1 Pea naʻe hoko ʻo pehē naʻe fekau kiate au ʻe he ʻEikí, ko ia naʻá ku ngaohi ai ha ngaahi peletí ʻaki ha maka ukamea ke u lava ʻo tongitongi ki ai ʻa e lekooti ʻo hoku kakaí. Pea naʻá ku tongitongi ki he ngaahi peleti ʻa ia naʻá ku ngaohí ʻa e lekooti ʻa ʻeku tamaí, kae ʻumaʻā mo ʻemau ngaahi fononga ʻi he feituʻu maomaonganoá mo e ngaahi kikite ʻa ʻeku tamaí; kae ʻumaʻā foki haʻaku ngaahi kikite lahi kuó u tongitongi ki ai.

2 Pea naʻe ʻikai te u ʻilo ʻi he taimi naʻá ku ngaohi ai iá, ʻe fekau kiate au ʻe he ʻEikí ke u ngaohi ʻa e ngaahi peleti ko ʻení; ko ia, ko e lekooti ʻo e moʻui ʻa ʻeku tamaí, mo e tohi hohoko ʻo ʻene ngaahi tamaí, pea mo e konga lahi ʻo ʻemau ngaahi ngāue ʻi he feituʻu maomaonganoá kuo tongitongi ia ki he ngaahi peleti ʻa ia kuó u lau ki aí; ko ia, ko e ngaahi meʻa naʻe hoko ki muʻa ʻi heʻeku ngaohi ʻa e ngaahi peleti ko ʻení, ʻoku moʻoni ia, pea ʻoku fakamatala kakato ange ʻi he ngaahi ʻuluaki peletí.

3 Pea hili ʻeku ngaohi ʻa e ngaahi peleti ko ʻení koeʻuhi ko e fekaú, ko au, Nīfai, naʻá ku maʻu ha fekau ke tohi ki he ngaahi peleti ko ʻení ʻa e ngāue fakafaifekau mo e ngaahi kikite, ʻa honau ngaahi konga mahinongofua mo mahuʻinga angé; pea ke tauhi ʻa e ngaahi meʻa ʻa ia kuo tohi ke akoʻi ʻaki ʻa hoku kakaí, ʻa ia ʻoku totonu ke nau maʻu ʻa e fonuá, kae ʻumaʻā foki ha ngaahi taumuʻa fakapotopoto kehe, ʻa ia ko ha ngaahi taumuʻa ʻoku ʻafioʻi ʻe he ʻEikí.

4 Ko ia, ko au, Nīfai, naʻá ku fai ha lekooti ʻi he ngaahi peleti kehé, ʻa ia ʻoku fakamatala, pe ʻoku kau ai ha fakamatala lahi ange ki he ngaahi tau mo e ngaahi fakakikihí mo e ngaahi fakaʻauha ʻo hoku kakaí. Pea kuó u fai ʻeni, peá u fekau ki hoku kakaí ʻa e meʻa ke nau fai hili haʻaku mate; pea ke tukufakaholo ʻa e ngaahi peleti ko ʻení mei he toʻu tangata ʻe taha ki he toʻu tangata ʻe taha, pe mei he palōfita ʻe taha ki he palōfita ʻe taha, kae ʻoua ke maʻu ha ngaahi fekau kehe mei he ʻEikí.

5 Pea ʻe fai ha fakamatala ki heʻeku ngaohi ʻa e ngaahi peleti ko ʻení ʻamui; pea ko ia, vakai, te u fai ʻo hangē ko e meʻa kuó u leaʻakí; pea ʻoku ou fai ʻeni koeʻuhí ke lava ʻo tauhi ʻa e ngaahi meʻa toputapu angé koeʻuhi ke ʻilo ʻe hoku kakaí.

6 Ka neongo iá, ʻoku ʻikai te u tohi ha meʻa ki he ngaahi peletí kā ʻi heʻeku pehē ʻoku toputapu ia. Pea ko ʻeni, kapau ʻoku ʻi ai haʻaku fai hala, naʻa nau fai hala foki ʻi muʻa; pea ʻoku ʻikai ko ʻeku fie fakatonuhiaʻi au koeʻuhi ko ha kau tangata kehe, kā koeʻuhi ko e ngaahi vaivai ʻa ia ʻoku ʻiate au, ʻo fakatatau ki he kakanó, ko ia ʻoku ou fakatonuhiaʻi ai au.

7 He ko e ngaahi meʻa ʻa ia ʻoku pehē ʻe ha kau tangata ʻe niʻihi ʻoku fuʻu mahuʻinga ki he sinó mo e laumālié fakatouʻosi, ʻoku lau ia ʻe ha niʻihi kehe ʻoku taʻeʻaonga ʻo nau molomoloki hifo ia ʻi honau lalo vaʻé. ʻIo, naʻa mo e ʻOtua moʻoni ʻo ʻIsilelí ʻoku molomoloki hifo ia ʻe he tangatá ʻi honau lalo vaʻé; ʻoku ou pehē, ʻoku molomoloki hifo ʻi honau lalo vaʻé ka ʻoku ou fie lea ʻi ha ngaahi lea kehe—ʻoku nau taʻetokaʻi ia, pea ʻikai tokanga ki he leʻo ʻo ʻene ngaahi akonakí.

8 Pea vakai ʻe hāʻele mai ia ʻo hangē ko e ngaahi lea ʻa e ʻāngeló, ʻi hono onongeau ʻo e taʻu hili ʻa e taimi ʻa ia naʻe ʻalu atu ai ʻa ʻeku tamaí mei Selusalemá.

9 Pea ko e māmaní, ko e meʻa ʻi heʻenau angahalá, te nau fakamāuʻi ia ko e meʻa noa pē; ko ia te nau tauteaʻi ia, pea te ne kātakiʻi ia; pea te nau taaʻi ia, pea te ne kātakiʻi ia. ʻIo, te nau ʻanuhia ia, pea te ne kātakiʻi ia, koeʻuhi ko ʻene ʻaloʻofa mo ʻene kātaki fuoloa ki he fānau ʻa e tangatá.

10 Pea ko e ʻOtua ʻo ʻetau ngaahi tamaí, ʻa ia naʻe taki atu mei ʻIsipite, mei he nofo pōpulá, pea maluʻi foki ʻa kinautolu ʻi he feituʻu maomaonganoá, ʻio, ʻa e ʻOtua ʻo ʻĒpalahame mo ʻAisake mo e ʻOtua ʻo Sēkopé, naʻá ne tukuange ia ko e tangata, ʻo hangē ko e ngaahi lea ʻa e ʻāngeló, ki he nima ʻo ha kau tangata angakovi, ke hiki hake, ʻo hangē ko e ngaahi lea ʻa Seinokí, pea kalusefai ia, ʻo hangē ko e ngaahi lea ʻa Neiumí, pea ke telio ʻi ha fonualoto ʻo hangē ko e ngaahi lea ʻa Seinosí, ʻa ia naʻá ne lea ʻo kau ki he ʻaho ʻe tolu ʻo e fakapoʻulí, ʻa ia ʻe hoko ko e fakaʻilonga ʻo ʻene pekiá kiate kinautolu te nau nofo ʻi he ngaahi motu ʻo e tahí, kae tautautefito kiate kinautolu ʻoku ʻo e fale ʻo ʻIsilelí.

11 He naʻe lea pehē ʻe he palōfitá: Ko e moʻoni ʻe hāʻele ʻa e ʻEiki ko e ʻOtuá ki he fale kotoa ʻo ʻIsilelí ʻi he ʻaho ko iá, ko e niʻihi ʻaki hono leʻó, koeʻuhi ko ʻenau māʻoniʻoní, ʻo nau fonu ai ʻi he fiefia lahi mo fakamoʻui ʻa kinautolu, pea ko e niʻihi kehe ʻaki ʻa e ngaahi mana mo e ngaahi tapa ʻa e ʻuhila ʻo hono māfimafí, pea ʻaki ʻa e afā, mo e afi, mo e ohu afi, pea ʻaki ʻa e ʻao ʻo e fakapoʻuli matolu, pea ʻaki ʻa e mafahifahi ʻi he fonuá, pea mo e ngaahi moʻunga ʻa ia ʻe hiki haké.

12 Pea kuo pau ke hoko ʻa e ngaahi meʻá ni kotoa, ʻoku pehē ʻe he palōfita ko Seinosí. Pea kuo pau ke mafahifahi ʻa e ngaahi maka ʻo e fonuá; pea ko e meʻa ʻi he ngaahi ʻuʻulu ʻa e fonuá, ʻe ʻi ai ha ngaahi tuʻi tokolahi ʻo e ngaahi motu ʻo e tahí ʻe ueʻi ʻe he Laumālie ʻo e ʻOtuá ke nau kaila: ʻOku mamahi ʻa e ʻOtua ʻo natulá.

13 Pea ko e meʻa kiate kinautolu ʻoku ʻi Selusalemá, ʻoku pehē ʻe he palōfitá, ʻe fakamamahiʻi ʻa kinautolu ʻe he kakai fulipē, koeʻuhi ko ʻenau kalusefai ʻa e ʻOtua ʻo ʻIsilelí, mo ʻenau liliu honau lotó ki ha meʻa kehe, ʻo liʻaki ʻa e ngaahi fakaʻilonga mo e ngaahi meʻa fakaofo pea mo e māfimafi mo e lāngilangi ʻo e ʻOtua ʻo ʻIsilelí.

14 Pea ko e meʻa ʻi heʻenau fakatafoki honau lotó, ʻoku pehē ʻe he palōfitá, pea kuo nau fehiʻa ki he Tokotaha Māʻoniʻoni ʻo ʻIsilelí, ko ia te nau ʻauhē ai ʻi he kakanó, pea ʻauha, pea hoko ko ha fakaʻiseʻisaʻanga mo ha lumaʻanga, pea fehiʻanekina ʻi he puleʻanga kotoa pē.

15 Ka neongo iá, ʻo ka hoko ʻa e ʻaho ko iá, ʻoku pehē ʻe he palōfitá, ʻa ia ʻe ʻikai te nau toe fakatafoki ai honau lotó ʻo fakafili ki he Tokotaha Māʻoniʻoni ʻo ʻIsilelí, te ne toki manatuʻi ʻa e ngaahi fuakava naʻá ne fai ki heʻenau ngaahi tamaí.

16 ʻIo, te ne toki manatuʻi ai ʻa e ngaahi motu ʻo e tahí; ʻio, pea mo e kakai kotoa pē ʻoku ʻo e fale ʻo ʻIsilelí, te u tānaki mai, ʻoku folofola ʻe he ʻEikí, ʻo fakatatau ki he ngaahi lea ʻa e palōfita ko Seinosi, mei he ngaahi vahe ʻe fā ʻo e māmani.

17 ʻIo, pea ʻe mamata ʻa māmani kotoa pē ki he fakamoʻui ʻa e ʻEikí, ʻoku pehē ʻe he palōfitá; ʻe monūʻia ʻa e puleʻanga mo e faʻahinga mo e lea mo e kakai fulipē.

18 Pea ko au, Nīfai, kuó u tohi ʻa e ngaahi meʻá ni ki hoku kakaí, koeʻuhi ke u lava ʻapē ʻo fakalotoʻi ʻa kinautolu ke nau manatu ki he ʻEiki ko honau Huhuʻí.

19 Ko ia, ʻoku ou lea ki he fale kotoa ʻo ʻIsilelí, ʻo kapau te nau maʻu ʻa e ngaahi meʻá ni.

20 He vakai, ʻoku hohaʻa hoku laumālié, ʻa ia ʻoku fakaongosia kiate au, pea ʻoku vaivaia ai ʻa hoku ngaahi hokotanga hui kotoa pē, koeʻuhi ko kinautolu ʻoku ʻi Selusalemá; he kā ne ʻikai ʻaloʻofa ʻa e ʻEikí, ke fakahā mai kiate au ha meʻa ʻoku kau kiate kinautolu, ʻo hangē foki kuó ne fai ki he kau palōfita ʻi muʻá, pehē kuó u ʻauha mo au foki.

21 Pea ko e moʻoni kuó ne fakahā ki he kau palōfita ʻi muʻá ʻa e ngaahi meʻa kotoa pē naʻe kau kiate kinautolú; kae ʻumaʻā foki ʻene fakahā ki he tokolahi ha meʻa ʻoku kau kiate kimautolu; ko ia, ʻoku ʻaonga ke mau ʻilo kiate kinautolu he kuo tohi ia ʻi he ngaahi peleti ʻo e palasá.

22 Ko ʻeni naʻe hoko ʻo pehē ko au, Nīfai, naʻá ku akonaki ʻaki ki hoku ngaahi tokouá ʻa e ngaahi meʻá ni; pea naʻe hoko ʻo pehē naʻá ku lau ha ngaahi meʻa lahi kiate kinautolu, ʻa ia kuo tongitongi ʻi he ngaahi peleti ʻo e palasá, koeʻuhi ke nau ʻilo ki he ngaahi ngāue ʻa e ʻEikí ʻi he ngaahi fonua kehé, ʻi he kakai ʻi muʻa atú.

23 Pea naʻá ku lau ha ngaahi meʻa lahi kiate kinautolu ʻa ia kuo tohi ʻi he ngaahi tohi ʻa Mōsesé; koeʻuhi ke u lava ʻo fakalotoʻi kakato ange ʻapē ʻa kinautolu ke nau tui ki he ʻEiki ko honau Huhuʻí, ko ia naʻá ku lau kiate kinautolu ʻa e ngaahi meʻa kuo tohi ʻe he palōfita ko ʻĪsaiá, he naʻá ku fakatatau ʻa e ngaahi folofolá kotoa pē kiate kimautolu, koeʻuhi ke ʻaonga ia kiate kimautolu pea mau poto ai.

24 Ko ia, naʻá ku lea kiate kinautolu ʻo pehē: Mou fanongo mai ki he ngaahi lea ʻa e palōfitá, ʻa kimoutolu ʻoku ʻo e toenga ʻo e fale ʻo ʻIsilelí, ʻa ia ko ha vaʻa kuo motuhi atu; mou fanongo ki he ngaahi lea ʻa e palōfitá, ʻa ia kuo tohi ki he fale kotoa ʻo ʻIsilelí, pea mou fakatatauʻi ia kiate kimoutolu koeʻuhi ke mou lava ʻo maʻu ha ʻamanaki lelei ʻo hangē ko homou kāinga ʻa ia kuo motuhi ʻa kimoutolu mei aí; he ko e anga ʻeni ʻo e tohi ʻa e palōfitá.