1 Ao e koro bukina bwa a bane n neboa te Uea, ao a waaki ma ngai; ao ti a karaoi bwaai man kaai n te aro ae a kamimi tamaroaia. Ao e aki toki te Uea ni kaota nakoiu aron katauraoan rain te kaibuke.

2 Ngkai ngai ae Nibwaai, I aki karaoi taian rai aikai n aron ae a tataneiai aomata, ke ni kabaa te kaibuke n aron aia atatai aomata; ma I kabaia n aron are kaotia te Uea nakoiu; mangaia ae bon tiaki katotongan aia kaba aomata.

3 Ao Ngai ae Nibwaai, I aki toki n nanakon te maunga, ao n aki toki n tataro nakon te Uea; mangaia ae a mwaiti bwaai aika kakawaki aika e kaoti te Uea nakoiu.

4 Ao e koro bukina bwa ngke e a tia te kaibuke, n aron ana taeka te Uea, ao a nooria tariu bwa e tamaroa, ao moan te tamaroa aron karaoana; mangaia ae a manga kamangoria riki imatan te Uea.

5 Ao e koro bukina bwa e a roko bwanaan te Uea nakon tamau, n tuangnga bwa ti na teirake ao n ruo nako nanon te kaibuke.

6 Ao e koro bukina bwa ngke e a ngaina, ngke ti a tia ni katauraoi bwaai ni kabane, uaanikai aika mwaiti ma iriko man te rereua, karewen te manibeeru ae mwaiti, ao ara tianaki n aron are tuangira te Uea bwa ti na katauraoi, ao ti a ruo nako nanon te kaibuke, ma ara kaako ao ara koraa, ao bwaai ni kabane nako ake ti uoti, n tatabemanira n aron korakorara n rorora nako; mangaia ae ti a ruo nako nanon te kaibuke ma buura ao natira.

7 Ao ngkai e a tia ni manga karikiia uoman natina mwaane tamau i nanon te rereua; e aranaki are te ikawai bwa Iakobwa ao are te karimwi bwa Iotebwa.

8 Ao e koro bukina bwa ngke ti a bane n ruo nako nanon te kaibuke, ma ara tianaki ao ara bwai ni kabane ake ti a tia n tuangaki bwa ti na uoti, ao ti a buti nako marawa ao ni ukaki n te ang nakon te aba ni berita.

9 Ao i mwin ukakira nako n te ang nakon te aba ni berita i nanon te maan ae boong aika mwaiti, taraia, a moana aia mwakuri ni kakukurei tariu ma natin Itimaera aika mwaane n irianaki irouia buuia, n te aro are a moanna ni mwaie, ao n anene, ao n taetae n taetae aika aki riai, eng, n te aro are a mwaninga bwa te mwaaka raa are e karokoia ikai; eng, a bon onrake ni katei aika aki riai.

10 Ao Ngai ae Nibwaai, I rangi ni maaku bwa e rawa n un te Uea iroura, ao n tiringira ibukin ara buakaka, ao n iinako nako kabin marawa; mangaia ae Ngai ae Nibwaai, I a taetae nakoia ma nanou ni koaua; ma taraia, a un irou, ni kangai: Ti aki tangira tarira ae te karimwi bwa e na tautaeka iaora.

11 Ao e koro bukina bwa a tauai Reimwan ma Remuera ma ni kabaeai n te roobu, ao a karaoi mwakuri ni iowawa nakoiu; ma e ngae n anne ao e kariaia aio te Uea bwa e aonga ni kaota mwaakana, ni kakoroa bukin ana taeka are e a tia n taekinna ni kaineti ma aika buakaka.

12 Ao e koro bukina bwa ngke a tia ni kabaeai n te aro are I aki kona ni kakamwakuri, ao e a aki mwakuri te kambwati are e a tia ni katauraoaki iroun te Uea.

13 Mangaia ae a aki ataa te tabo are a na kaineta te kaibuke nako iai, ngkai e a kare te buaka ae korakora, eng, te buaka ao moan te kakamaku ma ni korakora, ao ti a kaokaki riaon marawa i nanon te maan ae teniua te bong; ao e a roko te maaku ae korakora irouia bwa a rawa ni bwabwa n te marawa; ma a aki roko n te kabwaraai.

14 Ao n te kaaua ni bong, n ara tai n ukaki rikaaki, ao e a rikirake ni korakora riki te buaka.

15 Ao e koro bukina bwa ti a bon kuri n iinako i nanon marawa. Ao i mwin ukara rikaaki i nanon te maan ae aua te bong, ao tariu a moanna n noora ana motikitaeka te Atua i aoia, bwa a nang mate ngkana aki rairinanoia man aia bure; mangaia ae a nakoiu, ao a kabwarai kabaeau ake a mena i aon toun baiu, ao nooria a tibu rereka; ao a tibu rereka naba nimoimoin waeu, ao e rangi ni korakora marakiia.

16 E ngae n anne, ao I tararake nakon Atuau, ao I kabanea te bong n neboia; ao I aki ngurengure nakon te Uea ibukin au kangaanga.

17 Ao ngkai e taekin bwaai aika mwaiti tamau ae Riaai nakoia, ao nakoia naba natin Itimaera aika mwaane; ma nooria, a taekin taeka ni kakamaku aika mwaiti nakoia ake a tei ibukiu; ao au kaaro a bon kara man tia n rinanon te rawawata ae bati ibukiia natiia, a bwaka ni mamaara, eng, n aki kona n teirake man aia kainiwene.

18 Ibukin rawawataia ao nanokawakia ae bati, ao ibukin buakakaia tariu; a kuri ni kitana te maiu aei ma ni kaitibo ma Atuaia; eng, a kuri ni kaweneaki iraia aika iaia n te tano; eng, ao a kuri ni karenakoaki ma te nanokawaki n ruanimateia ae marawa.

19 Ao Iakobwa ma Iotebwa, aika bon ataei, a rangi ni kainnanoa te amwarake, ao a taonaki n te nanokawaki ae korakora ibukin korakai ake e rinanoi tinaia; ao kainabau naba ma ran matana ma ana tataro, ao natiu naba, a bon aki marau iai nanoia tariu bwa ana kabwaraai.

20 Ao bon akea te bwai ma ti mwaakan te Atua ae kakamakuia bwa ana kamaunaki are e kona ni kamarau nanoia, mangaia ae, ngke a nooria bwa a nang iinako i kabin marawa a rairinanoia man te bwai are a tia na karaoia, ngaia are a kabwarai.

21 Ao e koro bukina bwa i mwin are a tia ni kabwaraai, ao taraia, I anaa te kambwati, ao e a karaoa are I kaantaningaia bwa e na karaoia. Ao e koro bukina bwa I tataro nakon te Uea; ao ngke I tia n tataro ao e a toki karen te ang, ao e toki te buaka, ao e a roko te raoi.

22 Ao e koro bukina bwa Ngai ae Nibwaai, I a kaira te kaibuke, ao ti a borau nakon te aba ni berita.

23 Ao e koro bukina bwa i mwin boraura i nanon te maan ae boong aika mwaiti ao ti a roko n te aba ni berita; ao ti aerake nakon te aba, ao ti a katei ara umwanrianna; ao ti aranna bwa te aba ni berita.

24 Ao e koro bukina bwa ti a kamaraua te tano, ao ti a uniki taian koraa; eng, ti a uniki taian koraa ni kabane i aontano, ake ti uoti man te aba are Ierutarem. Ao e koro bukina bwa a rangi ni maiu raoi; mangaia ae ti a kakabwaiaki n te mari.

25 Ao e koro bukina bwa ti a kunea iaon te aba ni berita, i nanon ara tai ni mwaamwananga n te tawaana bwa a mwaiti maan n aekaia nako n te buakonikai, te kao aine ao te kao mwaane, ao te aati ao te aoti, ao te kooti ma te kooti ae aki manana, ao maan aika aki manana n aekaia nako, aika bon ibukiia aomata. Ao ti kunei naba aekan tano aika iai biti inanoia, n aiaron te koora, te tirewa, ao te kaobwa.