1 Ket napasamak kadagiti aldaw ni Ahaz ti lalaki nga anak ni Jotam, a lalaki nga anak ni Uzzias, nga ari ti Juda, a ni Rezin, nga ari ti Siria, ken ni Peka a lalaki nga anak ni Remalias, nga ari ti Israel, napan iti Jerusalem tapno gubatenna, ngem saan a nagballigi.

2 Ket naibaga iti balay ni David, a kunana: Kakumplot ti Siria ni Efraim. Ket natignay ti pusona, ken ti puso dagiti taona, a kas iti pananggunggon ti angin kadagiti kayo iti kabakiran.

3 Kalpasanna kinuna ti Apo ken ni Isaias: Inka sabtenen ni Ahaz, sika ken ni Sear Jasub ti lalaki nga anakmo, iti ngudo ti kanal a pagayusan ti danum nga aggapu iti akinngato a dan-aw iti nalatak a kalsada a pagtartrabahuan dagiti agar-aramid iti lupot;

4 Ket kunaem kenkuana: Agaluadka, ken agtalnaka; saanka nga agbuteng, wenno saanka nga agamak gapu kadagitoy dua nga ipus dagitoy umas-asuk nga aluten, gapu iti nakaam-amak a pungtot ni Rezin iti Siria, ken iti anak a lalaki ni Remalias.

5 Gapu ta ti Siria, da Efraim, ken ti lalaki nga anak ni Remalias, immawatda iti dakes a pammagbaga a maibusor kenka, a kunana:

6 Intayo busoren ti Juda ket riribukentayo, ket intayo serreken ida ta gundawayantayo, ken mangipatugawtayo iti ari iti nagtengngaanna, wen, ti lalaki nga anak ni Tabeal.

7 Gapuna a kinuna ti Apo a Dios: Saanto a makapagtakder, wenno mapasamak man la koma.

8 Ta ti Damasco ti ulo ti Siria, ket ti Rezin ti ulo ti Damasco; ket iti uneg ti innem-a-pulo-ket-lima a tawen mawarawaranto ti Efraim tapno saan nga agbalin a pagilian.

9 Ket ti Samaria ti ulo ti Efraim, ket ti lalaki nga anak ni Remalias ti ulo ti Samaria. Sigurado a no saankayonto a mamati saankayonto a mabukel.

10 Kanayonanna, nakisao manen ti Apo ken ni Ahaz, a kunana:

11 Dawatem ti tanda ti Apo a Diosmo; dawatem uray ti kaunggan, wenno ti kangatuan.

12 Ngem kinuna ni Ahaz: Saanakto a dumawat, wenno sulisogek man la koma ti Apo.

13 Ket kinunana: Dumngegka ita, O balay ni David; bassit kadi a banag iti biangmo a mangbannog kadagiti tattao, ngem bannogemto kadi met ti Diosko?

14 Ngarud, ikkannakanto a mismo ti Apo iti tanda—Kitaem, maysanto a birhen ti aginaw, ket agpasngayto iti lalaki, ket panaganannanto iti Immanuel.

15 Manganto iti mantekilia ken diro, tapno ammonanto ti agkedked iti dakes ken pilien ti naimbag.

16 Ta sakbay a makasursuro ti ubing nga agkedked iti dakes ken pilienna ti naimbag, baybay-anto dagiti agpada nga arina ti daga a kaguram.

17 Iyegto ti Apo kenka, ken kadagiti tattaom, ken iti balay ti amam, dagiti aldaw a saan a dimteng manipud iti aldaw nga ipapanaw ni Efraim manipud iti Juda, ti ari ti Asiria.

18 Ket mapasamakto iti dayta nga aldaw a sultipanto ti Apo dagiti ngilaw nga adda iti kaadaywan a paset ti Egipto, ken dagiti uyokan nga adda iti Asiria.

19 Ket umaydanto, ken agyandanto amin iti natikag a tanap, ken kadagiti abut dagiti bato, ken kadagiti amin a siitan a mula, ken kadagiti amin a kakaywan.

20 Iti dayta met la nga aldaw kiskisanto ti Apo iti labahas nga inupaan, kadagiti disso a labes iti karayan, babaen ti ari ti Asiria, ti ulo, ken ti barbon ti saka; ken kasta met nga ikisapnanto dagiti barbas.

21 Ket mapasamakto iti dayta nga aldaw, a taraknen ti tao ti urbon a baka ken dua a karnero;

22 Ket mapasamakto, iti kaadu ti gatas nga itedda manganto iti mantekilia; ta mantekilia ken diro ti kanen ti tunggal maysa a mabati iti dayta a daga.

23 Ket mapasamakto iti dayta nga aldaw, agbalinto iti tunggal lugar, nga ayan ti rinibu a kapuon ti ubas nga agpateg iti rinibu a bagi ti pirak, pagtubuanto ti kalkalunay ken siitan a mula.

24 Mapanto sadiay dagiti tattao nga addaan iti pana ken bai, agsipud ta pagtubuanto ti kalkalunay ken siitan a mula ti amin a daga.

25 Ket amin a turod a masukayto iti piko, saanto a pagdanagan nga agtubo ditoy ti kalkalunay ken siitan a mula; ngem pagikkanto iti baka, ken baddebaddeken dagiti babbabassit a taraken nga ayup.