1 Bwa noria, e koro bukina bwa e taetae te Uea nakon tamau, eng, i nanon te mi, ao e taku nakoina: Ko na kakabwaiaki Riaai, ibukin baike ko a tia ni karaoi; ao ibukina naba ngkai ko a tia ni kakaonimaki ao n taekina nakoia te botanaomata aio baike I tuangko, noria, a kataia n anaa maium.

2 Ao e koro bukina bwa e tua te Uea nakon tamau, i nanon te mii, bwa e riai ni kairiia ana utu ao ni mwananga nakon te rereua.

3 Ao e koro bukina bwa e ongeaba n ana taeka te Uea, mangaia are e karaoa are e tuangaki iroun te Uea.

4 Ao e koro bukina bwa a mwananga nakon te rereua. Ao e kitana ana auti, ma aban rikina, ma ana koora, ma ana tirewa, ma ana bwai aika a kakawaki, ao akea te bwai teuana ae uotia, ma ti ana utu, ao aia tianaki, ao aia umwa n rianna, ao a mwananga nakon te rereua.

5 Ao e roko i rarikin mataniwina ni uakaan ma Taari are Uraura; ao e mwananga i nanon te rereua ni kaaniia te tia ni uakaan riki ma Taari are Uraura; ao e mwananga i nanon te rereua ma ana utu, aika tinau ae Tiera, ma tariu aika ikawai nakoiu, aika Reimwan, Remuera, ao Taam.

6 Ao e koro bukina bwa ngke e a koro teniua ana bong ni mwaamwananga i nanon te rereua, e a katea ana umwanrianna n te mwarua i etan te karaanga n ran.

7 Ao e koro bukina bwa e katea te baonikarea man taian atiibu, ao e a anga te karea nakon te Uea, ao e a anga ana kaaitau nakon te Uea ae Atuara.

8 Ao e koro bukina bwa e arana te karaanga arei bwa, Reimwan, ao e raanga nakon Taari are Uraura; ao e mena te mwarua i mataniwina irarikin wiin te karaanga arei.

9 Ao ngke e noria tamau ae e raanga ranin te karaanga aio nako nanon koburaken Taari are Uraura, e taetae nakon Reimwan, ni kaangai: O bwa ko na kona riki n aiaron te karaanga aio, ae aki toki n raanga nako nanon koburaken te raoiroi ni kabane!

10 Ao e taetae naba nakon Remuera: O bwa ko na kona n riki n aiaron te mwarua aio, ae matoatoa ao n teimatoa n nene, ao n aki kona ni kamwaingaki n aron kaawakinan ana tua nako te Uea!

11 Ao e atong baikai ibukin matoatoan nanaoia Reimwan ma Remuera; bwa noria e korakora ngurengureia ni baika a bati iroun tamaia, ngkai te aomata ae nonoori mii ni burabeti ngaia, ao e a tia ni kairia nako mai Ierutarem, ni kiitana aban rikiia, ma aia koora, ma aia tirewa, ma aia bwai aika a kakawaki, bwa a na mate i nanon te rereua. Ao a taku bwa e a tia ni karaoa aio ibukin ana iango ni burababa.

12 Ao Reimwan ma Remuera, aika karimoa, a ngurengure iroun tamaia. A bon ngurengure ngkai a aki atai ana mwakuri te Atua are Ngaia ae karikiia.

13 A bon aki kakoaua naba ae e na uruakaki te kaawa ae korakora ae Ierutarem, n aron aia taeka burabeti. Ao titebo ngaiia ma Iutaia ake i rarikin Ierutarem ake a tia ni kataia n ana maiun tamau.

14 Ao e koro bukina bwa e taetae ma te mwaaka tamau nakoia n te mwarua ae Remuera, ngkai e kaonaki n te Tamnei, ni karokoa ae a ruru rabwataia i matana. Ao e takuia, bwa a na aki taetae ni kaaitaraa; mangaia are, a karaoi baike e tuangiia.

15 Ao e maeka tamau i nanon te umwa n rianna.

16 Ao e koro bukina bwa ngai, Nibwaai, e ngae ngke I bon rangi n ataei, ma e bon rangi ni korakora rabwatau, ao ni korakora naba nanou ni kan atai ana bwai te Atua aika raba, mangaia are, I a tang nakon te Uea; ao noria e a kaoti nakoiu, ao e a kamaraua nanou n te aro are I a kakoauai taeka ni kabane ake e a tia n taekin tamau; mangaia are, I aki kaaitara ni katootoongiia tariu.

17 Ao I taetae nakon Taam, ni kaoti nakoina baike e a tia ni kaoti nakoiu te Uea ri nanon Tamneina ae Tabu. Ao e koro bukina bwa e kakoauai au taeka.

18 Ma, noria, a aki ongo Reimwan ma Remuera n au taeka; ao I tang nakon te Uea ibukin rawawatan nanou irouia ngkai a rangi ni matoatoa nanoia.

19 Ao e koro bukina bwa e taetae te Uea nakoiu, ni kaangai: Ko na kakabwaiaki, Nibwaai, ibukin am onimaki, bwa ko a tia ni botumwaaka n ukoukorai, ma te nanorinano.

20 Ao ngkana ko teimatoa ni kaawakin au tua, ko na kakabwaiaaki, ao ko na kairaki nakon te aba ni berita; eng, ae bon te aba are I a tia ni katauraoia ibukim; eng, te aba ae moamoa riki arona nakoia aaba nako.

21 Ao ngkana e teimatoa kaitaraam irouia tarim ao a na kaakeaaki mai matan te Uea.

22 Ao ngkana ko teimatoa ni kaawakin au tua, ko na karikaki bwa te tia tautaeka ao te tia reirei i aoia tarim.

23 Bwa noria, n te bong are a na kaaitaraai iai, N na kamaraiaia n te kamaraia ae rawawata, ao a na akea korakoraia i aoia kanoam ma ti ngkana a kaaitaraai naba.

24 Ao ngkana arona bwa a teirake ni kaaitaraai, a na riki akanne bwa karawaawataaia kanoam, ni kakiriwei nanoia n te aro ni kauring.