23. Tahi ʻo Kālelí mo e Moʻunga ʻo e Malanga ʻi he Moʻungá

Hanga fakatonga-hihifo ki he tuliki fakatokelau-hihifo ʻo e Tahi ʻo Kālelí, ʻa ia ko ha ano vai ia ʻo e vai melie. ʻOku tuʻu ʻa Taipiliō ʻi he kauvai ʻe tahá pea ki he tuliki taupotu ki toʻohema ʻo e taá. Ko e kiʻi moʻunga ko ia ʻi lotomālié ko e kiʻi moʻunga ia ʻoku lau ko e Moʻunga ʻo e Malanga ʻi he Moʻungá. ʻOku tuʻu ʻa Kapaneume mei he toʻohemá, ka ʻoku ʻikai ʻasi ia ʻi he taá.

Ngaahi Meʻa Mahuʻinga naʻe Hoko aí: Naʻe fakahoko ʻe he Fakamoʻuí ha konga lahi ʻo ʻene ngāue fakafaifekau ʻi he moʻui fakamatelié ʻi he feituʻu ko ʻení. Naʻá ne ui mo fakanofo ai ʻa e Kau ʻAposetolo ʻe Toko Hongofulu-Mā-Uá (Mātiu 4:18–22; 10:1–4; Maʻake 1:16–20; 2:13–14; 3:7, 13–19; Luke 5:1–11); naʻa Ne akoʻi ai ʻa e Malanga ʻi he Moʻungá (Mātiu 5–7); pea akonaki ai ʻi he ngaahi talanoa fakatātā (Mātiu 13:1–52; Maʻake 4:1–34). Naʻá Ne fai ha ngaahi mana ʻi ai, ʻa ia naʻe kau ai ʻa ʻene: fakamoʻui ha tangata kilia (Mātiu 8:1–4); lolomi ʻa e matangí (Mātiu 8:23–27); kapusi ʻa e kau tēvoló mei ha talavou, pea nau ʻalu ʻo hū ʻi he fanga puaka ʻo nau lele ʻo tō ki he tahí (Maʻake 5:1–15); fokotuʻu hake mei he maté ʻa e ʻofefine ʻo Sailosí (Mātiu 9:18–19, 23–26; Maʻake 5:22–24, 35–43); fafanga ʻa e toko 5,000 mo e toko 4,000 (Mātiu 14:14–21; 15:32–38); fekau ʻene kau ākongá ke nau lī ʻenau kupengá, pea nau maʻu ai ʻa e ika lahi ʻaupito (Luke 5:1–6); fakamoʻui ʻa e fuʻu kakai tokolahi (Mātiu 15:29–31; Maʻake 3:7–12); ); hā mai ʻi he hili ʻene toetuʻú ke akoʻi ʻene kau ākongá. (Maʻake 14:27–28; 16:7; Sione 21:1–23).