1 Ug karon nahitabo human nga ako, si Nephi, mibasa niini nga mga butang nga gikulit sa mga palid nga tumbaga, ang akong mga igsuong lalaki miduol kanako ug miingon ngari kanako: Unsay gipasabot niini nga mga butang nga imong gibasa? Tan-awa, sabton ba kini sumala sa mga butang nga espirituhanon, nga mahitabo sumala sa espiritu ug dili sa tawo?

2 Ug ako, si Nephi, miingon ngadto kanila: Tan-awa gipakita kini ngadto sa propeta pinaagi sa tingog sa Espiritu; kay pinaagi sa Espiritu ang tanan nga butang ipahibalo ngadto sa mga propeta, nga modangat ngadto sa katawhan sumala sa unod.

3 Mao nga ang mga butang nga akong gibasa mga butang nga may kalabotan sa temporal ug sa espirituhanon; kay ang balay ni Israel ingon og, sa madugay o sa madali, magkatibulaag sa tanan nga kayutaan, ug usab sa tanan nga kanasoran.

4 Ug tan-awa, adunay daghan nga nawagtang na sa kasayoran niadtong anaa sa Jerusalem. Oo, ang dakong bahin sa tanan nga tribo gidala palayo; ug nagkatibulaag sila dinhi ug didto sa mga isla sa dagat; ug kon asa na sila walay usa nato nga nahibalo, gawas sa atong nahibaloan nga sila gidala sa layo.

5 Ug kay gidala sila sa layo, kini nga mga butang gipanagna mahitungod kanila, ug usab mahitungod sa tanan niadtong kinsa human niini tibulaagon ug libogon, tungod sa Usa nga Balaan sa Israel; tungod kay batok kaniya sila mopatig-a sa ilang mga kasingkasing; mao nga tibulaagon sila ngadto sa tanan nga kanasoran ug pagadumtan sa tanan nga katawhan.

6 Bisan pa, human nga sila imatuto sa mga Hentil, ug ang Ginoo mobayaw sa iyang mga kamot ngadto sa mga Hentil ug mopahimutang kanila nga usa ka sumbanan, ug ang ilang mga anak gisapnay sa ilang mga bukton, ug ang ilang mga anak nga babaye gipas-an sa ilang mga abaga, tan-awa kini nga mga butang nga gipamulong mga temporal; kay mao kini ang mga pakigsaad sa Ginoo ngadto sa atong mga amahan; ug kita ang buot ipasabot niini sa mga adlaw nga moabot, ug usab sa tanan natong kaigsuonan kinsa anaa sa balay ni Israel.

7 Ug nagpasabot kini nga ang panahon moabot nga human nga ang tanan sa balay ni Israel matibulaag ug malibog, nga ang Ginoong Dios mopatungha og usa ka gamhanang nasod sa mga Hentil, oo, gani sa ibabaw niini nga yuta; ug pinaagi kanila ang atong mga binhi matibulaag.

8 Ug human matibulaag ang atong mga binhi ang Ginoong Dios mopadayon sa paghimo og usa ka kahibulongan nga buhat diha sa mga Hentil, nga mahinungdanon kaayo sa atong mga binhi; mao nga gipahisama kini sa pag-amuma kanila sa mga Hentil ug gialsa pinaagi sa ilang mga bukton ug sa ilang mga abaga.

9 Ug kini usab bililhon ngadto sa mga Hentil; ug dili lang ngadto sa mga Hentil apan ngadto sa tanan nga balay ni Israel, ngadto sa pagpahibalo sa mga pakigsaad sa Amahan sa langit ngadto kang Abraham, nga nag-ingon: Diha sa imong binhi ang tanan nga kaliwatan sa yuta mapanalanginan.

10 Ug gusto ko, akong kaigsuonan, nga kamo masayod nga ang tanan nga kaliwatan sa yuta dili mapanalanginan hangtod nga iyang ikapakita ang iyang bukton sa mga mata sa kanasoran.

11 Mao nga ang Ginoong Dios mopadayon sa pagpakita sa iyang bukton sa mga mata sa tanan nga kanasoran, aron ipahinabo ang iyang mga pakigsaad ug ang iyang ebanghelyo ngadto niadtong anaa sa balay ni Israel.

12 Mao nga siya moluwas na usab kanila gikan sa pagkabihag, ug sila pagapundokon ngadto sa kayutaan nga ilang kabilin; ug haw-ason sila gikan sa kangiob ug gikan sa kangitngit; ug sila mahibalo nga ang Ginoo mao ang ilang Manluluwas ug ilang Manunubos, ang Gamhanang Dios sa Israel.

13 Ug ang dugo nianang gamhanan ug salawayon nga simbahan, nga nagbaligya sa iyang dungog sa tibuok yuta, mosumbalik sa kaugalingon nilang mga ulo; kay sila makiggubat tali sa ilang mga kaugalingon, ug ang espada sa kaugalingon nilang mga kamot moigo sa kaugalingon nilang mga ulo, ug mahubog sila sa kaugalingon nilang dugo.

14 Ug ang matag nasod nga makiggubat batok kanimo, O balay ni Israel, makigbatok sa usag usa, ug sila mahulog ngadto sa lungag nga ilang gikalot sa pagbitik sa katawhan sa Ginoo. Ug ang tanan nga makig-away batok sa Zion pagalaglagon, ug kana nga gamhanan nga nagbaligya sa iyang dungog, nga mituis sa matarong nga pamaagi sa Ginoo, oo, kana nga gamhanan ug salawayon nga simbahan, mahagsa sa yuta ug hilabihan ka kusog ang pagkahagsa niini.

15 Kay tan-awa, miingon ang propeta, ang panahon dali nga moabot nga si Satanas wala nay gahom diha sa mga kasingkasing sa mga anak sa katawhan; kay ang adlaw hapit na moabot nga ang tanang mapagarbohon ug sila nga nagbuhat og daotan mahisama sa mga dagami; ug ang adlaw moabot nga sila gayod pagasunogon.

16 Kay ang panahon moabot sa dili madugay nga ang kahingpitan sa kapungot sa Dios ibu-bo diha sa tanang anak sa katawhan; kay dili niya itugot nga ang mga daotan molaglag sa mga matarong.

17 Mao nga siya mopanalipod sa mga matarong pinaagi sa iyang gahom, bisan kon moabot ang kahingpitan sa iyang kapungot, ug ang mga matarong panalipdan, gani hangtod sa kalaglagan sa ilang mga kaaway pinaagi sa kalayo. Mao nga ang mga matarong dili angayang mahadlok; kay miingon ang propeta, sila pagaluwason, bisan kon kini pinaagi sa kalayo.

18 Tan-awa, akong mga igsuong lalaki, sultihan ko kamo nga kini nga mga butang moabot sa dili madugay; oo, gani ang dugo, ug kalayo, ug hinungaw sa aso seguradong moabot; ug gikinahanglan kining mahitabo ibabaw sa yuta; ug moabot kini sa mga tawo sumala sa unod kon magmagahi sila sa ilang mga kasingkasing batok sa Balaan sa Israel.

19 Kay tan-awa, ang mga matarong dili malaglag; kay ang panahon moabot gayod nga tanan sila kinsa makig-away batok sa Zion ipahimulag.

20 Ug ang Ginoo mag-andam gayod og agianan alang sa iyang katawhan, ngadto sa katumanan sa mga pulong ni Moises, nga iyang gipamulong, nga nag-ingon: Usa ka propeta ang patungahon sa Ginoo nga inyong Dios nganha kaninyo, sama kanako; kaniya maminaw kamo sa tanan nga butang bisan unsa nga iyang isulti kaninyo. Ug mahitabo nga ang tanan nga dili maminaw niana nga propeta ipahimulag gikan sa katawhan.

21 Ug karon ako, si Nephi, mopahayag kaninyo, nga kini nga propeta nga gihisgotan ni Moises mao ang Usa nga Balaan sa Israel; mao nga mohimo siya og paghukom subay sa matarong nga paagi.

22 Ug ang mga matarong dili angayang mahadlok, kay sila kadtong dili pagalibogon. Kondili ang gingharian sa yawa, nga pagatukoron taliwala sa mga anak sa katawhan, diin nga gingharian gitukod taliwala kanila nga anaa sa unod—

23 Kay ang panahon dali nga moabot diin ang tanan nga simbahan nga gitukod aron makaangkon og bahandi, ug kadtong gitukod aron makaangkon og gahom sa unod, ug niadtong gitukod aron mahimong bantogan sa mga mata sa kalibotan, ug niadtong nagtinguha sa kahigal sa unod ug sa mga butang sa kalibotan, ug sa pagbuhat sa tanang matang sa kadaotan; oo, sa kataposan, niadtong tanan nga nasakop sa gingharian sa yawa sila ang angayan nga mahadlok, ug mangurog, ug matay-og; sila kadtong ihagsa ngadto sa yuta; sila kadtong angay nga daoban sama sa mga dagami; ug kini sumala sa mga pulong sa propeta.

24 Ug ang panahon dali nga moabot nga ang mga matarong giyahan gayod sama sa mga nati diha sa kwadra, ug ang Usa nga Balaan sa Israel maghari gayod diha sa kamandoan, ug kusog, ug gahom, ug dako nga himaya.

25 Ug siya mopundok sa iyang mga anak gikan sa upat ka suok sa yuta; ug ihapon niya ang iyang karnero, ug sila makaila kaniya; ug adunay usa ka panon ug usa ka magbalantay; ug pakaonon niya ang iyang karnero, ug diha kaniya sila makakita og katugwayan.

26 Ug tungod sa pagkamatarong sa iyang katawhan, si Satanas walay gahom; mao nga siya dili buhian sulod sa daghan nga katuigan; kay siya walay gahom sa mga kasingkasing sa katawhan, kay magpuyo sila sa pagkamatarong, ug ang Usa nga Balaan sa Israel maghari.

27 Ug karon tan-awa, ako, si Nephi, moingon kaninyo nga kining tanan nga butang moabot gayod sumala sa unod.

28 Apan, tan-awa, ang tanan nga kanasoran, kaliwatan, pinulongan, ug katawhan magpuyo nga luwas diha sa Usa nga Balaan sa Israel kon ugaling sila maghinulsol.

29 Ug karon ako, si Nephi, motapos na; kay dili na ako mosulti pa og dugang mahitungod niini nga mga butang.

30 Mao nga, akong mga igsuong lalaki, manghinaot ko nga kamo mohunahuna nga ang mga butang nga nasulat sa mga palid nga tumbaga tinuod; ug nga kini nagpamatuod nga ang tawo kinahanglan nga magmasulundon sa mga sugo sa Dios.

31 Mao nga kamo dili gayod angay nga maghunahuna nga ako ug ang akong amahan lamang ang mipamatuod, ug usab mitudlo niini. Mao nga kon kamo magmasulundon sa mga sugo, ug molahutay hangtod sa kataposan, kamo maluwas sa kataposang adlaw. Ug mao gayod kini. Amen.