1 Toktok we Aesea, boe blong Amoj, i bin luk long saed blong Juda mo Jerusalem:

2 Mo bae i kam blong hapen se long ol las dei, taem we bigfala hil blong haos blong Lod bae i stanap antap long ol bigfala hil, mo bae i go hae antap i bitim ol hil, mo evri kantri bae oli go long hem.

3 Mo plante pipol bae oli go mo talem se, yufala i kam, mo bae yumi go antap long bigfala hil blong Lod, i go long haos blong God blong Jekob; mo bae hem i tijim yumi long saed blong ol wei blong hem, mo bae yumi wokbaot long ol rod blong hem; from aot long Saeon bae loa i go, mo toktok blong Lod bae i aot long Jerusalem i go.

4 Mo bae hem i jaj long medel blong ol kantri, mo bae hem i toktok strong agensem plante pipol: mo bae oli hamarem ol naef blong faet blong olgeta i kam ol bled blong digim graon, mo ol spia blong olgeta i kam ol huk blong katem mo klinim ol tri—wan kantri bae i no leftemap ol naef blong faet agensem kantri, mo bae oli nomo lanem bakegen fasin blong mekem faet.

5 O laen blong Jekob, yufala i kam mo bae yumi wokbaot long laet blong Lod; yes, kam, from yufala evriwan i bin go lus, evriwan i go long ol fasin nogud blong hem.

6 From hemia, O Lod, yu bin lego ol pipol blong yu, laen blong Jekob, from oli kam fulap long Is, mo lisin long ol kleva olsem Ol Man Filistia, mo oli mekem olgeta oli glad tru ol laen blong ol man we oli no save olgeta.

7 Graon blong olgeta i fulap tu wetem silva mo gol, mo tu, i no gat eni en blong ol rij samting blong olgeta; graon blong olgeta i fulap tu wetem ol hos, mo tu, i no gat eni en long ol kat blong hos blong olgeta.

8 Graon blong olgeta i fulap tu wetem ol aedol; oli wosipim wok blong ol han blong olgeta nomo, hemia we ol fingga blong olgeta i bin mekem.

9 Mo man olbaot oli no bodaon, mo hae man i no mekem tingting blong hem i kam daon, from hemia, no fogivim hem.

10 O yufala, ol man nogud, go insaed long ston, mo haedem yufala insaed long das, nogud Lod mo glori blong hae paoa blong hem bae i kilim yufala.

11 Mo bae i kam blong hapen se ol hae lukluk blong ol man bae i kam daon, mo ol flas blong ol man bae Lod i putumdaon, mo Lod hemwan nomo bae i hae long dei ia.

12 From dei blong Lod blong Ol Pipol i kam kolosap long evri kantri, yes, long evriwan; yes, long olgeta we oli gat hae tingting mo olgeta we oli flas tumas, mo long evriwan we i leftemap olgeta, mo Lod bae i putum hem daon.

13 Yes, mo dei blong Lod bae i kam long evri redwud blong Lebanon, from oli hae mo oli leftemap olgeta antap; mo long evri oktri blong Basan;

14 Mo long evri bigfala hil we i hae, mo long evri hil, mo long evri kantri we oli leftemap olgeta antap, mo long evri pipol;

15 Mo long evri taoa we i hae, mo long evri wol we i wan fanis;

16 Mo long evri sip blong solwota, mo long evri sip blong Tarsis, mo long evri samting we i luk naes.

17 Mo hae tingting blong man, Lod bae i putumdaon, mo ol flas blong ol man bae hem i pulumdaon; mo Lod hemwan nomo bae i hae long dei ia.

18 Mo ol aedol bae hem i aotem evriwan.

19 Mo bae oli go insaed long ol hol blong ol ston, mo insaed long ol hol blong graon, from oli fraet se Lod bae i kam long olgeta mo glori blong hae paoa blong hem bae i kilim olgeta, long taem we hem i girap blong seksekem nogud wol ia.

20 Long dei ia, wan man bae i sakem ol aedol blong hem blong silva, mo ol aedol blong hem blong gol, we hem i bin mekem blong hemwan blong wosipim i go long ol rat mo ol wael flaengfokis;

21 Bae oli go insaed long ol smol hol insaed long ol ston, mo long ol hol blong ol sap ston, from oli fraet se Lod bae i kam long olgeta mo glori blong hae paoa blong hem bae i kilim olgeta, taem we hem i girap blong seksekem nogud wol ia.

22 Yufala i stop blong dipen long man, we win blong hem i stap long hol blong nus blong hem; from, ?bae oli givim wanem praes long hem?