17. Moʻunga Kelisimí mo e Moʻunga ʻIpalé
Hanga fakahihifo. ʻOku tuʻu ʻi he toʻohemá ʻa e Moʻunga Kelisimí pea ʻi he toʻomataʻú ʻa e Moʻunga ʻIpalé. ʻOku hā ʻi he tā ko ʻení ʻa e kolo ko Napelusi ʻi he ʻahó ni. Naʻe tuʻu ʻa e kolo ʻi he kuonga muʻa ko Sīkemí ʻi he teleʻa ʻi lalo ʻi he vahaʻa ʻo e ongo moʻungá.
Ngaahi Meʻa Mahuʻinga naʻe Hoko aí: Naʻe mālōlō ʻa ʻĒpalahame ʻi Sīkemi (Sēnesi 12:6–7). Naʻe mālōlō heni ʻa Sēkope peá ne fakatau ha konga fonua (Sēnesi 33:18–20). Naʻe hoko ʻa e Moʻunga Kelisimí ko e moʻunga ʻo e tāpuakí, kae hoko ʻa e Moʻunga ʻIpalé ko e moʻunga ʻo e fakamalaʻiá (Teut. 27–28). Naʻe fokotuʻu ʻe Siosiua ʻi he Moʻunga ʻIpalé ha maka-fakamanatu ʻa ia naʻe tohi ai ʻa e fono ʻa Mōsesé peá ne lau ʻa e fonó ki he kakai ʻIsilelí (Siosiua 8:30–35). ʻOku tanu ʻa e ngaahi hui ʻo Siosefá ʻi Sīkemi (Siosiua 24:32).
17. Moʻunga Kelisimí mo e Moʻunga ʻIpalé ʻOku tuʻu ʻa e ongo moʻunga ko ʻeni ʻo hanga hifo ki he kolo ko Sīkemi ʻo e kuonga muʻá, ʻa ia naʻe tanu ai ʻa e ngaahi hui ʻo Siosefá (vakai ki he Siosiua 24:32).