Li Xb’een Xhu laj Nefi

Li rawa’b’ejil ut lix k’anjel

Jun esil chirix laj Lehi ut li xSariah li rixaqil, ut eb’ li kaahib’ chi ralal, li neke’xk’ab’a’in, (natikib’an li asb’ej) laj Laman, laj Lemuel, laj Sam, ut laj Nefi. Li Qaawa’ naxye re laj Lehi naq chi’elq chaq sa’ li ch’och’ Jerusalen, xb’aan naq jo’ profeet naraatinaheb’ li tenamit chirix lix maa’usilaleb’, ut neke’xsik’ risinkil lix yu’am. Nab’eek oxib’ kutan chiru li yamyookil ch’och’ rochb’een lix junkab’al. Laj Nefi naxk’ameb’ li ras chirix ut nasutq’i sa’ li ch’och’ Jerusalen re xtawb’al li tz’iib’anb’il esil reheb’ laj Judio. Resilal li rahilal ke’xk’ul. Neke’xk’ul choq’ rixaqileb’ lix rab’in laj Ismael. Neke’xik chiru yamyookil ch’och’ rochb’eeneb’ lix junkab’al. Lix rahilaleb’ ut lix ch’a’ajkilaleb’ chiru yamyookil ch’och’. Lix jayalil lix b’eenikeb’. Neke’wulak sa’ li nimla ha’. Neke’xpo’resi xch’ool li ras laj Nefi rik’in. A’an naxsacheb’ xna’leb’, ut naxyiib’ jun li jukub’. Naab’alil neke’xk’e choq’ xk’ab’a’ li na’ajej. Neke’xq’ax li nimla ha’ toj reetal neke’wulak sa’ li yeechi’inb’il ch’och’, ut wan xkomon li na’leb’. A’in jo’ chanru li esil kixye laj Nefi; malaj sa’ jalan chik aatin, laa’in, aj Nefi, kintz’iib’ank re li esil a’in.

Ch’ol 1

Laj Nefi naxtikib’ xtz’iib’ankil resil lix tenamit—Laj Lehi naril sa’ k’utb’esinb’il matk’ jun xaqal li xam ut naril xsa’ jun li hu wan wi’ profeetil aatin—Naxnima ru li Dios, naxye chirub’eetal resil lix k’ulunik li Mesias, ut naxch’olob’ jo’ profeet lix sachlijik Jerusalen—Narahob’tesiik xb’aaneb’ laj Judio. Wan na 600 chihab’ ma nayo’la li Kristo.

1 Laa’in, aj Nefi, rik’in naq kinyo’la chaq rik’in chaab’il na’b’ej yuwa’b’ej, jo’kan naq kintzole’ ka’ch’inaq sa’ chixjunil lix nawom lin yuwa’; ut rik’in naq wilom k’iila ch’a’ajkilal chiru xb’ehil lin kutan, a’ut k’a’jo’ ajwi’ naq usilanb’ilin xb’aan li Qaawa’ chiru chixjunil lin kutan; relik chi yaal, wanjenaq xnimal innawom chirix lix chaab’ilal ut lix muqmuukil na’leb’ li Dios, jo’kan naq nintz’iib’a resil lin b’aanuhom chiru lin kutan.

2 Relik chi yaal, nintz’iib’a jun esil sa’ li raatinob’aal inyuwa’, a’an ajwi’ lix nawomeb’ laj Judio, ut li raatinob’aaleb’ laj Egipcio.

3 Ut ninnaw naq li esil nintz’iib’a yaal, ut nintz’iib’a rik’in tz’aqal li wuq’, ut nintz’iib’a jo’ chanru lin nawom.

4 Xb’aan naq kik’ulman sa’ xtiklajik li xb’een chihab’ li rawa’b’ejil laj Sedekias, li rey sa’ xb’een Juda, (lin yuwa’, aj Lehi, wanjenaq chaq Jerusalen chiru chixjunil lix kutan); ut sa’ li chihab’ ajwi’ a’an ke’k’ulun k’iila profeet, ke’xch’olob’ jo’ profeet chiru li tenamit naq tento te’xjal xk’a’uxl, malaj ut li nimla tenamit Jerusalen tento taasachmanq.

5 Jo’kan ut, kik’ulman naq lin yuwa’, aj Lehi, naq yoo chi xik kitijok chiru li Qaawa’, relik chi yaal, chi anchal ajwi’ lix ch’ool, chirix lix tenamit.

6 Ut naq kitijok chiru li Qaawa’, kik’ulman naq kichal jun xaqal li xam, kikana chiru, sa’ xb’een jun li pek; ut naab’al li kiril ut kirab’i; ut sa’ xk’ab’a’ li k’a’ru kiril ut kirab’i kisiksot ut kichenchot chi numtajenaq.

7 Ut kik’ulman naq kisutq’i sa’ tz’aqal li rochoch aran Jerusalen; ut kixk’ut rib’ chiru lix ch’aat, chi numtajenaq li Musiq’ej rik’in, jo’ ajwi’ li k’a’aq re ru kiril chaq.

8 Ut naq numtajenaq chi jo’kan li Musiq’ej rik’in, kik’ame’ sa’ jun li k’utb’esinb’il matk’, jo’kan naq kiril chi teeliik li choxa, ut kixk’oxla naq kiril li Dios k’ojk’o sa’ xb’een lix k’ojarib’aal, sutsu xb’aaneb’ k’iila ch’uut chi anjel maak’a’ rajlankileb’, wankeb’ chi b’ichank ut chixnimankil ru lix Dios.

9 Ut kik’ulman naq kiril Jun li yoo chaq chi kub’eek sa’ xyi choxa, ut kiril naq lix lemtz’unkil ru naxq’ax xlemtz’unkil li saq’e sa’ wa’leb’.

10 Ut kiril ajwi’ kab’laju chik yookeb’ chaq chixtaaqenkil, ut lix kutankileb’ naxq’ax xkutankileb’ li chahim chiru li heelam.

11 Ut ke’kub’e chaq ut koxe’eelq chiru lix b’een li ruchich’och’; ut kichal li xb’eenil ut kixaqli chiru lin yuwa’, ut kixk’e jun li hu re, ut kixye re naq taaril li tz’iib’anb’il.

12 Ut naq toj yoo chirilb’al li tz’iib’anb’il, kik’ulman naq kinujob’resiik rik’in lix Musiq’ li Qaawa’.

13 Ut kiril li tz’iib’anb’il, kixye: Rahilal, rahilal sa’ xb’een Jerusalen, xb’aan naq wilom laa tz’eqb’eetalil! Relik chi yaal, k’iila na’leb’ kiril lin yuwa’ chi tz’iib’anb’il chirix Jerusalen—naq taasachmanq, ut li ani wankeb’ aran; naab’al te’oso’q xb’aan li yok’leb’ ch’iich’, ut naab’al te’k’ame’q chi preexil Babilonia.

14 Ut naq ak kiril inyuwa’ k’iila k’a’aq re ru ninq ut sachol ch’oolej chi tz’iib’anb’il ut rik’in xnaq’ ru, kik’ulman naq kixjap re chixyeeb’al k’iila aatin re li Qaawa’, jo’ li we’: Ninq ut sachol ch’oolej laa k’anjel, at Qaawa’ Dios Nimajwal! Laa k’ojarib’aal taqenaq chaq sa’ choxa, ut laa wankilal, ut laa chaab’ilal, ut laa wuxtaan wan sa’ xb’eeneb’ chixjunil li wankeb’ sa’ ruchich’och’; ut sa’ xk’ab’a’ naq aj uxtaanat, ink’a’ taakanab’eb’ li ani neke’k’ulun aawik’in naq te’oso’q.

15 Ut jo’ka’in li raatin lin yuwa’ sa’ xnimankil ru lix Dios; xb’aan naq kisaho’ li raam, ut kinujak anchal lix ch’ool, sa’ xk’ab’a’ li k’a’aq re ru kiril chaq, relik chi yaal, li kixk’ut chaq li Qaawa’ chiru.

16 Ut anajwan laa’in, aj Nefi, ink’a’ nink’e resil chixjunil li k’a’aq re ru xtz’iib’a lin yuwa’, xb’aan naq k’iila k’a’aq re ru xtz’iib’a li kiril chi k’utb’esinb’il ut sa’eb’ li matk’; ut xtz’iib’a ajwi’ k’iila k’a’aq re ru kixch’olob’ jo’ profeet ut kixye reheb’ li ralal xk’ajol, li ink’a’ tink’e resil chixjunil.

17 A’b’anan tink’e resil lin b’aanuhom chiru lin kutan. K’ehomaq reetal, nintz’iib’a chi k’osb’il ru li esil kixtz’iib’a lin yuwa’, chiruheb’ perel ch’iich’ li kinyiib’ rik’in tz’aqal li wuq’; jo’kan ut, chirix naq tinchoy xk’osb’al ru li esil kixtz’iib’a lin yuwa’, tink’e resil lin yu’am laa’in.

18 Jo’kan ut, nawaj raj naq teenaw, naq chirix naq li Qaawa’ xk’ut xk’ihal li sachb’a-ch’oolejil na’leb’ a’in chiru lin yuwa’ aj Lehi, relik chi yaal, chirix lix sachlijik Jerusalen, k’ehomaq reetal naq a’an xko’o sa’ xyanqeb’ li tenamit, ut ki’ok chi aatinak jo’ profeet, ut chixch’olob’ankil chiruheb’ li k’a’aq re ru kiril jo’ ajwi’ li kirab’i chaq.

19 Ut kik’ulman naq eb’ laj Judio ke’reetz’u xb’aan li k’a’aq re ru kixch’olob’ chaq chirixeb’, xb’aan naq kixch’olob’ chaq chi yaal chirix lix maa’usilaleb’ ut lix tz’eqb’eetalileb’, ut kixch’olob’ xyaalal naq li k’a’aq re ru kiril ut kirab’i chaq, jo’ ajwi’ li k’a’ru kiril chaq chi tz’iib’anb’il sa’ li hu, naxk’utb’esi chi ch’olch’o chirix lix k’ulunik jun li Mesias, jo’ ajwi’ lix tojb’al rix li ruchich’och’.

20 Ut naq eb’ laj Judio ke’rab’i li k’a’aq re ru a’in, ke’josq’o’ rik’in a’an; relik chi yaal, jo’ chanru ajwi’ chaq rik’ineb’ li profeet najter, li ke’risi chaq, ut ke’xkuti chaq chi pek, ut ke’xkamsi chaq; ut ke’xsik’ ajwi’ lix yu’am a’an, re te’risi. A’ut k’ehomaq reetal, laa’in, aj Nefi, tink’ut cheru naq eb’ lix q’unil uxtaan li Qaawa’ wankeb’ sa’ xb’eeneb’ chixjunileb’ li kixsik’ ru, sa’ xk’ab’a’ lix paab’aaleb’, re xk’eeb’al xkawileb’ xmetz’ew toj reetal naq te’wanq xwankil chi kole’k.