13. Mibembo ya Mosala ya Misionele ya Apostolo Paulo

Gaza Filipo ateyaki Klisto mpe abatisaki mokube ya Etiopia na nzela na ye na Gaza (Mis. 8:26–39).

Yelusaleme Tala kalati 12 mpo na makambo na Yelusaleme.

Yafo Petelo azwaki limoni ete Nzambe apesaka likabo ya boyamboli na baoyo bazali Bayuda-te (Mis. 10; 11:5–18). Petelo asekwisaki Tabita uta na bakufi (Mis. 9:36–42).

Samalia Filipo asalaki na Samalia (Mis. 8:5–13), mpe Petelo mpe nsima Yoane ateyaki awa (Mis. 8:14–25). Esilaki bango kopesa likabo ya Molimo Mosantu, Simona moto ya ndoki alukaki kosomba likabo oyo uta na bango (Mis. 8:9–24).

Kaisalia Awa, esilaki anjelu kosalela kapitene na nkombo ya Koloneli, Petelo apesaki nzela ete abatisama (Mis. 10). Awa Paulo asambaki liboso ya Akalipa (Mis. 25–26; tala lisusu JS—Mambi ya Kala 1:24–25).

Damaseke Yesu amonanaki na Saulo (Mis. 9:1–7). Esilaki Anania kozongisa bomoni ya Saulo, Saulo abatisamaki mpe abandaki mosala na ye (Mis. 9:10–27).

Antiokia (na Sulia) Awa bayekoli babiangamaki mbala ya yambo Baklisto (Mis. 11:26). Agaba asakoli nzala (Mis. 11:27–28). Bokabwani bonene bobimaki na Antiokia mpo na oyo etali ganza (Mis. 14:26–28; 15:1–9). Na Antiokia Paulo abandaki etinda na ye ya mibale elongo na Silasi, Balanaba, mpe Yuda Balasaba (Mis. 15:22, 30, 35).

Talasia Mboka engumba ya Paulo; Paulo atindamaki awa na Bandeko bandimi mpo na kobatela bomoi na ye (Mis. 9:29–30).

Kupulu Esilaki bango konyokwama, boko Basantu bakimaki na esanga oyo (Mis. 11:19). Paulo asalaki mobembo na nzela ya Kupulu na mobembo na ye ya yambo (Mis. 13:4–5), lokola esalaki mpe nsima Balanaba mpe Malako (Mis. 15:39).

Pafa Paulo alakelaki moto ya ndoki moko mabe awa (Mis. 13:6–11).

Delebe Paulo mpe Balanaba bateyaki nsango malamu na engumba oyo (Mis. 14:6–7, 20–21).

Lusutula Ntango Paulo abikisaki motengoli moko, ye mpe Balanaba bapesamaki longonia lokola banzambe. Paulo abambamaki mabanga mpe bakanisaki ete akufi kasi azongaki na bomoi mpe akobaki koteya (Mis. 14:6–21). Epayi na Timote (Mis. 16:1–3).

Ikoni Na misio na bango ya yambo, Paulo mpe Balanaba ateyaki awa mpe bakanamaki kobambama mabanga (Mis. 13:51–14:7).

Laodikia mpe Kolose Laodikia ezali moko ya bitape ya Eklezia oyo Paulo akendaki kotala mpe epayi wapi azwaki mikanda (Kolos. 4:16). Ezali lisusu moko ya bingumba sambo oyo etangami na buku ya Emoniseli (misusu ezali Efese, Sumulana, Pelegamo, Twatila, Salade, mpe Filadelefi; tala Emon. 1:11). Kolose ezali kilometele 18 na esti ya Laodikia. Paulo akomaki epayi ya basantu baoyo bazalaki awa.

Antiokia (na Pisidia) Na miso ya yambo, Paulo mpe Balanaba bateyaki Bayuda ete Klisto ayaki uta nkona ya Dawidi. Paulo apesaki nsango malamu na Yisalaele, nsima na baoyo bazalaki Bayuda-te. Paulo mpe Balanaba baniokwamaki mpe batengolamaki (Mis. 13:14–50).

Milete Wana ezalaki ye awa na misio ya misato, Paulo akebisaki bampaka ya Eklezia ete “bambwa ya zamba ya kanda” bakokota kati na etonga (Mis. 20:29–31).

Patamo Yoane azalaki mokangemi na boloko na esanga oyo ntango azwaki mamoni oyo ezwami sikawa kati na buku ya Emoniseli (Emon. 1:9).

Efese Apolo ateyaki awa na nguya (Mis. 18:24–28). Paulo, na misio na ye ya misato, alakisaki na Efese mibu mibale, kobongwanaka bato mingi (Mis. 19:10, 18). Awa apesaki likabo ya Molimo Mosantu na kotiaka maboko (Mis. 19:1–7) mpe asalaki makamwisi mingi, kotangaka mpe kobengana milimo mabe (Mis. 19:8–21). Awa bakumbameli ya Diana babimisaki mobulu na Paulo (Mis. 19:22–41). Ndambo ya buku ya Emoniseli etindamaki mpo na Eklezia na Efese (Emon. 1:11).

Toloa Wana ezalaki Paulo awa na mobembo na ye ya mibale, amonaki limoni ya moto moko ya Makedonia kosengaka lisalisi (Mis. 16:9–12). Wana ezalaki ye awa na miso na ye ya mibale, Paulo asekwisaki Yutuku uta na bakufi (Mis. 20:6–12).

Filipo Paulo, Silasi, mpe Timote babongolisaki mwasi moko na nkombo ya Ludi, babenganaki molimo mabe, mpe babetamaki (Mis. 16:11–23). Bazwaki lisalisi ya Nzambe mpo na kokima na boloko (Mis. 16:23–26).

Atene Paulo, wana ezalaki ye na miso na ye ya mibale na Atene, ateyaki na Ngomba ya Alei (Ayelopage) na ntina ya “nzambe oyo ayebani te” (Mis. 17:22–34).

Kolinti Paulo akendaki na Kolinti na misio na ye ya mibale, wapi atikalaki na Akula mpe Pilisikila. Ateyaki awa mpe abatisaki bato mingi (Mis. 18:1–18). Uta Kolinti, Paulo akomaki mokanda na ye na Baloma.

Tesaloniki Paulo ateyaki awa na ntango ya mobembo mpo na mosala na ye ya misionele ya mibale. Lingomba na ye ya bamisionele bakendaki na Beloya nsima ya Bayuda kokanela kobebisa bokengi na bango (Mis. 17:1–10).

Beloya Paulo, Silasi, mpe Timote bakutaki milimo ya lokumu mpo na koteya na ntango ya mobembo ya misionele ya Paulo ya mibale. Bayuda uta na Tesaloniki balandaki mpe baniokolaki bango (Mis. 17:10–13).

Makedonia Paulo ateyaki awa na mibembo ya mibale mpe misato (Mis. 16:9–40; 19:21). Paulo asanzolaki motema ya bokabi ya Basantu ya Makedonia, baye bapesaki na ye mpe na Basantu na Yelusaleme (Lom. 15:26; 2 Kol. 8:1–5; 11:9).

Melita Paulo azindaki kati na mai na esanga oyo na nzela na ye na Loma (Mis. 26:32; 27:1, 41–44). Aswamaki te na nioka mpe abikisaki mingi baoyo bazalaki bakoni na Melita (Mis. 28:1–9).

Loma Paulo ateyaki awa mibu mibale na boloko na ndako na ye (Mis. 28:16–31). Akomaki lisusu mikanda na Baefese, Bafilipi, mpe Bakolose mpe na Timote mpe Filemona wana ezalaki ye na boloko na Loma. Petelo akomaki mokanda na ye ya yambo uta “Babiloni” oyo ekoki mbele kozala Loma, kala mingi te nsima ya monyokoli ya Baklisto na Nelo na 64 ya Mobu ya Nkolo. Endimami mingi na bato ete Petelo na Paulo babomamaki lokola bamartiru awa.