamaitai talavou ma o latou aiga e ala i le tolauapiga. O i latou uma e auai i nei aufono e tatau ona lagona e faatauaina o latou manatu faaalia ma faasoa (tagai Mataupu Faavae ma Feagaiga 88:122; Tusitaulima Aoao,; 4.2.5).

Taitai Perisitua

O taitai perisitua o uarota ma siteki e i ai le tiutetauave autu mo tamaitai talavou ma e manaomia ona faamaonia uma fuafuaga mo le tolauapiga. E tatau i au peresitene o Tamaitai Talavou ona faamae’a le Fuafuaga o le Mea e Tupu ma le Gaoioiga ma fefautuaai faatasi ma maua le taitaiga mai taitai perisitua e uiga i le faamoemoega, sini, nofoaga, auiliiliga o gaoioiga, ma le faatulagaga o taimi o le tolauapiga. E tatau foi i taitai perisitua ona faamaonia taiala o le paketi ma fuafuaga mo le saogalemu ma le malupuipuiga o le tolauapiga, lea e aofia ai le filifilia o tagata talafeagai e vaavaaia ma fuafuaina tulaga faatonuina o le tolauapiga mo le amio ma laei.

E mafai e taitai perisitua ona valaau tamaitai mai le uarota ma le siteki e fesoasoani e fuafua ma faatautaia le tolauapiga (afai o le tolauapiga e na o le uarota e aofia ai, ona tatau lea ona valaauina taitai matutua mai lena uarota ae e le mai le siteki). E tatau foi ona latou fuafua mo se fuainumera e lava o taitai perisitua e auai ma asiasi i le tolauapiga. E manaomia ona i ai le toatasi po o le sili atu o le usoga o le Perisitua Mekisateko i taimi uma i le aluga o le tolauapiga e tuuina atu le lagolagosua ma le puipuiga (tagai Tusitaulima Aoao, 20.5.5). Mo gaoioiga i le po atoa, e tatau ona nonofo nei taitai perisitua i fale e ese mai [i fale] o tamaitai talavou ma taitai tamaitai matutua. E tatau i taitai perisitua ona aloese mai i tulaga o le taitoatasi ma se taitai tamaitai po o se tamaitai talavou sei vagana o loo mafai ona iloa atu e isi.

Taitai o le Tolauapiga a Tamaitai Talavou

O tamaitai i le uarota po o le siteki e tatau ona valaauina e o latou taitai perisitua ina ia taitai i le tolauapiga a Tamaitai Talavou. O nei taitai o le tolauapiga e galulue faatasi ma taitai talavou o le tolauapiga e faatulaga ma taitai le tolauapiga i lalo o le taitaiga a le au peresitene a Tamaitai Talavou.

Taitai Talavou o le Tolauapiga

O le tolauapiga o se avanoa mo tamaitai talavou e atiae ma faataitai ai tomai faaletaitai a o latou fuafua mo ma taitai i le tolauapiga. O tamaitai talavou o le vaitausaga o le 16 ma le 17 e mafai ona valaauina o ni taitai talavou o le tolauapiga. O nei taitai talavou o le tolauapiga e tatau ona i ai le tiutetauave autu mo le fuafuaina, taitaia, ma le iloiloina o le tolauapiga. Latou te fefautuaai ma le au peresitene o Tamaitai Talavou, taitai faaleuarota ma faalesiteki o le tolauapiga, ma taitai perisitua. Afai e le o i ai i se uarota po o se siteki tamaitai talavou o lenei vaitausaga, e mafai e tamaitai talavou o isi vaitausaga ona faataunuu matafaioi nei. E mafai foi e au peresitene o vasega ona maua tiutetauave faaletaitai i le tolauapiga. Mo punaoa e fesoasoani i tamaitai talavou e saunia ai mo nei taitaiga, tagai Tusitaulima Aoao, vaega 4.2 ma lesona o le taitaiga a le au peresitene o le vasega o loo maua i le Helps for Presidencies.

O tiutetauave masani o taitai talavou o le tolauapiga e aofia ai le taitai o fonotaga o fuafuaga, filifilia ma le fuafuaina o gaoioiga, faasino ma taitaia gaoioiga faapitoa, ma iloilo le tolauapiga.

Auauna Atu i Isi

“Ma sa latou aoao atu, ma auauna atu o le tasi i le isi” (3 Nifae 26:19).

A tatou auauna atu, tatou te auauna atu ma aoao atu i isi. E ala i le auauna atu, e i ai i taitai uma le avanoa i le tolauapiga e faamalolosia ai sootaga ma atinae le faatuatuaina i totonu o tamaitai talavou. O le auauna atu e manaomia ai le alofa, faauoga faamaoni, ma se manaoga e faamalolosia isi. E saunia e le tolauapiga se siosiomaga lea e mafai ai ona avea atili le tamaitai talavou e pei o le Faaola a o latou aoao e auauna atu i le tasi ma le isi. I le avea ai ma se taitai, e mafai ona avea oe ma se faataitaiga o le auauna atu a o e siitia isi, fausia le lototele e ala i upu ma amioga, filifili e onosai, fai ma se e faatupuina le filemu, aloese mai le muimui, faasoa atu le molimau, ma aapa atu i tagata uma.

Afai o oe o se taitai talavou o le tolauapiga, o loo ia te oe se avanoa sili atu e auauna atu ai i tamaitai talavou i le tolauapiga aua o oe e sili ona latalata le aofia ai i o latou aafiaga. I le avea ai o se taitai talavou o le tolauapiga, e mafai ona e auauna atu i tamaitai talavou i le tolauapiga i auala nei:

Feiloai taitoatasi ma tamaitai talavou taitasi. Faamasani ia te ia ma fesoasoani ia te ia ia malamalama i mea e faamoemoeina mai i le tolauapiga.
Tatalo mo tamaitai talavou taitasi i le igoa a o le’i faia le tolauapiga ma i aso taitasi o le tolauapiga. Ia mautinoa e faaaofia ai tamaitai talavou taitasi ma lagona le alofagia.
Faatino galuega faigofie o le agalelei ma le auauna atu.
Aoao ia tamaitai talavou e uiga i le auauna atu. Valaaulia i latou e auauna atu i le tasi ma le isi. I le faaiuga o aso taitasi faasoa ou aafiaga i le tasi ma le isi.

Aoao Atu le Talalelei a Iesu Keriso

O taitai o le tolauapiga o faiaoga e ala i le faataitaiga ma le molimau. O le tolauapiga e tatau ona faa’oaina i aoaoga faaleagaga ma le faaletino. A o e fuafua po o a mea e aoao atu i le tolauapiga, ia tatalo ma mafaufau loloto e uiga i tamaitai talavou taitasi. Tuuina atu i tamaitai talavou taitasi ia avanoa e lagonaina ai le Agaga. Fesoasoani ia te ia e faaaoga aoaoga faavae o le talalelei i aafiaga o aso uma. Aoao atu ia te ia tomai lea e saunia ai o ia mo le lumanai ma puipuia ai o ia ma lona aiga mai se faalavelave faafuasei. Po o a lava mataupu faavae e te filifili e aoao atu, ia manatua o mea uma e te faia i le tolauapiga e tatau ona fesoasoani i tamaitai talavou taitasi e ausia ai taunuuga nei (tagai foi Tusitaulima Aoao,, 11.1.1):

Faamalosia lona faatuatua ma le molimau i le Tama Faalelagi ma Iesu Keriso.
Malamalama i lona faasinomaga o se afafine o le Atua.
Ola i se olaga agavaa a o ia usitai i poloaiga ma ola i tulaga faatonuina o le talalelei.
Ia maua, iloa, ma faalagolago i uunaiga a le Agaga Paia.
Saunia mo lana matafaioi paia o se taitai, ava, ma se tinā.
Malamalama ma tausia feagaiga na ia osia.
Atiae faauoga ma maua le fiafia.