1 Yes, from olsem ia nao Lod i talem: “?Mi mi bin putum yu long saed, o mi bin sendemaot yu blong oltaem?” From olsem ia nao Lod i talem: “?Wehem pepa blong divos blong mama blong yu? ?Mi bin givim yu long huia, o long wijwan long ol man we mi gat kaon long olgeta, mi bin salem yu long hem? Yes, ?long huia mi bin salem yu? Luk, from ol rabis fasin blong yu, yu bin salem yufala bakegen, mo from ol fasin blong yufala blong brekem loa, yu bin putumaot mama blong yu.

2 Taswe, taem we mi bin kam, i no bin gat wan man; taem mi bin singaot, yes, i no bin gat wan i ansa. O laen blong Isrel, ?han blong mi i sot tumas long eni wei, we i mekem se i no save pemaot, o mi no gat paoa blong sevem man? Luk, long strong tok blong mi, mi mekem solwota i drae, mi mekem ol reva blong olgeta oli kam olsem wan waelples, mo ol fis blong olgeta i sting from ol wota blong olgeta oli drae evriwan, mo oli ded from tosta.

3 Mi kavremap ol heven wetem tudak, mo mi mekem hemia wetem wan bag olsem klos blong kavremap olgeta.”

4 Lod God i givim long mi tang blong ol waes man, blong mekem se mi save olsem wanem blong talem wan toktok long stret taem long yu, O laen blong Isrel. Taem we yu taed, hem i wekemap evri moning. Hem i wekemap sora blong mi blong lisin olsem wan waes man.

5 Lod God i openem sora blong mi, mo mi no bin go agensem, mo tu, mi no bin tanembak.

6 Mi givim baksaed blong mi long ol man blong wip, mo ol jik blong mi long olgeta we oli pulumaot ol hea blong mustas. Mi no haedem fes blong mi long olgeta we oli mekem mi sem mo olgeta we oli spet long fes blong mi.

7 From Lod God bae i helpem mi, from hemia, bae mi no save lus. From hemia, mi mekem fes blong mi i luk olsem se oli mekem long ston, mo mi save se bae mi no sem.

8 Mo Lod i stap kolosap, mo hem i soemaot se mi no gat rong. ?Huia bae i rao wetem mi? Bae yumi stanap tugeta. ?Huia i man we i agensem mi? Letem hem i kam kolosap long mi, mo bae mi panisim hem wetem paoa blong maot blong mi.

9 From Lod God bae i helpem mi. Mo olgeta evriwan we bae oli jajem mi, luk, olgeta evriwan bae oli kam olfala olsem ol klos, mo fatfat bataflae bae i kakae olgeta evriwan.

10 ?Huia i stap long medel blong yufala we i fraet long Lod, we i obei voes blong wokman blong hem, we i wokbaot long tudak mo i no gat laet?

11 Luk, yufala evriwan we i laetem faea, we i raonem yufala bakegen wetem ol samting ia we i stap laet long naet, wokbaot long laet blong faea blong yufala mo long ol samting ia we yufala i bin laetem. Samting ia bae yufala i kasem long han blong mi—bae yufala i ledaon wetem harem nogud.