1 Na ɔbɛba dɛ, sɛ Amanamamfo no betsie Nyame Eguambaa no wɔ da a ɔbɛda no ho edzi akyerɛ hɔn wɔ kasa mu, nye tum nye ndzeyɛɛ so mu, dze eyi hɔn fintsidua no efi hɔ—

2 Na worimmpirim hɔn akoma nntsia Nyame Eguambaa no a, wɔbɛkan hɔn afora w’egya n’asefo: nyew, wɔbɛkan hɔn afora Israel fifo na wɔbɛyɛ nhyira mba wɔ anohoba asaase no do afebɔɔ; wɔnye hɔn remmba ndɔmmum mu bio; na Israel fifo enyim runngu ase bio.

3 Na mona kɛse no a mbusu asɔr kɛse no a, abɔnsam na ne mba kyekyeree no etu dɛ wɔdze rotwe akra akɔ hɛl no—nyew, dɛm mona kɛse no a woetu dɛ wɔdze resɛɛ adasa no, hɔn a wotui noara na wɔbɛhyɛ no mã, dze hɔn akɔ ɔsɛɛ kɛse mu, Nyame Eguambaa no na ɔse; ɔkra no rennsɛɛ, gyedɛ wɔatow no akyen hɛl a onnyiewiei no mu.

4 Na hwɛ, dɛm na abɔnsam no ndɔmmumfa tse, na eso dɛm na Nyankopɔn ne pɛrpɛryɛ tse wɔ hɔn a wɔbɛyɛ emumuyɛdze na ekyiwadze wɔ n’enyim no.

5 Na ɔbaa dɛ sor ɔbɔfo no kasaa kyerɛɛ emi, Nephi, dɛ: Ehu dɛ sɛ Amanamamfo no nu hɔnho a obesi hɔn yie; na ɔwoara so inyim dza ɔfa no ahyɛmu a Ewuradze nye Israel fifo edzi no; na atse so dɛ obiara a oennu noho no ɔbɛhera.

6 Dɛm ntsi, Amanamamfo no ndue sɛ ɔba no dɛ wopirim hɔn akoma dze tsia Nyame Eguambaa no a.

7 Na ber no reba, Nyame Eguambaa no na ɔse, dɛ mebɛyɛ ndwuma a ɔsõ na ɔyɛ nwanwa wɔ adasamba mu; ndwuma a ɔbɛyɛ daapem dze, wɔ nsa afã ha anaa ha—dɛ ɔbɛyɛ nkuranhyɛ a ɔdze asomdwee bɛbrɛ hɔn nye nkwa a onnyiewiei mu, anaaso, dɛ ɔbɛgye hɔn efi hɔn akomadzen na hɔn adwen a efura no a ɔdze hɔn kɔr ndɔmmum mu no, na ɔsɛɛ so mu, wɔ honam na sunsum afamu nyinara, dɛ mbrɛ abɔnsam no ndɔmmumfa no a makã ho asɛm no tse.

8 Na ɔbaa dɛ aber a sor ɔbɔfo no kãa dɛm nsɛm yi ekyir no, ɔsee me dɛ: Ana ekaa ahyɛmu no a Egya no nye Israel fifo dzii no? Mekãa kyerɛɛ no dɛ, Nyew.

9 Na ɔbaa dɛ ɔsee me dɛ: Hwɛ, na hu mbusu asɔr kɛse no a ɔyɛ ebusudze, ne nã no a ne fapem nye abɔnsam no.

10 Na ɔsee me dɛ: Hwɛ aka asɔr ebien ara; kor nye Nyame Eguambaa no n’asɔr, na kor no so nye abɔnsam n’asɔr; dɛm ntsi obiara a ɔnndɔm Nyame Eguambaa no n’asɔr no nna ɔdɔm asɔr kɛse no a ɔyɛ mbusudze ne nã no; na ɔyɛ asaase nyinara do edwaman no.

11 Na ɔbaa dɛ mohwɛe na muhun asaase nyinara do edwaman no, na ɔtse esu pii no enyi; na ɔwɔ tum wɔ asaase nyinara do, wɔ aman nyinara do, ebusuafo, kasa horow na nyimpa nyinara do.

12 Na ɔbaa dɛ muhun Nyame Eguambaa n’asɔr no, na no dodow suar, osian edwaman no a ɔtsena esu pii do no n’emumuyɛ na n’ebusudze ntsi; naaso, muhun dɛ Eguambaa no, n’asɔr no a no mu mba yɛ Nyankopɔn n’ahotseweefo no wɔ asaase nyina enyi do, na hɔn tum a wɔwɔ wɔ asaase enyi do no suar, osian edwaman kɛse no a muhun no n’emumuyɛ ntsi.

13 Na ɔbaa dɛ muhun dɛ mbusubɔfo no hɔn nã kɛse no aboaboa dɔmtutuw a wɔwɔ asaase nyinara enyi no ano wɔ Amanamamfo no hɔn amanaman no nyinara mu, dɛ wɔrobɔkõ etsia Nyame Eguambaa no.

14 Na ɔbaa dɛ emi, Nephi, muhun Nyame Eguambaa no no tum, dɛ oesian aba Eguambaa no n’asɔrmba a wɔyɛ ahotseweefo no do, nye Ewuradze n’ahyɛmu mba no a wɔapetse wɔ asaase nyinara enyi no do; na wɔdze ndzeyɛtsenenee na enyimnyam nye Nyankopɔn no tum kɛse ayɛ akotar,

15 Na ɔbaa dɛ muhun dɛ Nyankopɔn ehue n’ebufuhyew egu mbusu asɔr kɛse no do araa ma akõkoekõ na akosɛm ahyɛ aman nyinara na ebusua a wɔwɔ asaase yi nyinara do mã.

16 Na ber a akõkoekõ na akosɛm hyɛɛ ase wɔ amanaman a wɔyɛ mbusubɔfo hɔn nã dze, no hɔn mu no, sor ɔbɔfo no see me dɛ: Hwɛ, Nyankopɔn n’ebufuhyew aba ndwaman hɔn nã do; na hwɛ, ehu dɛm ndzɛmba yi nyinara—

17 Na da no bɛba a Nyankopɔn bohue n’ebufuhyew egu ndwamambɔfo hɔn nã do, ɔno a ɔyɛ mbusu asɔr kɛse no a ɔwɔ asaase nyinara do no, dza abɔnsam yɛ ne fapem no, da no na Egya no bɛhyɛ n’edwuma ase, dze esiesie kwan ma n’ahyɛmu no aaba mu, dza ɔnye no nkorɔfo a wɔyɛ Israel fifo dzii no.

18 Na ɔbaa dɛ sor ɔbɔfo no see me, dɛ: Hwɛ!

19 Na mohwɛe na muhun banyin bi, na ɔhyɛ atar fitaa.

20 Na sor ɔbɔfo no see me dɛ: Hwɛ Eguambaa n’asomafo duebien no mu kor.

21 Hwɛ, obohu na ɔakyerɛw ndzɛmba yi mu dza aka ekyir no; nyew, na ndzɛmba pii so a esi nyinara.

22 Na ɔbɛkyerɛw dza ɔfa wiadze n’ewiei so ho.

23 Dɛm ntsi, dza ɔbɛkyerɛw no dzi mu na ɔyɛ nokwar; na hwɛ wɔakyerɛw no wɔ nwoma no a ihun dɛ ofi Jewnyi n’anomu no; na aber no a ofi Jewnyi no n’anomu no, anaa dɛ, aber a nwoma no rifi Jewnyi no n’anomu no, na ndzɛmba no a wɔakyerɛw no yɛ pefee na ɔyɛ krɔnkrɔn na ɔsom bo mapa na ɔgow ma ɔdasanyi biara ne ntseasee.

24 Na hwɛ, ndzɛmba a Eguambaa no somafo yi bɛkyerɛw no yɛ ndzɛmba pii a w’ankasa ehu; na hwɛ dza aka no nyinara so ibohu.

25 Mbom ndzɛmba a ibohu no ekyir yi no mma nnkyerɛw; na Ewuradze Nyankopɔn ahyehyɛ ato hɔ ama Nyame Eguambaa no somafo no dɛ ɔno na ɔsɛ dɛ ɔkyerɛw.

26 Na binom so wɔ hɔ a woeyi ndzɛmba nyinara akyerɛ hɔn, na wɔakyerɛw; na wɔasɔw ano araa dze ekesi dɛ wobeyi epue wɔ ne mber pa mu dɛ mbrɛ nokwar no tse wɔ Eguambaa no mu, na Ewuradze noara ne mber a ɔsɛ mu na ɔdze bɛma Israel fifo.

27 Na emi, Nephi, metsee na megye ho dase, dɛ Eguambaa no somafo no nye John, dɛ mbrɛ sor ɔbɔfo n’asɛm no tse.

28 Na hwɛ, emi, Nephi, wɔabra me dɛ mma mennkyerɛw ndzɛmba nkaa no a muhunii na metsee no; dɛm ntsi dza makyerɛw yi dɔɔ sõ ma me; na mbom ndzɛmba a muhunii no ne fã kakrabaabi ara na makyerɛw.

29 Na megye dase dɛ muhun ndzɛmba a m’egya hunii no, na Ewuradze no bɔfoe no na ɔmaa muhunii.

30 Na afei medze me kasaa aba ewiei wɔ dza ɔfa no ndzɛmba a muhunii wɔ aber a Sunsum no hwiim me kɔree no; na sɛ ndzɛmba a muhunii no nyinara wɔannkyerɛw a, dza makyerɛw yi yɛ nokwar. Na dɛm na ɔtse. Amen.