31. ʻEfesō
Ko e toenga ʻo e fale faiva Kiliki ʻi ʻEfesō, ʻa ia naʻe malanga ai ʻa e ʻAposetolo ko Paulá. Naʻe ʻiloa ʻa ʻEfesō ʻi he māmaní kotoa ʻi he taimi ʻo e Fuakava Foʻoú, koeʻuhi ko hono temipale fakaʻofoʻofa ʻa ia naʻe langa ko hono fakalāngilangiʻi ʻo e ʻotua fefine hīteni ʻo e kau Lomá ko Taiená. Kuo maumau ʻa ʻEfesō he taimí ni, ka naʻe hoko ia ko e kolomuʻa ʻo e vahefonua ʻo e kau Lomá ʻi ʻĒsia pea ko e feituʻu pisinisi ʻiloa ia. Naʻe maʻu koloa ʻa e pisinisi ʻa e kau tufunga ngaohi siliva ʻo e koló ʻi heʻenau fakatau atu ʻa e ngaahi ʻīmisi ʻo Taiená.
Ngaahi Meʻa Mahuʻinga naʻe Hoko aí: Naʻe ʻaʻahi ʻa e ʻAposetolo ko Paulá ki ʻEfesō ʻi he ofi ki he ngataʻanga ʻo ʻene fononga fakafaifekau hono uá (Ngāue 18:18–19). Naʻá ne nofo ʻi he koló ʻi ha taʻu ʻe ua ʻi heʻene fononga fakafaifekau hono tolú. Naʻe fakamālohiʻi ia ke ne ʻalu mei ai ʻi hono fakatupu ʻe he kau tufunga ngaohi silivá, he naʻe mole ʻenau pisinisí koeʻuhi ko e ngaahi malanga ʻa Paula ke taʻofi ʻa e lotu ki he ʻotua loi ko Taiená (Ngāue 19:1, 10, 23–41; 20:1). Ko e fale faiva ʻo ʻEfesoó, ko e fale faiva lahi taha ia kuo langa ʻe he kau Kilikí, pea ko e feituʻu ia naʻe fehangahangai ai ʻa e kaungā faifekau ʻo Paulá mo e kau fakatangá (Ngāue 19:29–31). Naʻe fai ʻe Paula ha tohi ki he kāingalotu ʻo e Siasí ʻi ʻEfesō lolotonga hono puke pōpula ia ʻi Lomá. Ko e taha ʻo e ngaahi vaʻa ʻe fitu ʻo e Siasí ʻi ʻĒsia ʻa ia naʻe fakataumuʻa ki ai ʻa e tohi ʻo e Fakahaá, naʻe tuʻu ia ʻi ʻEfesō (Fakahā 1:10–11; 2:1).
31. ʻEfesō Naʻe malanga heni ʻa Paula ke taʻofi ʻa e tauhi tamapuá peá ne fakaʻitaʻi ai ʻa e kau ngāue fakameaʻa silivá, ʻa ia naʻe maʻu ʻenau moʻuí mei hono fakatau atu ʻo e ngaahi ʻīmisi ʻo e ʻotua fefine ko Taiená (vakai ki he Ngāue 19:24–41).