ບົດທີ 19
ເອຊາຢາກ່າວກ່ຽວກັບພຣະເມຊີອາ—ຜູ້ຄົນໃນຄວາມມືດຈະເຫັນແສງສະຫວ່າງອັນຍິ່ງໃຫຍ່—ເດັກນ້ອຍຜູ້ໜຶ່ງໄດ້ເກີດມາໃຫ້ແກ່ພວກເຮົາແລ້ວ—ເພິ່ນຈະເປັນອົງສັນຕິລາດ ແລະ ຈະປົກຄອງລາຊາບັນລັງຂອງດາວິດ—ປຽບທຽບກັບເອຊາຢາ 9. ປະມານ 559–545 ປີ ກ່ອນ ຄ.ສ.
1 ເຖິງຢ່າງໃດກໍຕາມ, ຄວາມໝົ່ນໝອງຈະຍັງບໍ່ເທົ່າກັບທີ່ເຄີຍເປັນມາໃນຄວາມເດືອດຮ້ອນຂອງມັນ, ເມື່ອຄັ້ງທຳອິດ ພຣະອົງໄດ້ເຮັດໃຫ້ ແຜ່ນດິນເສບູໂລນ ແລະ ແຜ່ນດິນເນັບທະລີເປັນທຸກພໍສົມຄວນ, ແລະ ຕໍ່ມາໄດ້ເຮັດໃຫ້ທຸກໜັກຫລາຍຂຶ້ນໂດຍທາງທະເລແດງເລີຍຈາກແມ່ນ້ຳຈໍແດນ ໃນຄາລີເລຂອງປະຊາຊາດ.
2 ຜູ້ທີ່ດຳເນີນໄປໃນ ຄວາມມືດໄດ້ເຫັນແສງສະຫວ່າງຢ່າງໃຫຍ່ຫລວງມາແລ້ວ; ຄວາມສະຫວ່າງຍ່ອມສ່ອງເຖິງຜູ້ທີ່ຢູ່ໃນແຜ່ນດິນຂອງເງົາແຫ່ງຄວາມຕາຍ.
3 ພຣະອົງໄດ້ເຮັດໃຫ້ປະຊາຊາດເພີ່ມທະວີຂຶ້ນ ແລະ ເຮັດໃຫ້ຄວາມສຸກ ເພີ່ມຂຶ້ນ—ພວກເຂົາປິຕິຍິນດີໃນສິ່ງທີ່ພຣະອົງເຮັດເໝືອນດັ່ງຄົນປິຕິຍິນດີເມື່ອຍາມເກັບກ່ຽວ ຫລື ເໝືອນດັ່ງຄາວທີ່ພວກເຂົາແບ່ງປັນຂອງທີ່ຍຶດມາໄດ້.
4 ເພາະພຣະອົງໄດ້ຫັກແອກທີ່ເຮັດໃຫ້ພວກເຂົາໜັກໜ່ວງ, ແລະ ໄມ້ຄານທີ່ພາດບ່າຂອງພວກເຂົາຫັກແລ້ວ.
5 ເພາະທຸກສະໜາມຮົບຂອງນັກຮົບຍ່ອມມີສຽງອຶກກະທຶກຢ່າງສັບສົນ, ແລະ ອາພອນໂຊກໄປດ້ວຍເລືອດ; ແຕ່ນີ້ຈະເປັນໄປດ້ວຍການເຜົາໄໝ້.
6 ເພາະວ່າ ເດັກນ້ອຍຜູ້ໜຶ່ງຈະເກີດມາເພື່ອພວກເຮົາ, ຈະປະທານບຸດຊາຍຜູ້ໜຶ່ງໃຫ້ແກ່ພວກເຮົາ, ແລະ ພຣະອົງຈະເປັນ ຜູ້ປົກຄອງພວກເຮົາ, ພຣະນາມຂອງພຣະອົງຈະຖືກເອີ້ນວ່າ ຜູ້ປະເສີດ, ຜູ້ປຶກສາ, ພຣະເຈົ້າຜູ້ຊົງລິດທານຸພາບ, ພຣະບິດາຜູ້ເປັນນິດ, ອົງ ສັນຕິລາດ.
7 ຄວາມຈະເລີນແຫ່ງ ການປົກຄອງ ແລະ ສັນຕິສຸກ ຈະບໍ່ມີທີ່ສຸດ, ເທິງບັນລັງຂອງດາວິດ, ແລະ ເໜືອອານາຈັກຂອງເພິ່ນເພື່ອວາງລະບຽບ, ແລະ ສະຖາປະນາຂຶ້ນດ້ວຍຄວາມສະຫລາດສ່ອງໃສ ແລະ ຍຸດຕິທຳ, ເລີ່ມແຕ່ບັດນີ້ຈົນເຖິງຕະຫລອດການ. ຄວາມມຸ້ງໝັ້ນຂອງຈອມໂຍທາຈະທຳການນີ້.
8 ພຣະຜູ້ເປັນເຈົ້າສົ່ງພຣະຄຳຂອງພຣະອົງເຖິງຢາໂຄບ ແລະ ມັນສ່ອງແສງມາເຖິງ ອິດສະຣາເອນ.
9 ແລະ ຜູ້ຄົນທັງປວງຈະຮູ້ຈັກ ເຖິງແມ່ນເອຟະຣາອີມ ແລະ ຜູ້ອາໄສຂອງຊາມາເຣຍທີ່ກ່າວດ້ວຍຄວາມຈອງຫອງ ແລະ ດ້ວຍຄວາມເຍີ້ຍິ່ງຂອງໃຈວ່າ:
10 ຕຶກທີ່ສ້າງຂຶ້ນດ້ວຍດິນຈີ່ໄດ້ເພພັງລົງແລ້ວ, ແຕ່ພວກເຮົາຈະສ້າງຂຶ້ນໃໝ່ດ້ວຍຫີນ; ກົກເດື່ອຖືກໂຄ່ນລົງແລ້ວ, ແຕ່ພວກເຮົາຈະປູກຕົ້ນສີດາແທນ.
11 ສະນັ້ນ, ພຣະຜູ້ເປັນເຈົ້າຈະເຮັດໃຫ້ຜູ້ປໍລະປັກຂອງ ເຣສິນຕໍ່ສູ້ກັບເພິ່ນ, ແລະ ຮວບຮວມສັດຕູຂອງເພິ່ນເຂົ້າກັນ;
12 ຊາວຊີເຣຍຢູ່ທາງໜ້າ ແລະ ຊາວຟີລິດສະຕິນຢູ່ທາງຫລັງ; ແລະ ດ້ວຍປາກທີ່ອ້າໄວ້ ພວກເຂົາຈະ ກືນກິນອິດສະຣາເອນ. ເພາະທັງໝົດນີ້ ພຣະພິໂລດຂອງພຣະອົງຍັງບໍ່ທັນເຊົາເທື່ອ, ແຕ່ພຣະຫັດຂອງພຣະອົງຍັງຍື່ນອອກມາ.
13 ເພາະຜູ້ຄົນ ບໍ່ໄດ້ຫັນໄປຫາພຣະອົງ ຜູ້ລົງທັນພວກເຂົາ, ທັງພວກເຂົາບໍ່ສະແຫວງຫາຈອມໂຍທາ.
14 ສະນັ້ນ ພຣະຜູ້ເປັນເຈົ້າຈະຕັດຫົວ ແລະ ຫາງກິ່ງກ້ານ ແລະ ຕົ້ນອອກຈາກອິດສະຣາເອນໃນມື້ດຽວ.
15 ຜູ້ອະວຸໂສຈະເປັນຫົວ ແລະ ສາດສະດາທີ່ສິດສອນຄວາມຕົວະຈະເປັນຫາງ.
16 ເພາະຜູ້ນຳຂອງຜູ້ຄົນພວກນີ້ເປັນເຫດໃຫ້ເຂົາທຳຜິດ; ແລະ ຄົນທີ່ຖືກພວກເຂົານຳໄປຍ່ອມຖືກທຳລາຍ.
17 ສະນັ້ນ ພຣະຜູ້ເປັນເຈົ້າຈຶ່ງຈະບໍ່ມີຄວາມສຸກໃນຊາຍໜຸ່ມຂອງເຂົາ, ແລະ ທັງບໍ່ມີ ເມດຕາສົງສານຕໍ່ລູກກຳພ້າພໍ່ ແລະ ແມ່ໝ້າຍຄົນໃດເລີຍ; ເພາະວ່າທຸກໆຄົນໃນພວກເຂົາເປັນຄົນໜ້າຊື່ໃຈຄົດ, ແລະ ເປັນຄົນເຮັດຊົ່ວ ແລະ ທຸກໆປາກເວົ້າແຕ່ ແນວໂງ່. ເພາະທັງໝົດນີ້ພຣະພິໂລດຂອງພຣະອົງຍັງບໍ່ທັນເຊົາເທື່ອ, ແຕ່ ພຣະຫັດຂອງພຣະອົງຍັງຍື່ນອອກມາ.
18 ເພາະຄວາມຊົ່ວຮ້າຍເຜົາໄໝ້ດັ່ງໄຟ ມັນຈະກືນກິນເຄືອ ແລະ ກົກໜາມ, ແລະ ຈະເກີດໄຟຕາມກໍໄມ້ໃນປ່າ, ແລະ ມັນຈະລຸກລາມຂຶ້ນຄືກັນກັບການພຸ່ງຂຶ້ນຂອງຄວັນ.
19 ດ້ວຍພຣະພິໂລດຂອງຈອມໂຍທາ, ແຜ່ນດິນຈຶ່ງມືດ ແລະ ຜູ້ຄົນຈະເປັນຄືນ້ຳມັນເຊື້ອໄຟ; ບໍ່ມີຜູ້ໃດຈະໄວ້ຊີວິດອ້າຍນ້ອງຂອງຕົນເລີຍ.
20 ແລະ ເຂົາຈະຍາດຊີງເອົາມືຂວາ ແລະ ຍັງຫິວໂຫຍຢູ່; ແລະ ເຂົາຈະ ກິນມືຊ້າຍແຕ່ເຂົາຍັງບໍ່ພໍໃຈ; ເຂົາຈະກິນເນື້ອໜັງທີ່ແຂນຂອງຕົນເອງນຳອີກ—
21 ມານາເຊ, ເອຟະຣາອີມ; ແລະ ເອຟະຣາອີມ, ມານາເຊ; ທັງສອງຈະຮ່ວມກັນຕໍ່ສູ້ ຢູດາ. ເພາະທັງໝົດນີ້ ພຣະພິໂລດຂອງພຣະອົງຍັງບໍ່ທັນເຊົາເທື່ອ, ແຕ່ພຣະຫັດຂອງພຣະອົງຍັງຍື່ນອອກມາ.