1 Ket napasamak a nagdaliasatkami manen iti langalang; ket nagtultuloy ti panagdaliasatmi iti agarup agpadaya manipud kadayta a kanito. Ket nagdaliasatkami ken nagpasar ti adu a rigrigat iti langalang; ket nagpasngay dagiti assawami iti langalang.

2 Ket naindaklan unay ti parabur ti Apo kadakami, ta nagbiagkami babaen ti saan a naluto a karne iti langalang, nakaited dagiti assawami iti adu a susuen kadagiti tagibida, ket napigsada, wen, uray pay a kas dagiti lallaki; ket rinugianda iti panagdaliasatda nga awan iti panagdayamudom.

3 Ket ngarud mabigbigmi a nasken a matungpal dagiti bilin ti Dios. Ket no tungpalen ti annak ti tattao dagiti bilin ti Dios, taraonanna ida, ken papigsaenna ida, ken ipaayna ti wagas tapno matungpalda dagiti banag nga imbilinna kadakuada; gapuna, nangipaay isuna ti pamuspusan bayat ti panagnaedmi iti langalang.

4 Ket nagnaedkami iti uneg ti adu a tawen, wen, walo a tawen iti langalang.

5 Ket nakadanonkami iti daga nga inawaganmi iti Bountiful, gapu ta adu ditoy ti bunga, ken kasta met ti atap a diro; ket insagana ti Apo amin dagitoy a bambanag tapno saankami a matay. Ket nakitami ti taaw, nga inawaganmi iti Irreantum, a, ti pakaipatarusna ket adu a danum.

6 Ket napasamak nga impatakdermi dagiti toldami iti igid ti baybay, ket nupay nagsagaba kami ti adu a rigrigat ken adu a pakarikutan, wen, uray pay a saanmi a maisurat amin dagitoy, napalaus ti panagrag-omi idi makadanonkami iti igid ti baybay; ket inawaganmi ti lugar iti Bountiful, gapu iti kinaadu ti bunga ditoy.

7 Ket napasamak a kalpasan a siak, ni Nephi, bayat ti kaaddak iti daga ti Bountiful iti sumagmamano nga aldaw, nangngegko ti timek ti Apo, a kinunana: Bumangonka, ket summang-atka iti bantay. Ket napasamak a bimmangonak ket simmang-atak iti bantay, ket immararawak iti Apo.

8 Ket napasamak a nagsao ti Apo kaniak, a kunana: Mangbangonka iti bapor, a mayannurot iti wagas nga ipakitakto kenka, tapno maiballasiwko dagiti tattaom kadagitoy a danum.

9 Ket kinunak: Apo, sadino ti papanak a pakasapulak ti lunagek a minas, tapno makaaramidak kadagiti ramit a pangbangon iti bapor a mayannurot iti wagas nga impakitam kaniak?

10 Ket napasamak nga imbaga ti Apo kaniak iti pakasapulak iti minas, tapno makaaramidak kadagiti ramit.

11 Ket napasamak a siak, ni Nephi, nangaramidak iti anguyob a pangyubyob iti apuy, manipud iti lalat ti ayup; ket kalpasan ti panagaramidko iti anguyob, a pangyubyobko iti apuy, pinagpingkik ti dua a bato tapno makaparnuayak iti apuy.

12 Ta saan nga impalubos ti Apo ti panagaramidmi iti adu nga apuy, bayat iti panagdaliasatmi iti langalang; gapu ta kinunana: Pasam-itekto dagiti taraonyo tapno saanyo a lutuen idan.

13 Ket siakto pay ti silawyo iti langalang; ket isaganakto ti dalan a pagnaanyo no la ket tungpalenyo dagiti bilinko; gapuna, no la ket tungpalenyo dagiti bilinko, maiturongkayonto iti naikari a daga; ket maammuanyonto a babaen kaniak a naiturongkayo.

14 Wen, ket kinuna pay ti Apo a: Kalpasan ti idadatengyo iti naikari a daga, maammuanyonto a siak, ti Apo, ket Dios; ken siak, ti Apo ti nangisalakan kadakayo manipud iti pannakadadael; wen, a siak ti nangiruar kadakayo iti daga ti Jerusalem.

15 Gapuna, siak, ni Nephi, inkagumaak unay ti nagtungpal kadagiti bilin ti Apo, ken inallukoyko dagiti lallaki a kakabsatko iti kinapudno ken kinaregta.

16 Ket napasamak a nagaramidak iti ramramit babaen iti minas a linunagko manipud iti bato.

17 Ket idi nakita dagiti lallaki a kakabsatko nga irugik ti mangbangon iti bapor, rinugianda ti nangdayamudom kaniak, a kinunada: Maag ti kabsattayo, ta ipagarupna a makabangon iti bapor; wen, ket ipagarupna pay a maballasiwna dagitoy nalawa a danum.

18 Ket isu a dinayamudomandak dagiti kakabsatko a lallaki, ket tinarigagayanda a saanda nga agobra, agsipud ta saanda patien a makabangonak iti bapor; uray pay a saanda patien nga insuronak ti Apo.

19 Ket ita napasamak a siak, ni Nephi, napalaus ti ladingitko iti kinatangken ti panagpuspusoda; ket ita idi nakitada iti panagladingitko, nagragragsak ti puspusoda, isu a nagrag-oda gapu kaniak, a kinunada: Ammomi a saanka a makabangon iti bapor, gapu ta ammomi a nakurang ti siribmo; gapuna, saanmo maipatungpal ti kasta a naindaklan nga aramid.

20 Ket mayarigka iti amatayo, a naallilaw kadagiti maag nga arapaap ti pusona; wen, isu ti nangiturong kadatayo a panawan ti daga ti Jerusalem, ket nagallaallatayo iti langalang iti adu a tawen; ket nabannog a nagobra dagiti assawatayo, idinto nga agdadagsenda; ket nagpasngayda iti langalang ket nagsagsagabada iti adu a bambanag, malaksid ti patay; ket nasaysayaat koma pay a natayda sakbay iti ipapanawda iti Jerusalem ngem iti panagibturda kadagitoy a rigrigat.

21 Kitaen, kadagitoy adu a tawen a panagituredtayo iti langalang, kadagiti kanito a pannakairanudtayo koma kadagiti sanikuatayo ken ti tinawidtayo a daga; wen, ket naragsaktayo koma.

22 Ket ammomi a nalinteg dagiti tattao nga adda iti Jerusalem; ta tinungpalda dagiti linteg ken pangngeddeng ti Apo, ken amin a bilinna, a mayannurot iti linteg ni Moises; gapuna, ammomi a nalintegda a tao, ket kinedngan ida ti amatayo ket inyadayonatayo gapu ta tungtungpalentayo dagiti saona; wen, ket mayarig kenkuana ti kabsattayo. Ket kastoy ti panagsao dagiti lallaki a kabsatko a nagdayamudom ken nagdayengdeng a maibusor kadakami.

23 Ket napasamak a siak, ni Nephi, kinasaok ida, a kinunak: Mamatikayo kadi a dagiti ammatayo, nga annak ti Israel, nayadayoda koma manipud kadagiti ima dagiti taga-Egipto no saanda a tinungpal dagiti balikas ti Apo?

24 Wen, ipagarupyo kadi a nawayawayaanda iti pannakaadipen, no saan a binilin ti Apo ni Moises a nasken nga yadayona ida manipud iti pannakaadipen?

25 Ita ammoyo a dagiti annak ti Israel ket naad-adipen; ket ammoyo a naipabaklay kadakuada dagiti nadadagsen a trabaho; a narigat nga ibturan; gapuna, ammoyo a nasayaat para kadakuada a mayadayoda iti pannakaadipen.

26 Ita ammoyo a binilin ti Apo ni Moises a mangaramid iti dayta naindaklan a trabaho; ket ammoyo a babaen ti balikasna nagudua iti agsumbangir ti danum ti Nalabaga a Baybay, ket nagballasiwda iti namaga a daga.

27 Ngem ammoyo met a nalmes dagiti taga-Egipto iti Nalabaga a Baybay, dagiti buyot ni Faraon.

28 Ken ammoyo met a naipaayanda iti taraon a manna iti langalang.

29 Wen, ket ammoyo met a ni Moises babaen ti balikasna a mayannurot iti pannakabalin ti Dios nga adda kenkuana, binautna ti bato ket nagpussuak ti danum, tapno mabangaran ti waw dagiti annak ti Israel.

30 Ket nupay inturong ti Apo a Diosda, a Mannubbotda, a mangtartarabay kadakuada, mangiturturong kadakuada iti aldaw ken mangmangted iti silaw kadakuada iti rabii, ken mangar-aramid para kaniada iti amin a bambanag a kasapulan a maitutop nga awaten ti tao, pinatangkenda dagiti pusoda ken binulsekda dagiti panunotda ket simmuppiatda ken ni Moises ken ti pudno ken sibibiag a Dios.

31 Ket napasamak a babaen ti balikasna dinadaelna ida; ken babaen ti balikasna inturongna ida; ken babaen ti balikasna inaramidna amin a bambanag nga agpaay para kadakuada; ket awan ti uray ania man a banag a maaramid no saan a babaen ti saona.

32 Ket kalpasan iti panangballasiwda iti karayan Jordan pinagbalinna ida a nabileg a nangpatalaw kadagiti umili iti daga, wen, iti panangwarasna kadakuada iti pannakadadaelda.

33 Ket ita, ipagarupyo kadi a nalinteg dagiti umili iti daytoy a daga, nga adda iti naikari a daga, a pinapanaw dagiti ammatayo, ipagarupyo kadi a nalintegda? Kitaen, kunak kadakayo, Saan.

34 Ipagarupyo kadi nga ad-addada koma a napili dagiti ammatayo ngem isuda no nagbalinda a nalinteg? Kunak kadakayo, Saan.

35 Kitaen, agpapada ti panangipateg ti Apo iti amin a tao; no sino ti nalinteg isu ti paraburan ti Dios. Ngem kitaen, inlaksid dagitoy a tattao ti tunggal balikas ti Dios, ket naluomdan iti kinadangkes; ket adda kadakuada ti naan-anay a pungtot ti Dios; ket inlunod ti Apo ti daga a maibusor kadakuada, ket binendisionanna daytoy para kadagiti lallaki a kapuonontayo; wen, inlunodna daytoy a maibusor kadakuada inggana iti pakadadaelanda, ket binendisionanna daytoy kadagiti ammatayo iti pananggun-odda iti bileg iti daytoy.

36 Kitaen, pinarsua ti Apo ti daga tapno pagnaedan; ken pinarsuana dagiti annakna tapno tagikuaenda daytoy.

37 Ket bangonenna ti nalinteg a pagilian, ket dadaelenna dagiti pagilian ti nadangkes.

38 Ket iturongna dagiti nalinteg iti napateg a dagdaga, ket dagiti nadangkes dadaelenna, ken ilunodna ti daga gapu kadakuada.

39 Agturay isuna a sidadayag iti langit, gapu ta idiay ti tronona, ket daytoy daga ti pagbatayanna.

40 Ket ayatenna dagiti umawatto kenkuana a Dios. Kitaen, inayatna dagiti ammatayo, ket nakitulag isuna kadakuada, wen, uray pay ken ni Abraham, ni Isaac, ken ni Jacob; ket nalagipna dagiti katulagan nga inaramidna; gapu iti dayta, impanawna ida iti daga ti Egipto.

41 Ket inaturna ida iti langalang babaen ti sarukodna, gapu ta pinatangkenda dagiti pusoda, a kas iti inaramidyo; ket inatur ti Apo ida gapu iti kinadakesda. Nangibaon isuna kadagiti umap-apoy ken tumaytayab a serpiente kadakuada; ket kalpasan a nakagatda nangisagana isuna iti wagas tapno maagasanda; ket ta laeng mangkita ti aramidenda; ket gapu iti kinanam-ay ti wagas, wenno iti kinalaka daytoy, adu ti natay.

42 Ket pasaray a pinatangkenda dagiti pusoda, ket indanemda ni Moises, ken kasta met iti Dios; nupay kasta, ammoyo a naiturongda babaen iti awan umartap a bilegna iti naikari a daga.

43 Ket ita, kalpasan amin dagitoy, dimteng ti kanito a nagbalinda a nadangkes, wen, asidegen ti pannakaluomda; ket diak ammo, ngem kadagitoyen nga aldaw ti pannakadadaelda; ta ammok a nasken a dumteng ti aldaw a masapul a madadaelda, malaksid ti sumagmamano laeng a maiturong iti pannakaadipen.

44 Gapuna, binilin ti Apo ti amak a nasken a mapan iti langalang; ket pinanggep met dagiti Hudio a papatayen isuna; wen, kas met kadakayo ti panggepyo a mangpapatay kenkuana; gapuna, mammapataykayo iti pusoyo ket kapadayo ida.

45 Alistokayo nga agaramid ti dakes ngem naginadyo a lagipen ti Apo a Diosyo. Nakakitakayo iti anghel, ket nakisao kadakayo; wen, nangngeganyo ti timekna iti sagpaminsan; ket nakisao kadakayo iti naalumamay a timek, ngem saan a makabael ti riknayo, ta saanyo a marikna dagiti balikasna; gapuna, nagsao kadakayo iti kasla timek ti gurruod, a nakaigapuan ti pannakadayeg ti daga a kasla magudgudua.

46 Ket ammoyo met a babaen ti bileg ti mannakabalin a balikasna kabaelanna a pukawen ti daga; wen, ken ammoyo met a babaen ti balikasna, kabaelanna a palanasen dagiti lasonglasong a lugar, ket maburakburak dagiti napalanas a lugar. O, ngarud, apay a natangken unay dagiti pusoyo?

47 Kitaen, mapirpirsay ti kararuak iti ladingit gapu kadakayo, ken nasaem ti pusok ta madanaganak ta amangan no mailaksidkayonto nga agnanayon. Kitaen, napnoak iti Espiritu ti Dios, isu nga awanan pigsa ti bagik.

48 Ket ita napasamak a kinaguradak kalpasan nga imbagak dagitoy a balikas, ket tarigagayanda nga itappuakdak iti kaadalman a paset ti baybay; ket bayat ti iyasidegda a mangiggem kaniak, kinunak kadakuada: Iti nagan ti Mannakabalin a Dios, bilinenkayo a saandak a sagiden, agsipud ta napnoak iti bileg ti Dios, uray pay ti pannakarunaw ti lasagko; ket agkuribetbet ti siasino man a mangiggem kaniak uray pay a kas iti nagango a runo, ket maungawto iti sango ti bileg ti Dios, gapu ta dusaento isuna ti Dios.

49 Ket napasamak a siak, ni Nephi, kinunak kadakuada a saandan a dayamudoman ti amada; wenno saanda nga agkedkedto a tumulong kaniak, agsipud ta binilinnak ti Dios a mangbangon iti bapor.

50 Ket kinunak kadakuada: No binilinnak ti Dios nga aramidek iti amin a bambanag maaramidko ida. No bilinennak a kunaek iti daytoy a danum, agbalinka a daga, agbalinto a daga; ket no kunaek daytoy, isunto ti maaramid.

51 Ket ita, no addaan iti dakkel a pannakabalin ti Apo, ket nagaramid iti adu a milagro kadagiti annak ti tattao, apay koma a saannak a maisuro a mangbangon iti bapor?

52 Ket napasamak a siak, ni Nephi, nagsaoak iti adu a banag kadagiti lallaki a kakabsatko, isu a mariribukanda ket saandak a masuppiat; wenno saandak man la maiggaman kadagiti imada wenno masagid kadagiti ramayda, uray pay iti panaglabas ti adu nga aldaw. Ita saanda a maaramid daytoy amangan ta agkuribetbetda iti sangok, ta nabileg unay ti Espiritu ti Dios; ket kastoy ti naaramid a nangaring kadakuada.

53 Ket napasamak a kinuna ti Apo kaniak: Iyunnatmo manen dagita imam kadagiti lallaki a kakabsatmo, ket saandan nga agkuribetbet iti sangom, ngem pagkintayegekto ida, kuna ti Apo, ket aramidek daytoy, tapno maammuanda a siak ti Apo a Diosda.

54 Ket napasamak nga inyunnatko dagiti imak kadagiti lallaki a kakabsatko, ket saanda nagkuribetbet iti sangok; ngem ginunggon ida ti Apo, a kas iti nayannurot iti balikas nga naisaona.

55 Ket ita, kinunada: Ammomi a sitatalged nga adda kenka ti Apo, agsipud ta ammomi a ti pannakabalin ti Apo ti namagkintayeg kadakami. Ket nagkurnoda iti sangok, ket agrukbabda koma kaniak, ngem saanko nga impalubos ida, ket kinunak: Siak ti kabsatyo, wen, uray pay a siak ti inaudi a kabsatyo; gapuna, agrukbabkayo iti Apo a Diosyo, ket dayawenyo met ti ama ken ti inayo, tapno agpaut ti aldawyo iti daga nga itedto kadakayo ti Apo a Dios.