Kapitulo 7
Agsubli dagiti annak a lallaki ni Lehi iti Jerusalem ket awisenda ni Ismael ken ti kameng ti pamiliana a sumurot kadakuada iti panagdaliasatda—Summupiat ni Laman ken dagiti dadduma—Allukoyen ni Nephi dagiti lkabsatna a lallaki nga agtalek iti Apo—Pungoenda iti tali ken gandatenda ti ipapatayna—Maruk-atan isuna babaen iti bileg ti pammati—Dumawat dagiti kabsatna a lallaki iti pammakawan—Mangipaay da Lehi ken dagiti kaduana iti daton ken dagiti napuoran a sagut. Agarup 600–592 B.C.
1 Ket ita kayatko a maammuanyo, a kalpasan nga insardeng ti amak, a ni Lehi, ti agipadto maipapan kadagiti kaputotanna, napasamak a nakisao manen ti Apo kenkuana, imbagana a saan a maiparbeng kenkuana, ni Lehi, nga itugotna ti pamiliana iti langalang nga agmaymaysa; ngem ketdi nasken nga alaen dagiti annakna a lallaki dagiti annak a babbai nga asawaenda, tapno mangpaaduda iti kaputotan para iti Apo iti naikari a daga.
2 Ket napasamak a binilin isuna ti Apo a siak, ni Nephi, ken dagiti kabsatko a lallaki, nasken nga agsubli manen iti daga ti Jerusalem, ken itugotmi ni Ismael ken ti pamiliana iti langalang.
3 Ket napasamak a siak, ni Nephi, napanak manen, a kaduak dagiti kabsatko a lallaki, a nagdaliasat iti langalang tapno mapan iti Jerusalem.
4 Ket napasamak a napankami iti balay ni Ismael, ket nagun-odmi ti pabor iti imatang ni Ismael, isu nga imbagami kenkuana dagiti balikas ti Apo.
5 Ket napasamak a pinalukneng ti Apo ti puso ni Ismael, ken kasta met dagiti kameng ti pagtaenganna, isu a nakipagdaliasatda kadakami a napan iti langalang iti tolda ti amami.
6 Ket napasamak a bayat ti panagdaldaliasatmi iti langalang, kitaen da Laman ken Lemuel, ken ti dua a babbai nga annak ni Ismael, ken ti dua nga annak a lallaki ni Ismael ken dagiti pamiliada, a simmupiat a maibusor kadakami; wen, a maibusor kaniak, ni Nephi, ken ni Sam, ken ti amada a ni Ismael, ken ti asawana, ken ti tallo nga annakna a babbai.
7 Ket napasamak nga iti daytoy a panagsisinnuppiat, tarigagayda ti agsubli iti daga ti Jerusalem.
8 Ket ita siak, ni Nephi, gapu ta maladingitanak iti kinatangken ti puspusoda, gapuna a kinasaritak ida, a kinunak, wen, uray kada Laman ken Lemuel: Adtoy, dakayo ti inauna a kabsatko a lallaki, ket kasano a natangken unay ti panagpuspusoyo, ken kasta unay ti pannakabulsek ti pampanunotyo, a kasapulanyo a siak, ti inaudi a kabsatyo, nasken nga agsao kadakayo, wen, ken mangipakita iti pagulidananyo?
9 Kasano koma a saanyo nga impangag ti sao ti Apo?
10 Kasano koma ti pannakalipatyo a nakakitakayo iti anghel ti Apo?
11 Wen, ken kasano koma ti pannakalipatyo kadagiti naindaklan a banag nga inaramid ti Apo kadatayo, iti panangisalakanna kadatayo kadagiti ima ni Laban, ken kasta met a nasken ti pananggun-odtayo ti kasuratan?
12 Wen, ken kasano koma ti pannakalipatyo a kabaelan ti Apo nga aramiden ti amin a bambanag a maiyannurot iti pagayatanna, para kadagiti sangkataw-an, no la ket ipakitada ti pammatida kenkuana? Gapuna, napudnotayo koma kenkuana.
13 Ket no napudnotayo koma kenkuana, magun-odtayo ti naikari a daga; ket maammuanyonto iti sumagmamano a masakbayan a panawen a matungpalto ti sao ti Apo maipapan iti pannakadadael ti Jerusalem; ta nasken a matungpal amin a banag a naisaon ti Apo maipapan iti pannakadadael ti Jerusalem.
14 Ket kitaem, dandanin agsardeng ti Espiritu ti Apo a mangtulong kadakuada; gapu ta kitaen, linaksidda dagiti propeta, ket imbaludda ni Jeremias. Ken pinanggepda a kettelen ti biag ti amak, isu a pinapanawda iti dayta a daga.
15 Ita kitaem, kunak kadakayo a no agsublikayo idiay Jerusalem mataykayonto met a kas kadakuada. Ket ita, no adda pagpilianyo, inkayo idiay a daga, ket laglagipenyo dagiti balikas a nasaok kadakayo, a no mapankayo mataykayonto met; gapu ta pinilitnak ti Espiritu ti Apo a nasken nga agsaoak.
16 Ket napasamak nga idi siak, ni Nephi, idi naisaok dagitoy a balikas kadagiti kabsatko, nagpungtotda kaniak. Ket napasamak a ginammatandak, gapu ta kitaen, kasta unay ti pungtotda, ket ginalutandak kadagiti tali, ta panggepda a kettelen ti biagko, tapno ibatidak iti langalang a kanen dagiti atap nga ayup.
17 Ngem napasamak a nagkararagak iti Apo, a kinunak: O Apo, maiyannurot iti pammatik kenka, isalakannak koma manipud kadagiti ima dagiti kabsatko a lallaki; wen, ikkannak iti pigsa a mangruk-at kadagitoy tali a naigalut kaniak.
18 Ket napasamak nga idi naibagak dagitoy a balikas, kitaen, nawarwar dagiti galut kadagiti imak ken sakak, ket timmakderak iti sango dagiti kabsatko a lallaki, ket nagsaoak manen kadakuada.
19 Ket napasamak a nagpungtotda manen kaniak, ket pinanggepda a gammatandak; ngem kitaen, maysa kadagiti annak a babbai ni Ismael, wen, ken kasta met ti inana, ken maysa kadagiti annak a lallaki ni Ismael, ti nagpakpakaasi kadagiti kabsatko a lallaki, isu a napaluknengda dagiti pusoda; ket simmardeng ti reggetda a mangkettel iti biagko.
20 Ket napasamak a nagladingitda, gapu iti kinadangkesda, isu a nagtamedda a sipapakumbaba iti sangok, ket nagpakpakaasida a pakawanek ida kadagiti naaramidda a maibusor kaniak.
21 Ket napasamak a nalawag ti panangpakawanko kadakuada iti amin a naaramidda, ket inallukoyko ida nga agkararag iti pammakawan ti Apo a Diosda. Ket napasamak nga inaramidda daytoy. Ket kalpasan ti panagkararagda iti Apo, intuloymi manen ti nagdaliasat nga agturong iti tolda ti amami.
22 Ket napasamak a nakadanonkamin iti tolda ti amami. Ken kalpasan a siak ken dagiti kakabsatko a lallaki ken ti amin a pamilia ni Ismael nakadanon iti tolda ti amak, nangipaayda iti panagyaman iti Apo a Diosda; ken nangidatonda iti sakripisio ken napuoran a daton kenkuana.