1 Ug nahitabo nga ako, si Nephi, mibalik gikan nga nakigsulti sa Ginoo ngadto sa tolda sa akong amahan.

2 Ug nahitabo nga namulong siya ngari kanako, nga nag-ingon: Tan-awa nagdamgo ako og usa ka damgo, diin gisugo ako sa Ginoo nga ikaw ug ang imong mga igsuong lalaki pabalikon sa Jerusalem.

3 Kay tan-awa, anaa kang Laban ang talaan sa mga Judeo ug usab ang kasaysayan sa mga kagikan sa akong katigulangan, ug nakulit kini sa mga palid nga tumbaga.

4 Mao nga, ang Ginoo misugo kanako nga ikaw ug ang imong mga igsuong lalaki kinahanglan nga moadto sa balay ni Laban, ug mokuha sa mga talaan, ug modala niini nganhi sa kamingawan.

5 Ug karon, tan-awa ang imong mga igsuong lalaki nagbagulbol, nag-ingon nga lisod ang akong gipabuhat kanila; apan tan-awa dili ako ang nagpabuhat niini kanila, apan sugo kini sa Ginoo.

6 Busa lakaw, akong anak, ug pagabuligan ka sa Ginoo, kay wala ka magbagulbol.

7 Ug nahitabo nga ako, si Nephi, miingon sa akong amahan: Moadto ako ug mobuhat sa mga butang nga gisugo sa Ginoo, kay nasayod ako nga ang Ginoo dili mohatag og mga sugo ngadto sa mga anak sa katawhan, gawas kon mag-andam siya og paagi nga ilang matuman ang mga butang nga iyang gisugo kanila.

8 Ug nahitabo nga sa diha nga nadungog sa akong amahan kini nga mga pulong nalipay siya sa hilabihan, kay nasayod siya nga ako gipanalanginan sa Ginoo.

9 Ug ako, si Nephi, ug ang akong mga igsuong lalaki mipanaw ngadto sa kamingawan, dala ang among mga tolda aron motungas sa yuta sa Jerusalem.

10 Ug nahitabo nga sa dihang nakatungas na kami sa yuta sa Jerusalem, ako ug ang akong mga igsuong lalaki, nagsabotsabot.

11 Ug among giripa—kon kinsa kanamo ang mosulod sa balay ni Laban. Ug nahitabo nga ang ripa natumong kang Laman; ug si Laman misulod sa balay ni Laban, ug nakigsulti siya kaniya samtang didto siya naglingkod sulod sa iyang balay.

12 Ug gipangayo niya kang Laban ang mga talaan nga gikulit sa mga palid nga tumbaga, nga naglakip sa kasaysayan sa mga kagikan sa akong amahan.

13 Ug tan-awa, nahitabo nga nasuko si Laban, ug gipalayas siya gikan sa iyang atubangan; ug dili siya motugot nga makuha ni Laman ang mga talaan. Mao nga, miingon siya ngadto kaniya: Tan-awa ikaw usa ka kawatan, ug patyon ko ikaw.

14 Apan si Laman miikyas gikan sa iyang atubangan, ug misugilon sa mga butang nga gibuhat ni Laban ngari kanamo. Ug nagsugod kami sa hilabihan nga kamasulub-on, ug ang akong mga igsuong lalaki mamalik na unta ngadto sa akong amahan didto sa kamingawan.

15 Apan tan-awa gisultihan nako sila nga: Sama kasegurado nga ang Ginoo buhi, ug samtang kita buhi, dili kita molugsong ngadto sa atong amahan didto sa kamingawan hangtod nga atong matuman ang butang nga gisugo sa Ginoo kanato.

16 Mao nga, magmatinud-anon kita sa pagtuman sa mga sugo sa Ginoo; busa mangadto kita sa yuta nga kabilin sa atong amahan, kay tan-awa nagbilin siya og mga bulawan ug mga pilak, ug tanan nga matang sa katigayonan. Ug tanan kini iyang gihimo tungod sa mga sugo sa Ginoo.

17 Kay nasayod siya nga ang Jerusalem pagalaglagon gayod, tungod sa pagkadaotan sa katawhan.

18 Kay tan-awa, gisalikway nila ang mga pulong sa mga propeta. Mao nga, kon ang akong amahan mopuyo gihapon niini nga yuta human siya gisugo sa paglayas gikan sa yuta, tan-awa, siya usab mamatay. Mao nga, kinahanglan nga molayas siya gikan sa mao nga yuta.

19 Ug tan-awa, kaalam kini sa Dios nga atong makuha kini nga mga talaan, aron matipigan nato ngadto sa atong mga anak ang pinulongan sa atong mga amahan;

20 Ug usab aron atong matipigan ngadto kanila ang mga pulong nga gilitok sa ba-ba sa tanan nga balaang mga propeta, nga gitugyan ngadto kanila pinaagi sa Espiritu ug sa gahom sa Dios, sukad sa pagsugod sa kalibotan, gani hangtod karon nga panahon.

21 Ug nahitabo nga subay niini nga matang sa pinulongan akong nadani ang akong mga igsuong lalaki, nga sila unta magmatinud-anon sa pagtuman sa mga sugo sa Dios.

22 Ug nahitabo nga milugsong kami ngadto sa yuta nga among kabilin, ug gipundok namo ang among mga bulawan, ug ang among mga pilak ug ang among mga mahalon nga butang.

23 Ug human nga among napundok kini nga mga butang, nanungas na usab kami ngadto sa balay ni Laban.

24 Ug nahitabo nga giadto namo si Laban, ug mihangyo nga iyang ihatag kanamo ang mga talaan nga nakulit sa mga palid nga tumbaga, diin alang niana among ibaylo kaniya ang among mga bulawan, ug ang among mga pilak, ug ang tanan namong mga mahalon nga butang.

25 Ug nahitabo nga sa dihang si Laban nakakita sa among mga kabtangan, ug nga kini hilabihan ka daghan, naibog siya niini, nga iya kaming gipalayas, ug mipadala sa iyang mga sulugoon aron sa pagpatay kanamo, aron iyang maangkon ang among mga kabtangan.

26 Ug nahitabo nga nangikyas kami gikan sa mga sulugoon ni Laban, ug napugos kami sa pagbiya sa among mga kabtangan, ug nahulog kini sa mga kamot ni Laban.

27 Ug nahitabo nga nangikyas kami paingon sa kamingawan, ug ang mga sulugoon ni Laban wala makaapas kanamo, ug nanago kami sa lungag sa usa ka dakong bato.

28 Ug nahitabo nga si Laman nasuko kanako, ug ngadto usab sa akong amahan; ug si Lemuel usab, kay mituo siya sa mga pulong ni Laman. Mao nga si Laman ug si Lemuel namulong og daghang sakit nga pulong ngari kanamo nga ilang mga manghod nga igsoon, ug gani gidapatan nila kami gamit ang usa ka bunal.

29 Ug nahitabo nga samtang gidapatan nila kami gamit ang bunal, tan-awa, usa ka anghel sa Ginoo mitungha ug mibarog sa ilang atubangan, ug namulong siya ngadto kanila, nga nag-ingon: Nganong inyong gidapatan ang inyong manghod nga igsoon gamit ang bunal? Wala ba kamo masayod nga ang Ginoo mipili kaniya nga mahimo ninyong tigmando, ug kini tungod sa inyong pagkadaotan? Busa tungas kamo og balik sa Jerusalem, ug ang Ginoo motugyan ni Laban sa inyong mga kamot.

30 Ug human nga nakapamulong ang anghel ngari kanamo, mibiya siya.

31 Ug human nakabiya ang anghel, si Laman ug si Lemuel nagsugod na usab sa pagbagulbol, nga nag-ingon: Sa unsang paagi nga ang Ginoo motugyan ni Laban sa atong mga kamot? Tan-awa, gamhanan siya nga tawo, ug makamando siya og kalim-an, oo, gani makapatay siya og kalim-an; kita pa kaha ang dili niya mapatay?