1 Ket ita, adu pay a banag ti imbaga ni Jacob kadagiti tattaok iti dayta a panawen; nupay kasta dagitoy laeng a banag ti impalubosko a maisurat, ta umdasen kaniak dagiti banag a naisuratkon.

2 Ket ita siak, ni Nephi, agsuratak iti ad-adu pay a balikas ni Isaias, agsipud ta pagragsakan ti karurruak dagiti balikasna. Ta aramatenkonto dagiti balikasna kadagiti tattaok, ken ipawaragawagkonto iti amin nga annakko, ta pudno a nakitana ti Mannubbotko, a kas iti pannakakitak kenkuana.

3 Ket ti kabsatko, a ni Jacob, nakitana met a kas iti pannakakitak kenkuana; gapuna, ipawaragawagkonto dagiti balikasna kadagiti annakko tapno ipaneknekko kadakuada a pudno dagiti balikasko. Gapuna, babaen dagiti balikas dagiti tallo, kinuna ti Dios, patalgedankonto ti balikasko. Nupay kasta, mangibaon ti Dios iti ad-adu pay a saksi, ket paneknekanna amin a balikasna.

4 Kitaenyo, maragsakan ti karurruak a mangipaneknek kadagiti tattaok ti kinapudno ti yaay ni Cristo; ta, panggep daytoy ti pannakaited ti linteg ni Moises; ta amin dagiti banag nga inted ti Dios manipud iti punganay ti lubong, iti tao, ti mangibagi kenkuana.

5 Kasta met a maragsakan ti karurruak kadagiti katulagan ti Apo nga inaramidna kadagiti ammatayo; wen, maragsakan ti kaunggak iti paraburna, ken iti lintegna, ken bileg, ken asi iti naindaklan ken agnanayon a plano ti pannakaisalakan manipud iti patay.

6 Ken maragsakan ti karurruak iti panangipaneknekko kadagiti tattaok a maungaw amin a tao malaksid no umay ni Cristo.

7 Agsipud ta no awan ti Cristo awan met ti Dios; ket no awan ti Dios awantayo, agsipud ta awan koma ti panagparsua. Ngem adda Dios, ket isu ti Cristo, ket umayto iti tumutop a panawenna.

8 Ket ita isuratko ti sumagmamano a balikas ni Isaias, ta siasino man kadagiti tattaok ti makabasanto kadagitoy a balikas mabalin nga agragsak ti pusoda ken agrag-oda para iti amin a tao. Ita dagitoy dagiti balikas, ket mabalinko nga arameten dagidiay kadakayo ken dagiti amin a tao.