1 Мөн эдүгээ, миний эцэг Лихай үр удмынхаа талаар бошиглосны дараа, мөнхүү улиран тохиох дор Их Эзэн түүнд хандан дахин ярьж, тэрээр зөвхөн өөрийн гэр бүлийг авч аглаг буйд тийш зорчих нь Лихайн хувьд зохистой биш болохыг; харин тэд амлалтын нутагт Их Эзэний төлөө үр удмаа өсгөж болохын тулд, хөвгүүд нь охидыг эхнэр болгон авбал зохилтой хэмээн хэлснийг та нар мэдээсэй хэмээнэ би.

2 Мөнхүү улиран тохиох дор, Нифай би түүнчлэн миний ах нар Иерусалим нутаг тийш дахин буцаж, тэгээд Ишмэил болон түүний гэр бүлийг аглаг буйд руу авчирвал зохилтой хэмээн Их Эзэн түүнд зарлигласан болой.

3 Мөнхүү улиран тохиох дор, Нифай би, ах нарынхаа хамт Иерусалимыг зорин, аглаг буйд тийш дахин аялав.

4 Мөнхүү улиран тохиох дор бид Ишмэилийн гэрт очоод, бид Ишмэилийн зүгээс тааллыг олж, үүнийхээ хэрээр бид түүнд хандан Их Эзэний үгсийг ярьсан ажгуу.

5 Мөнхүү улиран тохиох дор Их Эзэн Ишмэилийн, мөн түүнчлэн түүний гэрийнхнийх нь ч зүрх сэтгэлийг зөөллөсөн буюу, үүний хэрээр тэд бидэнтэй хамт эцгийн маань майхныг зорин, аглаг буйд тийш аянд гарав.

6 Мөнхүү улиран тохиох дор бид аглаг буйдад зорчих зуур, болгоогтун, Лемен болон Лемүел, мөн Ишмэилийн охидоос хоёр нь, мөн Ишмэилийн хоёр хүү болон тэдний гэр бүлийнхэн бидний эсрэг босов; тийм ээ, Нифай миний эсрэг болон Сэм, мөн тэдний эцэг Ишмэил, мөн түүний эхнэр, мөн түүний бусад гурван охины эсрэг бөлгөө.

7 Мөнхүү улиран тохиох дор уг эсэргүүцэл нь тэд Иерусалим нутагт буцахыг хүссэнээс болой.

8 Мөн эдүгээ, Нифай би тэдний зүрх сэтгэлийн хатуугийн улмаас гашуудаж байв, тиймийн тул би тэдэнд хандан ярьж, тийм ээ, бүр Леменд мөн Лемүелд хандан хэлрүүн: Болгоогтун, та нар миний ах нар мөн би та нарын дүү атал, та нарт хандан ярих ёстой болж, тийм ээ, мөн та нарт үлгэрлэх хэрэгтэй болох хүртэл та нар яахан зүрх сэтгэлээрээ ийм хатуу, мөн оюун ухаан тань ийм харалган байна вэ?

9 Та нар Их Эзэний үгийг яахан эс анхаарна вэ?

10 Та нар Их Эзэний тэнгэр элчийг харснаа яахан мартана вэ?

11 Тийм ээ, мөн Их Эзэн биднийг Лебений гараас чөлөөлж, мөн түүнчлэн бидэнд уг цэдгийг эзэмшүүлэхээр, бидний тул хийсэн үлэмж агуу зүйлсийг та нар яахан мартана вэ?

12 Тийм ээ, мөн хэрэв хүмүүсийн үрс итгэлээ хэрэгжүүлбэл Их Эзэн өөрийн хүслийн дагуу бүх зүйлийг тэдний төлөө хийж чадна гэдгийг та нар яахан мартана вэ? Иймийн тул түүнд үнэнч байцгаая.

13 Мөн хэрэв бид түүнд үнэнч байх аваас, бид амлалтын нутгийг эзэмших болно; мөн та нар ирээдүйн нэгэн үед Иерусалимын устгалын талаарх Их Эзэний үг биелэгдсэн байхыг мэдэх болно; учир нь Иерусалимын устгалын талаар Их Эзэний ярьсан тэр бүх зүйл биелэгдэх ёстой.

14 Учир нь болгоогтун, Их Эзэний Сүнс тэдэнд нөлөөлөхийг хичээхээ удахгүй болино; учир нь болгоогтун, тэд бошиглогчдыг эсэргүүцэж мөн Иеремиаг тэд шоронд хаясан болой. Мөн тэд эцгийн минь амийг авахаар эрэлхийлж, үүний хэрээр тэд түүнийг уг нутгаас явахад хүргэсэн буюу.

15 Эдүгээ болгоогтун, хэрэв та нар Иерусалим руу буцвал та нар ч бас тэдэнтэй хамт эрсдэх болно хэмээн би та нарт хэлж байна. Мөн эдүгээ, хэрэв та нар тэгэхээр сонгоно гэвэл, тэр газар өөд явцгаа, мөн хэрэв явбаас та нар ч түүнчлэн эрсдэнэ хэмээн та нарт миний ярьсан үгсийг санагтун; учир нь Их Эзэний Сүнс намайг тэгж ярихыг албадаж байгаа буюу.

16 Мөнхүү улиран тохиох дор, Нифай намайг эдгээр үгийг ах нартаа хандан ярихад, тэд надад уурлав. Мөнхүү улиран тохиох дор тэд намайг барьж авав, учир нь болгоогтун, тэд үлэмж их хилэгнэн, мөн тэд намайг олсоор хүлэв, тэд намайг зэрлэг араатанд тасчуулахаар аглаг буйдад орхиж болно хэмээн амийг минь хөнөөхөөр эрэлхийлсний учир болой.

17 Гэвч улиран тохиох дор би Их Эзэнд залбирч, хэлсэн нь: Ай Их Эзэн, танд итгэх миний итгэлийн дагуу, та намайг ах нарын минь гараас чөлөөлөөч; тийм ээ, намайг хүлсэн энэ хүлээсийг тасар татах тэрхүү хүчийг надад өгөөч.

18 Мөнхүү улиран тохиох дор намайг эдгээр үгийг хэлмэгц, болгоогтун, хүлээс гар болон хөлөөс минь алдуурав, мөн би ах нарынхаа өмнө зогсож, бас тэдэнд хандан дахин ярив.

19 Мөнхүү улиран тохиох дор тэд дахин надад уурлаж, мөн надад гар хүрэхийг завдав; гэвч болгоогтун, Ишмэилийн охидоос нэг нь, тийм ээ, мөн түүнчлэн түүний эх, мөн Ишмэилийн хөвгүүдийн нэг нь, ах нараас маань хичээнгүйлэн гуйхын хэрээр тэдний зүрх сэтгэл зөөлрөв; мөн тэд амийг минь авахаар оролдохоо болив.

20 Мөнхүү улиран тохиох дор тэд өөрсдийн ёс бусын улмаас гашуудаж байв, үүний хэрээр тэд миний өмнө бөхийж, мөн миний эсрэг үйлдсэн зүйлийн төлөө өөрсдийг нь уучлахыг тэд надаас гуйв.

21 Мөнхүү улиран тохиох дор тэдний хийсэн бүгдийг би даруй уучилж, мөн тэд Их Эзэн Бурхандаа хандан өршөөлийн тул залбирахыг би тэдэнд ухуулав. Мөнхүү улиран тохиох дор тэд тийн үйлдэв. Мөн тэднийг Их Эзэнд залбирч дууссаны дараа бид дахин эцгийнхээ майхныг зорин аяндаа гарсан буюу.

22 Мөнхүү улиран тохиох дор бид эцгийнхээ майханд хүрч ирэв. Мөн би болон ах нар маань бас Ишмэилийн бүх гэрийнхэн эцгийн маань майханд ирсний дараа, тэд Их Эзэн Бурхандаа талархал илэрхийлэв; мөн тэд түүнд тахил мөн шатаалт өргөлийг өргөв.