1 Ket napasamak nga inurnongmi a sangsangkamaysa amin a klase dagiti bukbukel ti tunggal kita, ti agpada iti tunggal kita dagiti makmakan a bukel, ken kasta met dagiti bukel ti bunga ti tunggal kita.

2 Ket napasamak kabayatan ti panagnaed ti amak iti langalang kinasaritanakami, a kinunana: Kitaen, nakatagtagainepak iti tagainep; wenno, iti sabali a pannao, nakakitaak iti parmata.

3 Ket kitaen, gapu iti banag a nakitak, adda rasonko nga agrag-o iti Apo gapu ken ni Nephi ken kasta met ken ni Sam; ta adda rasonko nga ipagarup nga isuda, ken kasta met ti adu kadagiti kaputotanda, ti maisalakanto.

4 Ngem kitaen, Laman ken Lemuel, madanaganak unay gapu kadakayo; ta kitaen, malagipko a nakitak iti tagainepko, ti maysa a nasipnget ken naleddaang a langalang.

5 Ket napasamak a nakakitaak iti maysa a lalaki, ket nakakawes isuna iti puraw a roba; ket immay ken nagtakder iti sangok.

6 Ket napasamak a kinasaonak, ket indawatna a sumurotak kenkuana.

7 Ket napasamak a bayat ti isusurotko kenkuana nakitak ti bagik nga adda iti nasipnget ken naleddaang a disso.

8 Ket kalpasan ti panagdaliasatko iti uneg ti adu nga oras iti kasipngetan, rinugiak ti nagkararag iti Apo a kaasiannak koma, a mayannurot ti kinabuslon dagiti nadungngo nga asina.

9 Ket napasamak a kalpasan ti panagkararagko iti Apo nakakitaak iti dakkel ken nalawa a kataltalonan.

10 Ket napasamak a nakakitaak iti kayo, a makaay-ayo ti bungana a makaparagsak.

11 Ket napasamak nga immasidegak ket nanganak iti bungana daytoy; ket naduktalak a nakasamsam-it daytoy, a rimbawanna ti amin a naramanakon. Wen, ket nakitak a puraw ti bungana daytoy, a rimbawanna ti amin a kinapuraw a nakitakon.

12 Ket bayat ti pannanganko iti bunga pinennekna ti espirituk iti napalaus a rag-o; gapuna, nangrugi a kinalikagumak a mangan met ti pamiliak iti daytoy; ta ammok a makaay-ayo daytoy iti amin a sabsabali a bunga.

13 Ket bayat ti panangiwarasko iti panagkitak, ta bareng makitak met ti pamiliak, nakakitaak iti karayan; ket agay-ayus ti danumna, ket asideg iti kayo a nangnanganak iti bungana.

14 Ket kimmitaak ket natakuatak ti naggapuanna; ket nakitak ti saan unay a pangadaywen a paggapuanna; ket iti paggapuanna daytoy nakitak ti inayo a ni Saria, ken ni Sam, ken ni Nephi; ket nakatakderda a kas man la dida ammo ti rumbeng a pagturonganda.

15 Ket napasamak nga inayabak ida; ket impukkawko met kadakuada nga umasidegda kaniak, ket manganda iti bunga, a makaay-ayo ngem iti amin a sabali a bunga.

16 Ket napasamak nga immasidegda kaniak ket nanganda met iti bunga.

17 Ket napasamak a tinarigagayak da Laman ken Lemuel a nasken nga umay ken manganda met iti bunga; gapuna, inturongko ti panagkitak iti paggappuan ti karayan, ta bareng makitak ida.

18 Ket napasamak a nakitak ida, ngem saanda nga immasideg kaniak a mangan iti bunga.

19 Ket nakitak ti landok a pagkaptan, ket naipasurot iti igid ti karayan, ken agturong iti kayo a pagtaktakderak.

20 Ken nakitak met ti nailet ken akikid a dana, a naiyabay iti pagkaptan a landok, iti abay ti kayo a pagtaktakderak; ket agturong met daytoy iti paggappuan ti ubbog, iti dakkel ken nalawa a kataltalonan, a kas man la maysa a lubong.

21 Ket nakitak dagiti saan a mabilang a naguummong a tattao, nga adu kadagitoy ti agdidinnupudop nga umasideg, tapno madanonda ti dana nga agturong iti ayan ti kayo a pagtaktakderak.

22 Ket napasamak a nakaasidegda, ken nagnagnada ti dana nga agturong iti kayo.

23 Ket napasamak a timmaud ti angep a nasipnget; wen, kasta unay ti kinansipngetna nga angep, isu a saan a nasurotan dagiti nagnagna iti dana ti papananda, isu a nayaw-awan ken napukawda.

24 Ket napasamak a nakitak dagiti dadduma pay nga agdidinnupudop nga umasideg, ket nakaasidegda ken nagiggemda iti murdong ti landok a pagkaptan; ket inusokda ti nasipnget nga angep iti yaasidegda, kumkumpetda iti landok a pagkaptan, agingga a nakaasidegda ken nakapanganda iti bunga ti kayo.

25 Ket kalpasan a nakapananganda iti bunga ti kayo inwarasda ti panagkitada a kasla mabainda.

26 Ket inwarasko met ti panagkitak, ket nakitak, iti ballasiw ti karayan ti danum, ti dakkel ken nalawa a pasdek; ket nakatakder a kasla agtatapaw iti angin, iti ngatuen ti daga.

27 Ken napunno daytoy ti tattao, a kas iti nataengan ken iti ubing, kasta met iti lalaki ken babai; ken naisalsalumina ti pintas ti kawesda; ken addaanda iti langa a manguy-uyaw ken itudtudoda dagiti nakadanon ken mangmangan ti bunga.

28 Ket kalpasan a naramananda ti bunga, nagbainda, gapu kadagiti manguy-uyaw kadakuada; ket pimmanawda ket nagturong kadagiti maiparit a dana ket napukawda.

29 Ket ita siak, ni Nephi, diak ibaga amin dagiti balikas ti amak.

30 Ngem, iti ababa a pannakaisurat, kitaen, nakitana dagiti sabali pay nga ummong nga agdidinnupudop nga umasideg; ket nakadanonda ken kimpetda iti murdong ti pagkaptan a landok; ket nakaasidegda, nagtultuloy a kimpetda iti pagkaptan a landok, agingga a nakadon ket nagkurno ken nanganda iti bunga ti kayo.

31 Ken nakitana pay kadagiti dadduma nga ummong a mangar-arikap iti dalan a mangiturong kadakuada iti dayta dakkel ken nalawa a pasdek.

32 Ket napasamak nga adu ti nalmes iti adalem a paset ti ubbog; ken adu ti napukaw iti imatangna, nga agallaalla kadagiti di karuaman a kalsada.

33 Ket dakkel ti ummong ti tattao a simrek iti nakarna a pasdek. Ket kalpasan a nakastrekda iti dayta a pasdek mananglalais ti panangitudoda kaniak ken kasta met kadagiti mangmangan iti bunga; ngem saanmi ida nga intaltalek.

34 Dagitoy ti balikas ti amak: Ta kas iti kaadu ti dimngeg kadakuada, ti timmalaw.

35 Ket saan a nangan da Laman ken Lemuel iti bunga, kinuna ti amak.

36 Ket napasamak a kalpasan a naisao ti amak ti amin a balikas iti tagainepna wenno parmatana, nga adu, kinunana kadakami, gapu kadagitoy a banag a nakitana iti parmatana, kasta unay ti panagdanagna para ken kada Laman ken Lemuel; wen, indanagna ti pannakaisinada iti imatang ti Apo.

37 Ket ingunamgunamna ida nga addaan iti amin a rikna ti naasi a nagannak, tapno imdenganda dagiti balikasna, ta bareng no kaasian ida ti Apo, ta saanna ida nga ilaksid; wen, kinasabaan ida ti amak.

38 Ket kalpasan ti panangasabana kadakuada, ken kasta met ti panangipadtona kadakuada ti adu a banag, indawatna kadakuada a tungpalenda dagiti bilin ti Apo; ket insardengnan ti nakisao kadakuada.