1 Ao e koro bukina bwa e tuatua te Uea nakoiu, mangaia ae I a karaoi bwaatua man te biti bwa I aonga ni koroi i aoia rongorongoia au botanaomata. Ao I a koroi i aon taian bwaatua ake I karaoi ana rongorongo tamau, ao taekan naba mwanangara i nanon te rereua, ao ana taeka ni burabeti tamau; ao I koroi naba i aoia taekan naba oin au taeka ni burabeti.

2 Ao I aki ataia n te tai arei ngke I karaoi ae E na tuatua nakoiu te Uea bwa N na karaoi taian bwaatua aikai; mangaia ae ana rongorongo tamau, ma kateirikian ana bakatibu ma angiin riki ara waaki i nanon te rereua a bon koreaki i aon taian moan bwaatua ake i moan taekin; mangaia ae bwaai aika a riki i mwaain karaoan bwaatua aikai a bane ni koaua, ao a babane riki taekaia ni koreaki i aon taian moan bwaatua.

3 Ao ngke I a tia ni karaoi taian bwaatua aikai n aron tuangakiu, ao Ngai ae Nibwaai, I karekea te tua bwa a riai ni koreaki i aon taian bwaatua aikai taekan te mwakuri n ibuobuoki ma taeka ni burabeti, mwakorona aika maataata ma ni kakawaki, a na koreaki i aon bwaatua aikai; ao a na kawakinaki bwaai aika koreaki aikai ibukin reiakinaia au botanaomata, aika a na abaaba i aon te aba, ao ibukin naba bwaai tabeua aika riai, aika ti te Uea ae atai.

4 Mangaia ae Ngai ae Nibwaai, I a koroi rongorongo i aon bwaatua ake tabeua, are a taekinaki iai, ke are a taekinaki iai bwaninin taekan aia bubuaka ma itabaraara ma tiringakia au botanaomata. Ao I a tia ni karaoa aio, ao n tuatua nakoia au botanaomata bwa tera ae a na karaoia i mwin mateu; ao a na kawakinaki bwaatua aikai man te roro teuana nakon teuana, ke man te burabeti temanna nakon temanna, ni karokoa rokon tua riki tabeua mai iroun te Uea.

5 Ao rongorongon karaoan taian bwaatua irou a na kaotaki rimwi; ao taraia, I a waaki ngkanne n aron are I a tia n taekinna; ao I a karaoa aio bwa aonga bwaai aika rang n tabu ni kona ni kawakinaki ibukin aia atatai au botanaomata.

6 E ngae n anne I aki koroboki i aon taian bwaatua ti ngkana I taku bwa te bwai ae tabu. Ao ngkai, ngkana arona bwa I kaairua, n aiaroia ake a kaairua ngkoa; tiaki bwa N na kamaurai ni bukina aia kaairua aomata tabeman, ma bon ibukin kabwakau, ni kaineti ma te rabwata, ao I a kabwara bure ibukin kaairuau.

7 Bwa bwaai ake a tarai aomata tabemwaang bwa moan te kakawaki, ibukin te rabwata ao te tamnei, tabemwaang a kaakeai bonganaia ao n toubekai i aan waeia. Eng, n aiaron naba Atuan Iteraera are a toua aomata i aan waeia; I taekinna, bwa a toua i aan waeia ma N na taekinna riki n te aro teuana—a kaakea, ao a aki ongo n ana taeka n reirei.

8 Ao taraia, e na roko, n aron ana taeka te anera, onobubua te ririki i mwin kitanan Ierutarem iroun tamau.

9 Ao te aonaba ibukin buakakaia, a na taraia bwa te bwai ae akea bonganana; mangaia ae a na bwainikirinna, ao e na kariaia; ao a na oroia, ao e na kariaia. Eng, a na bawareia, ao e na kariaia, ibukin ana tangira n akoakoi ma ana taotaonakinnano ae korakora nakoia natiia aomata.

10 Ao Atuaia ara bakatibu, ake a kairaki mai Aikubita, mai i aan te tautoronaki, ao ni kamaiuaki i nanon te rereua i rouna, eng, ae Atuan Aberaam, ma Itaaka, ao Atuan Iakobwa, e anga ngaia ae te aomata, n aron ana taeka te anera, nako nanon baia aomata aika buakaka, bwa e na tabekakirake, n aron ana taeka Tinoki, ao n tauraki, n aron ana taeka Neum, ao n taunaki i nanon te bwaro, n aron ana taeka Tinoti, are taekinna ni kaineti ma boong n roo aika teniua, ake kanikinaean matena nakoia ake a maeka iaon aban marawa, ai moarara riki ibukiia ake kaain te bata are Iteraera.

11 Bwa e taku te burabeti: Te Uea ae te Atua e na kawaria ni kabane kaain te bata are Iteraera n te bong arei, tabemwaang ni bwanaana, ibukin raoiroia, ao a na rootaki n te kimwareirei ae korakora ma te kamaiuaki, ao tabemwaang a na kawaraki n rebwen te baa ma itin mwaakana, ni buakan marawa, n te ai, ao n te bubu, ao maabubun te roo, ao n ukin aontano, ao n taian maunga aika a ana uotakirake.

12 Ao a na bane n riki bwaai aikai, e taku te burabeti ae Tinoti. Ao taian bwa i aon te aba a na raeuaki, ao ibukin tangitangin te aonaba, a mwaiti uean aban marawa aika ana kairaki iroun tamnein te Atua bwa a na takarua: E a rootaki n te rawawata Atuan te aonaba.

13 Ao naake a mena i Ierutarem, e taku te burabeti, a na bwainikirinaki irouia aomata ni kabane, ngkai ngaia aika a taura Atuan Iteraera, ao ni katannakoi nanoia, n aki butimwaai kanikina ma kakai, ma mwaakan ao mimitongin Atuan Iteraera.

14 Ao ibukina bwa a katannakoi nanoia ma n riba Atuaia Iteraera ae Tabu e taku te burabeti, a na tiotio i nanon maiuia n rabwata, ao ni mate, ao n riki ni katinanikuaki ma n taetae buakaki, ao n ribaki n aba nako.

15 E ngae n anne, ao ngkana e roko te bong arei e taku te burabeti, are a katoka iai katannakoakin nanoia, n aki kaitaraa Atuaia Iteraera ae Tabu, ao ngkanne e na uring ana berita aika tabu ake e a tia ni karaoi nakoia aia bakatibu.

16 Eng, ao e na uring naba aban marawa; eng, ao ni kabane aomata ake kaain te bata are Iteraera, N na ikotiia, e taku te Uea, n aron are taekinna te burabeti are Tinoti, man mwakoron te aonaba ake aua.

17 Eng, ao ni kabane te aonaba a na noora ana kamaiu te Uea, e taku te burabeti; a na kakabwaiaki aba, reeti, neewe, ma aomata ni kabane.

18 Ao Ngai, Nibwaai, I a tia ni koroi bwaai aikai ni kabane ibukiia au botanaomata, bwa e aonga n ae I kaira nanoia bwa a na uringa te Uea ae aia Tia Kaboia.

19 Mangaia ae I taetae nakon te bata are Iteraera ni kabane, ngkana arona bwa a na karekei bwaai aikai.

20 Bwa nooria, e korakai tamneiu n te aro ae I a kua ao a mamaara toman riiu ibukiia ake a mena i Ierutarem, bwa ngke arona bwa e aki nanoanga te Uea, ni kaoti nakoiu bwaai ake a na riki nakoia, n aron are kaoti nakoia burabeti ni kawai, ao are N na tia ni mate naba.

21 Ao e koaua ae e a tia ni kaoti nakoia burabeti ni kawai bwaai ni kabane aika a kaineti ma ngaiia; ao e a tia naba ni kaotia nakoia aomata aika mwaiti bwaai aika a kaineti nakoira; mangaia ae e riai bwa ti na atai aroia bwa a tia ni koreaki i nanon bwaatua aika buraati.

22 Ngkai e koro bukina bwa Ngai, Nibwaai, I a tia n reireinia tariu bwaai aikai; ao e koro bukina bwa I a tia naba ni wareki bwaai aika mwaiti nakoia, aika a tia ni koreaki i nanon bwaatua aika buraati, bwa a aonga n atai bwaai ake e karaoi te Uea n aaba tabeua, i buakoia aomata ni kawai.

23 Ao I wareki bwaai aika mwaiti nakoia aika a koreaki i nanon ana boki Mote; bwa I aonga ni kairi nanoia bwa a na kakoaua te Uea ae aia Tia Kaboia, ao I wareki naba nakoia bwaai aika koreaki iroun te burabeti ae Itaia; bwa I kabootaui kanoan koroboki aika a tabu nakon maiura, bwa ti aonga n raka man reireinaki iai.

24 Mangaia ae I taetae nakoia, ni kangai: Kam na ongo ana taeka te burabeti, ngkami nikiraia kaain te bata are Iteraera, te mwanga are e a tia n oteaki mai iai; kam na ongo ana taeka te burabeti, aika a tia ni koreaki nakoia ni kabane kaain te bata are Iteraera, ao kabotaui nakoimi, bwa e aonga n reke te kantaninga iroumi ao irouia naba tarimi ake kam a tia ni kamaenakoaki mai irouia; bwa n aron aio e a tia te burabeti ni koroi.