ບົດທີ 13
ຢູດາ ແລະ ເຢຣູຊາເລັມຈະຖືກລົງໂທດເພາະການບໍ່ເຊື່ອຟັງຂອງພວກເຂົາ—ພຣະຜູ້ເປັນເຈົ້າອ້ອນວອນເພື່ອ ແລະ ພິພາກສາຜູ້ຄົນຂອງພຣະອົງ—ທິດາຂອງຊີໂອນຖືກສາບແຊ່ງ ແລະ ທໍລະມານເພາະຄວາມເປັນຢູ່ທາງໂລກຂອງພວກເຂົາ—ປຽບທຽບກັບເອຊາຢາ 3. ປະມານ 559–545 ປີ ກ່ອນ ຄ.ສ.
1 ເພາະຈົ່ງເບິ່ງ, ພຣະຜູ້ເປັນເຈົ້າ, ຈອມໂຍທາຈະເອົາສິ່ງທີ່ຄ້ຳຈູນຊີວິດເຊັ່ນ, ອາຫານທັງໝົດ ແລະ ນ້ຳທີ່ມີທັງໝົດອອກຈາກເຢຣູຊາເລັມ ແລະ ຈາກຢູດາ—
2 ຜູ້ຍິ່ງໃຫຍ່ ແລະ ນັກຮົບ, ຜູ້ຕັດສິນ, ແລະ ສາດສະດາ, ຜູ້ທຳນາຍ, ແລະ ຜູ້ອາວຸໂສ;
3 ຜູ້ບັງຄັບຫ້າສິບຄົນ, ແລະ ຜູ້ທີ່ມີກຽດ, ຜູ້ປຶກສາ, ແລະ ຜູ້ມີເລ່ຫລ່ຽມທີ່ມີຝີມືດີ, ແລະ ນັກເວົ້າທີ່ມີໂວຫານ.
4 ແລະ ເຮົາຈະກະທຳໃຫ້ເດັກນ້ອຍເປັນເຈົ້າຊາຍຂອງພວກເຂົາ, ແລະ ເດັກເກີດໃໝ່ຈະປົກຄອງພວກເຂົາ.
5 ແລະ ທຸກຄົນຈະຖືກຂົ່ມເຫັງໂດຍພວກກັນເອງ, ແລະ ໂດຍເພື່ອນບ້ານຂອງຕົນ; ເດັກນ້ອຍຈະປະພຶດອວດດີຕໍ່ຜູ້ອາວຸໂສ, ແລະ ຄົນຊົ່ວຈະຕໍ່ຕ້ານຄົນມີກຽດ.
6 ເມື່ອຄົນຜູ້ໜຶ່ງຈະຍຶດຕົວພີ່ນ້ອງຂອງເຂົາໄວ້ໃນເຮືອນຂອງບິດາຂອງເຂົາ, ແລະ ຈະເວົ້າວ່າ: ເຈົ້າມີເສື້ອຜ້າແລ້ວ, ຂໍໃຫ້ເຈົ້າເປັນຜູ້ນຳຂອງເຮົາເຖີດ, ແລະ ຢ່າໃຫ້ ຄວາມຫາຍຍະນະເກີດຈາກມືຂອງເຈົ້າ—
7 ໃນມື້ນັ້ນເຂົາຈະຄັດຄ້ານໂດຍກ່າວວ່າ: ເຮົາຈະບໍ່ເປັນ ຜູ້ປິ່ນປົວເພາະວ່າໃນເຮືອນຂອງເຮົາບໍ່ມີອາຫານ ຫລື ເຄື່ອງນຸ່ງຫົ່ມ; ຢ່າເຮັດໃຫ້ເຮົາເປັນຜູ້ປົກຄອງຜູ້ຄົນເລີຍ.
8 ເພາະເຢຣູຊາເລັມ ພິນາດແລ້ວ, ແລະ ຢູດາກໍ ຕົກແລ້ວ, ເພາະວາຈາຂອງພວກເຂົາ ແລະ ການກະທຳຂອງພວກເຂົາທີ່ຕໍ່ຕ້ານພຣະຜູ້ເປັນເຈົ້າ, ເຮັດໃຫ້ຂຸ່ນເຄືອງພຣະເນດແຫ່ງລັດສະໝີພາບຂອງພຣະອົງ.
9 ການສະແດງສີໜ້າຂອງພວກເຂົາເປັນພະຍານກ່າວໂທດພວກເຂົາ, ແລະ ປະກາດບາບຂອງພວກເຂົາເປັນຄືກັນກັບ ໂຊໂດມ, ແລະ ພວກເຂົາຈະລີ້ຊ່ອນບໍ່ໄດ້. ວິບັດແກ່ຈິດວິນຍານຂອງພວກເຂົາ, ເພາະພວກເຂົາໃຫ້ລາງວັນຄວາມຊົ່ວແກ່ຕົວ!
10 ຈົ່ງເວົ້າກັບຄົນຊອບທຳວ່າ ເຂົາທັງຫລາຍຈະ ເປັນສຸກ; ເພາະພວກເຂົາຈະໄດ້ຮັບຜົນຂອງການກະທຳຂອງພວກເຂົາເອງ.
11 ວິບັດແກ່ຄົນຊົ່ວ ເພາະເຂົາຈະຕາຍ; ເພາະລາງວັນຈາກມືຂອງເຂົາຈະມາສູ່ເຂົາ!
12 ແລະ ຜູ້ຄົນຂອງເຮົາ, ເດັກນ້ອຍເປັນຜູ້ຂົ່ມເຫັງພວກເຂົາ, ແລະ ຜູ້ຍິງປົກຄອງພວກເຂົາ. ໂອ້ ຜູ້ຄົນຂອງເຮົາ, ເຂົາທີ່ຈະ ນຳພາເຈົ້າເປັນເຫດໃຫ້ເຈົ້າຫລົງຜິດ ແລະ ທຳລາຍທາງເດີນຂອງເຈົ້າ.
13 ພຣະຜູ້ເປັນເຈົ້າຢືນຂຶ້ນເພື່ອ ສາບານ ແລະ ຢືນຂຶ້ນເພື່ອພິພາກສາຜູ້ຄົນ.
14 ພຣະຜູ້ເປັນເຈົ້າຈະເຂົ້າມາໃນການພິພາກສາພ້ອມດ້ວຍຜູ້ອາວຸໂສຂອງຜູ້ຄົນຂອງພຣະອົງ ແລະ ເຈົ້າຊາຍຂອງພວກນັ້ນ; ເພາະເຈົ້າໄດ້ ກິນ ສວນອະງຸ່ນເຂົ້າໄປ ແລະ ຂອງທີ່ປຸ້ນມາຈາກ ຄົນຍາກຈົນກໍຢູ່ໃນບ້ານຂອງເຈົ້າ.
15 ເຈົ້າໝາຍຄວາມວ່າແນວໃດ? ເຈົ້າຟາດຟັນຜູ້ຄົນຂອງເຮົາເປັນຕ່ອນໆ, ແລະ ບົດໜ້າຂອງຄົນຍາກຈົນ, ອົງພຣະຜູ້ເປັນເຈົ້າຈອມໂຍທາໄດ້ກ່າວ.
16 ຍິ່ງໄປກວ່ານັ້ນ, ພຣະຜູ້ເປັນເຈົ້າໄດ້ກ່າວວ່າ: ຍ້ອນວ່າລູກສາວຂອງຊີໂອນ ຊຶ່ງເປັນຄົນຈອງຫອງ, ແລະ ຍ່າງຍື່ນຄໍໄປທາງໜ້າ ແລະ ເຮັດຕາຢົ້ວຢວນ, ຍ່າງໄປ ແລະ ເຮັດກະຕຸ້ງກະຕິ້ງ, ແລະ ເຮັດບາດຕີນດັງຕຶ້ງຕັ້ງ—
17 ສະນັ້ນ ພຣະຜູ້ເປັນເຈົ້າ ຈະລົງທັນໃຫ້ກະໂຈມໃນຫົວຂອງລູກສາວຂອງຊີໂອນເປັນເກັດ, ແລະ ພຣະຜູ້ເປັນເຈົ້າຈະ ພົບເຫັນສ່ວນລຶກລັບຂອງພວກເຂົາ.
18 ໃນມື້ນັ້ນ ພຣະຜູ້ເປັນເຈົ້າຈະເອົາຄວາມກ້າຫານຂອງເຄື່ອງປະດັບທີ່ມີສຽງຂອງພວກເຂົາ, ແລະ ໝວກ, ແລະ ສາຍຄໍຄືກັນກັບດວງເດືອນໄປ;
19 ສ້ອຍຄໍ ແລະ ສ້ອຍແຂນ, ແລະ ຜ້າຄຸມ;
20 ໝວກ, ແລະ ເຄື່ອງປະດັບຂາ, ແລະ ຜ້າມັດຜົມ, ແລະ ແຜ່ນປະດັບ, ແລະ ຕຸ້ມຫູ;
21 ແຫວນ, ແລະ ເຄື່ອງເອ້ປະດັບດັງ;
22 ເສື້ອຜ້າເປັນຊຸດທີ່ປ່ຽນຖ່າຍໄດ້, ແລະ ເສື້ອຄຸມ, ແລະ ຜ້າປົກຫົວ, ແລະ ກິບໜີບຜົມ;
23 ແວ່ນ, ແລະ ຜ້າລີນິນເນື້ອດີ, ແລະ ຜ້າຄຸມ, ແລະ ຜ້າປົກໜ້າ.
24 ແລະ ເຫດການໄດ້ບັງເກີດຂຶ້ນ, ແທນກິ່ນຫອມຫວນຈະເປັນກິ່ນເໝັນ; ແທນຜ້າຄຽນແອວຈະເປັນ ຜ້າຂາດສ້ອຍ; ແລະ ແທນຜົມຕົກແຕ່ງຢ່າງດີຈະເປັນຫົວລ້ານ; ແທນ ຜ້າຄຸມທ້ອງຈະເປັນກະສອບຜ້າ; ການເຜົາໄໝ້ແທນຄວາມສວຍງາມ.
25 ພວກຜູ້ຊາຍຂອງເຈົ້າຈະລົ້ມຕາຍດ້ວຍດາບກັບຜູ້ຍິ່ງໃຫຍ່ຂອງເຈົ້າໃນສົງຄາມ.
26 ແລະ ປະຕູຂອງນາງຈະຄ່ຳຄວນ ແລະ ເປັນທຸກ; ແລະ ນາງຈະຢູ່ໂດດດ່ຽວ, ແລະ ນັ່ງຢູ່ພື້ນດິນ.