ບົດທີ 11
ຢາໂຄບໄດ້ເຫັນພຣະຜູ້ໄຖ່ຂອງລາວ—ກົດຂອງໂມເຊສະແດງເຖິງພຣະຄຣິດ ແລະ ພິສູດວ່າ ພຣະອົງຈະສະເດັດມາ. ປະມານ 559–545 ປີ ກ່ອນ ຄ.ສ.
1 ແລະ ບັດນີ້, ຢາໂຄບໄດ້ເວົ້າອີກຫລາຍເລື່ອງກັບຄົນຂອງຂ້າພະເຈົ້າໃນເວລານັ້ນ; ເຖິງຢ່າງໃດກໍຕາມ, ຂ້າພະເຈົ້າໄດ້ ບັນທຶກໄວ້ພຽງແຕ່ເລື່ອງເຫລົ່ານີ້, ເພາະເລື່ອງທີ່ບັນທຶກໄວ້ພຽງພໍສຳລັບຂ້າພະເຈົ້າ.
2 ແລະ ບັດນີ້ຂ້າພະເຈົ້ານີໄຟໄດ້ບັນທຶກຄຳເວົ້າຂອງ ເອຊາຢາອີກ, ເພາະຈິດວິນຍານຂອງຂ້າພະເຈົ້າພໍໃຈໃນຄຳເວົ້າຂອງເພິ່ນ. ເພາະຂ້າພະເຈົ້າຈະປຽບທຽບຄຳເວົ້າຂອງເພິ່ນກັບຄົນຂອງຂ້າພະເຈົ້າ, ແລະ ຂ້າພະເຈົ້າຈະສົ່ງອອກໄປເຖິງລູກຫລານຂອງຂ້າພະເຈົ້າທັງໝົດ, ເພາະເພິ່ນໄດ້ເຫັນ ພຣະຜູ້ໄຖ່ຂອງຂ້າພະເຈົ້າແທ້ໆ ເໝືອນດັ່ງຂ້າພະເຈົ້າໄດ້ເຫັນພຣະອົງ.
3 ແລະ ນ້ອງຊາຍຂອງຂ້າພະເຈົ້າຢາໂຄບກໍໄດ້ ເຫັນພຣະອົງຄືກັນກັບຂ້າພະເຈົ້າໄດ້ເຫັນພຣະອົງ; ດັ່ງນັ້ນ, ຂ້າພະເຈົ້າຈະສົ່ງຄຳເວົ້າຂອງຄົນທັງສອງອອກໄປເຖິງລູກຫລານຂອງຂ້າພະເຈົ້າ ເພື່ອພິສູດກັບພວກເຂົາວ່າ ຄຳເວົ້າຂອງຂ້າພະເຈົ້າເປັນຄວາມຈິງ. ດັ່ງນັ້ນ, ໂດຍຄຳເວົ້າຂອງຄົນ ສາມຄົນ, ພຣະເຈົ້າໄດ້ກ່າວວ່າ ເຮົາຈະສະຖາປະນາຄຳເວົ້າຂອງເຮົາ. ເຖິງຢ່າງໃດກໍຕາມ, ພຣະເຈົ້າຍັງໄດ້ສົ່ງພະຍານມາອີກ, ແລະ ພຣະອົງພິສູດພຣະຄຳຂອງພຣະອົງທັງໝົດ.
4 ຈົ່ງເບິ່ງ, ຈິດວິນຍານຂອງຂ້າພະເຈົ້າພໍໃຈໃນ ການພິສູດຄວາມຈິງຂອງ ການສະເດັດມາຂອງພຣະຄຣິດຕໍ່ຄົນຂອງຂ້າພະເຈົ້າ ເພື່ອຈຸດມຸ້ງໝາຍນີ້ຈຶ່ງມີ ກົດຂອງໂມເຊໃຫ້ໄວ້; ແລະ ທຸກຢ່າງທີ່ພຣະເຈົ້າປະທານໃຫ້ມະນຸດນັບຕັ້ງແຕ່ການເລີ່ມຕົ້ນຂອງໂລກມາເປັນການສະແດງເຖິງພຣະອົງ.
5 ແລະ ຈິດວິນຍານຂອງຂ້າພະເຈົ້າພໍໃຈໃນ ພັນທະສັນຍາຂອງພຣະຜູ້ເປັນເຈົ້າອີກ ຊຶ່ງພຣະອົງໄດ້ເຮັດໄວ້ກັບບັນພະບຸລຸດຂອງພວກເຮົາ; ແທ້ຈິງແລ້ວ, ຈິດວິນຍານຂອງຂ້າພະເຈົ້າພໍໃຈໃນພຣະຄຸນຂອງພຣະອົງ, ແລະ ໃນຄວາມຍຸດຕິທຳຂອງພຣະອົງ, ແລະ ພຣະອຳນາດ ແລະ ພຣະເມດຕາໃນແຜນອັນຍິ່ງໃຫຍ່ ແລະ ນິລັນດອນແຫ່ງການປົດປ່ອຍຈາກຄວາມຕາຍ.
6 ແລະ ຈິດວິນຍານຂອງຂ້າພະເຈົ້າພໍໃຈໃນການພິສູດຕໍ່ຜູ້ຄົນຂອງຂ້າພະເຈົ້າວ່າ ຖ້າຫາກພຣະຄຣິດບໍ່ສະເດັດມາ ມະນຸດທຸກຄົນຈະຕ້ອງຕາຍ.
7 ເພາະຖ້າຫາກ ບໍ່ມີພຣະຄຣິດແລ້ວ ກໍບໍ່ມີພຣະເຈົ້າ; ແລະ ຖ້າຫາກບໍ່ມີພຣະເຈົ້າ, ພວກເຮົາກໍບໍ່ເປັນຢູ່ເພາະ ການສ້າງຈະມີບໍ່ໄດ້. ແຕ່ມີພຣະເຈົ້າ ແລະ ພຣະອົງຄືພຣະຄຣິດ ແລະ ພຣະອົງຈະສະເດັດມາໃນຄວາມສົມບູນແຫ່ງວັນເວລາຂອງພຣະອົງ.
8 ແລະ ບັດນີ້ຂ້າພະເຈົ້າຂຽນຄຳເວົ້າຂອງເອຊາຢາໄວ້ບາງຄຳສຳລັບຜູ້ໃດຜູ້ໜຶ່ງໃນຜູ້ຄົນຂອງຂ້າພະເຈົ້າ ຈະເຫັນຄຳເວົ້າເຫລົ່ານີ້ ຈະໄດ້ມີກຳລັງໃຈ ແລະ ປິຕິຍິນດີເພື່ອມະນຸດທຸກຄົນ. ແລ້ວນີ້ຄືຂໍ້ຄວາມ ແລະ ທ່ານຈະໄດ້ປຽບທຽບມັນກັບຕົວທ່ານເອງ ແລະ ກັບມະນຸດທັງປວງ.