10. Kēnani ʻi he Taimi ʻo e Fuakava Motuʻá

Tani (Laisi) Naʻe fokotuʻu ʻe Selopoame ha ʻuhikiʻi pulu koula ʻi ai ke lotu ki ai ʻa e Puleʻanga ʻi he Tokelaú (1 Ng. Tuʻi 12:26–33). Ko Tani ʻa e ngataʻanga fakatokelau ʻo ʻIsileli ʻi he kuonga muʻá.

Moʻunga Kāmelí Naʻe fai ai ʻe ʻIlaisiā ʻa e pole ki he kau palōfita ʻa Pealí peá ne fakaava ʻa e ngaahi langí ke ʻuha (1 Ng. Tuʻi 18:17–46).

Mekito Ko ha feituʻu ʻo ha ngaahi fepaki lahi (Fakam. 4:13–16; 5:19; 2 Ng. Tuʻi 23:29; 2 Fkmtl. 35:20–23). Naʻe tānaki ʻe Solomone ha tukuhau ke langa hake ʻa Mekito (1 Ng. Tuʻi 9:15). Naʻe kafo ai ʻo pekia ʻa e Tuʻi ko Sosaia ʻo Siutá ʻi ha tau mo Felo Niko ʻo ʻIsipité (2 Ng. Tuʻi 23:29–30). ʻE fai ha tau lahi fakaʻosi ʻi he Teleʻa Sesililí ʻi he Hāʻele ʻAngaua mai ʻa e ʻEikí, ʻo hoko ko ha konga ʻo e tau ʻo ʻAmaketoné (Sioeli 3:14; Fakahā 16:16; 19:11–21). Ko e hingoa ʻAmaketoné ko e liliu faka-Kalisi ia mei he lea faka-Hepeluú ko e Hā Mekitone, pe Moʻunga ʻo Mekitó.

Sesilili Ko e hingoa ia ʻo ha kolo ʻi he teleʻa lahi taha mo maʻuiʻui ʻo ʻIsileli naʻe ui ʻaki ʻa e hingoa tatau pē. Naʻe langa ʻe he ngaahi tuʻi ʻo e Puleʻanga ʻi he Tokelaú ha fale fakatuʻi ʻi heni (2 Sam. 2:8–9; 1 Ng. Tuʻi 21:1–2). Naʻe nofo heni ʻa e Kuini angakovi ko Sisipelí ʻo aʻu ki heʻene pekia (1 Ng. Tuʻi 21; 2 Ng. Tuʻi 9:30).

Pete-sani Naʻe fehangahangai heni ʻa ʻIsileli mo e kakai Kēnaní ʻi he tau (Sosiua 17:12–16). Naʻe fakamaʻu ʻa e sino ʻo Saulá ki he ngaahi ʻā-maka ʻo e kolotau ko ʻení (1 Sam. 31:10–13).

Totani Naʻe fakatau atu ʻa Siosefa ʻe hono ngaahi tokouá ke hoko ko e pōpula (Sēnesi 37:17, 28; 45:4). Naʻe mamata ʻa ʻIlaisa ʻi ha meʻa-hā-mai ki he moʻunga ʻoku fonu ʻi he fanga hoosi mo e ngaahi saliote (2 Ng. Tuʻi 6:12–17).

Samēlia Ko e kolomuʻa ia ʻo e Puleʻanga ʻi he Tokelaú (1 Ng. Tuʻi 16:24–29). Naʻe langa ai ʻe he Tuʻi ko ʻĒhapí ha temipale kia Peali (1 Ng. Tuʻi 16:32–33). Naʻe ngāue ai ʻa ʻIlaisiā mo ʻIlaisa (1 Ng. Tuʻi 18:2; 2 Ng. Tuʻi 6:19–20). Naʻe hanga ʻe he kau ʻAsiliá ʻo ikunaʻi ia ʻi he taʻu 721 K.M., ʻo kakato ai hono puke pōpula ʻo e faʻahinga ʻe hongofulú (2 Ng. Tuʻi 18:9–10).

Sīkemi Naʻe fokotuʻu ai ʻe ʻĒpalahame ha ʻesi-feilaulau (Sēnesi 12:6–7). Naʻe nofo ofi mai ʻa Sēkope ki he feituʻu ko ʻení. Naʻe tāmateʻi ʻe Simione mo Līvai ʻa e kakai tangata kotoa ʻo e kolo ko ʻení (Sēnesi 34:25). Naʻe fai mai ʻi Sīkemi ʻe Sosiua ʻa ʻene naʻinaʻi ke “fili … he ʻahó ni” ke tauhi ki he ʻOtua (Sosiua 24:15). Naʻe fokotuʻu heni ʻe Selopoame ʻa e ʻuluaki kolomuʻa ʻo e Puleʻanga ʻi he Tokelaú (1 Ng. Tuʻi 12).

Moʻunga ʻIpalé mo e Moʻunga Kelisimí Naʻe vahevahe ʻe Sosiua ʻa ʻIsileli ʻi he ongo moʻunga ko ʻení—naʻe fakahā mai ʻa e ngaahi tāpuaki ʻo e fonó mei he Moʻunga Kelisimí, kae fakahā mai ʻa e ngaahi tauteá mei he Moʻunga ʻIpalé (Sosiua 8:33). Naʻe toki langa ʻe he kakai Samēliá ki mui ha temipale ʻi Kelisimi (2 Ng. Tuʻi 17:32–33).

Penueli (Penieli) Naʻe fefaʻuhi heni ʻa Sēkope ʻi he pō kotoa mo ha talafekau ʻa e ʻEikí (Sēnesi 32:24–32). Naʻe fakaʻauha ʻe Kitione ha kolotau ʻo e kau Mitianí (Fakam. 8:5, 8–9).

Siopa Naʻe folau atu mei heni ʻa Siona ki Tāsisi koeʻuhí ke hola ai mei he fekau ke ʻalu ʻo malanga ki Ninivé (Siona 1:1–3).

Sailo Naʻe tuʻu heni ʻa e kolomuʻa ʻo ʻIsilelí pea tuʻu ai mo e tāpanekalé lolotonga ʻa e taimi ʻo e kau Fakamāú (1 Sam. 4:3–4).

Pēteli (Lusa) Naʻe māvae heni ʻa ʻĒpalahame mo Lote (Sēnesi 13:1–11), peá ne mamata ai ki ha meʻa-hā-mai (Sēnesi 13; ʻĒpa. 2:19–20). Naʻe mamata ai ʻa Sēkope ki ha meʻa-hā-mai ʻo ha fuʻu tuʻunga ʻoku aʻu ki he langí (Sēnesi 28:10–22). Naʻe ʻi ai ʻa e taimi ʻe taha naʻe fokotuʻu heni ʻa e tāpanekalé (Fakam. 20:26–28). Naʻe fokotuʻu ʻe Selopoame ha ʻuhikiʻi pulu koula heni ke lotu ki ai ʻa e Puleʻanga ʻi he Tokelaú (1 Ng. Tuʻi 12:26–33).

Kipione Naʻe kākaaʻi ʻe he kakai Hevi ʻi he feituʻu ko ʻení ʻa Sosiua ʻo nau fai ha alea fakamelino (Sosiua 9). Naʻe tuʻu maʻu ʻa e laʻaá lolotonga hono ikunaʻi ʻe Sosiua ʻa e taú (Sosiua 10:2–13). Naʻe fokotuʻu fakataimi foki heni ʻa e tāpanekalé (1 Fkmtl. 16:39).

Kasa, ʻAsitoti, ʻAsikaloni, ʻEkiloni, Kati (ko e ngaahi kolo ia ʻe nima ʻo e kau Filisitia) Naʻe faʻa langa tau ʻa e kau Filisitiá ki ʻIsilelí mei he ngaahi kolo ko ʻení.

Pētelihema Naʻe tanu ofi mai ʻa Lesieli ki heni (Sēnesi 35:19). Naʻe nofo heni ʻa Lute mo Pōasi (Lute 1:1–2; 2:1, 4). Naʻe ui ia ko e kolo ʻo Tēvitá (Luke 2:4).

Hepeloni Naʻe nofo heni ʻa ʻĒpalahame (Sēnesi 13:18), ʻAisake, Sēkope (Sēnesi 35:27), Tēvita (2 Sam. 2:1–4), mo ʻApisalomi (2 Sam. 15:10). Ko e ʻuluaki kolomuʻa ʻeni ʻo Siuta ʻi he pule ʻa e Tuʻi ko Tēvitá (2 Sam. 2:11). ʻOku pehē naʻe tanu heni ʻa ʻĒpalahame, Sela, ʻAisake, Lepeka, Sēkope, mo Lia ʻi he ʻana ko Makipilá (Sēnesi 23:17–20; 49:31, 33).

ʻEni-keti Naʻe toitoi ai ʻa Tēvita meia Saula, peá ne fakahaofi ʻa e moʻui ʻa Saulá (1 Sam. 23:29–24:22).

Kela Naʻe nofo heni ʻa ʻĒpalahame mo ʻAisake ʻi ha kiʻi taimi siʻi (Sēnesi 20–22; 26).

Peasipa Naʻe keli ʻe ʻĒpalahame ha vai keli ʻi heni peá ne fai ai ha fuakava mo ʻApimeleki (Sēnesi 21:31). Naʻe mamata ai ʻa ʻAisake ki he ʻEikí (Sēnesi 26:17, 23–24), pea naʻe nofo heni mo Sēkope (Sēnesi 35:10; 46:1).

Sōtoma mo Komola Naʻe fili ʻa Lote ke nofo ʻi Sōtoma (Sēnesi 13:11–12; 14:12). Naʻe fakaʻauha ʻe he ʻOtuá ʻa Sōtoma mo Komola koeʻuhi ko ʻenau fai angahalá (Sēnesi 19:24–26). Naʻe ngāue ʻaki ʻe Sīsū ki mui ʻa e ongo kolo ko ʻení ʻo hoko ko e taipe ʻo e fai angahalá (Mātiu 10:15).